កំពង់ចាម – ថ្លែងក្នុងសិក្ខាសាលាស្ដីពីការលើកកម្ពស់ការអនុវត្តកម្មវិធីអក្ខរកម្ម កាលពីថ្ងៃទី២០ ខែកុម្ភៈ ឆ្នាំ២០២៣កន្លងទៅ ឯកឧត្ដម ណុះ ស្លេះ រដ្ឋលេខាធិការក្រសួងអប់រំ យុវជន និងកីឡា លើក​ឡើងថា បច្ចុប្បន្នជាសម័យឌីជីថល ដូច្នេះកាលណាមនុស្សមិនចេះអក្សរ គឺមិនអាចដើរទាន់សម័យកាលបច្ចេកវិទ្យានេះបានទេ។

ឯកឧត្ដម ណុះ ស្លេះ មានប្រសាសន៍ថា កន្លងមកក្រសួងអប់រំ យុវជន និងកីឡា បានអនុវត្តការងារអក្ខរកម្មដោយរំដោះអនក្ខរជនឱ្យចេះអក្សរបាន២% បើប្រៀបធៀបអនក្ខរជនលើពិភពលោកពិសេសនៅប្រទេសអាហ្រិក និងកូដឺវ័រ។ មិនតែប៉ុណ្ណោះ ក្រសួងអប់រំ យុវជន និងកីឡា ដោយមានការជួយទាំងសម្ភារៈ និងថវិកា ពីអង្គការយូណេស្កូ បានបើកថ្នាក់អក្ខរកម្មចំនួន២០ថ្នាក់ ជួយកម្មករ កម្មការិនីតាមរោងចក្រឱ្យចេះអក្សរ ចេះគិតលេខ និងយល់ដឹងពីមេរៀនជីវិត ហើយនៅឆ្នាំបន្ទាប់ៗនឹងមានពង្រីកថ្នាក់អក្ខរកម្មឱ្យបានពី៣០ថ្នាក់ទៅ៤០ថ្នាក់បន្ថែមទៀត។

ឯកឧត្ដម ណុះ ស្លេះ រដ្ឋលេខាធិការក្រសួងអប់រំ យុវជន និងកីឡា

” ពលរដ្ឋគ្រប់រូបដាច់ខាតត្រូវតែចេះអក្សរ ដើម្បីឈានទៅសម្រេចបាននូវគោលដៅអភិវឌ្ឍប្រទេសជាតិប្រកបដោយចីរភាព “

រដ្ឋលេខាធិការក្រសួងអប់រំ យុវជន និងកីឡា ក៏បានផ្ដាំផ្ញើដល់សិក្ខាកាមទាំងអស់ឱ្យខិតខំប្រឹងប្រែងក្រេបយកចំណេះដឹង បទពិសោធន៍ល្អៗ គំនិតថ្មីៗពីគ្រូឧទ្ទេស ដើម្បីពង្រឹង និងលើកកម្ពស់កម្មវិធីអក្ខរកម្មឱ្យដំណើរការកាន់តែប្រសើរឡើងថែមទៀត។

បើតាមគោលនយោបាយជាតិស្ដីពីការសិក្សាពេញមួយជីវិត មានចក្ខុវិស័យអភិវឌ្ឍប្រជាជនកម្ពុជា ដោយ​ជនគ្រប់រូបត្រូវមានវិជ្ជាសម្បទារ បំណិនសម្បទា ចរិយាសម្បទា កាយសម្បទា និងគុណសម្បទា ដើម្បីរួមចំនែកបង្កើនសេដ្ឋកិច្ច និងលើកកម្ពស់សុខដុមជីវិតបុគ្គល គ្រួសារ និងសង្គម តាមរយៈការផ្ដល់ឱកាសសិក្សាពេញមួយជីវិត គ្រប់ពេលវេលា គ្រប់ទីកន្លែង និងគ្រប់មធ្យោបាយ។

គួរជម្រាបជូនថា ដោយសារមានការខិតខំប្រឹងប្រែងពីភាគីតាមរយៈកម្មវិធិអប់រំក្នុងប្រព័ន្ធ ក្រៅប្រព័ន្ធ និងមិនផ្លូវការ អត្រាអក្ខរកម្មជនពេញវ័យអាយុ១៥ឆ្នាំឡើងមាន ៨០,៥% ស្រី្តមាន ៧៥.០% ក្នុងនោះអត្រាអក្ខរកម្មនៅជនបទមានត្រឹមតែ ៧៦.៨% ស្រី ៧០,៧% ប៉ុណ្ណោះ នេះបើតាមរបាយការណ៍អង្កេតស្ដីពីសេដ្ឋកិច្ចសង្គមកម្ពុជា របស់វិទ្យាស្ថានជាតិស្ថិតិ នៃក្រសួងផែនការ៕