ដំណាក់កាល នៃដាក់ពាក្យស្នើសុំអាហារូបករណ៍មានច្រើន និងមានចំណុចសំខាន់ផ្សេងៗគ្នាទៅតាមប្រភេទអាហារូបករណ៍ជាក់ស្ដែង។ នេះជាការលើកឡើងរបស់យុវតី សុខ មុន្នីរតនា និស្សិតជ័យលាភីអាហារូបករណ៍រដ្ឋាភិបាលអូស្ត្រាលី ឬ Australian Awards Scholarship កំពុងសិក្សាថ្នាក់បរិញ្ញាបត្រជាន់ខ្ពស់នៅប្រទេសអូស្ត្រាលី ។

យុវតី មុន្នីរតនា បានលើកឡើងថា គន្លឹះសំខាន់ៗក្នុងការដាក់ពាក្យស្នើអាហារូបករណ៍តែងមានភាពខុសដោយឡែកពីគ្នាដែលអាស្រ័យទៅលើប្រភេទអាហារូបករណ៍នីមួយ ។ ជាមួយគ្នានេះ យុវតី មុន្នីរតនា នឹងចែករំលែកបទពិសោធន៍សំខាន់ចំនួន៣ដំណាក់កាលក្នុងការស្នើពាក្យអាហារូបករណ៍ ។

ដំណាក់កាលទី១ មុនពេលដាក់ពាក្យស្នើសុំអាហារូបករណ៍មាន៣គន្លឹះ ដោយទី១ បេក្ខជនទាំងអស់មិនគួរមើលរំលងការស្វែងរកប្រភពព័ត៌មានអាហារូបករណ៍ដែលច្បាស់លាស់ និងត្រឹមត្រូវរបស់អាហារូបករណ៍រដ្ឋាភិបាលអូស្ត្រាលី ។ សម្រាប់ប្រទេសកម្ពុជា បេក្ខជនអាចស្វែងរកបានតាមរយៈគេហទំព័រផ្លូវការរបស់អាហារូបករណ៍ https://www.australiaawardscambodia.org ឬហ្វេសប៊ុកផ្លូវការ Australian Awards Cambodia: https://www.facebook.com/Australia.Awards.Kh ។

គន្លឹះទី២ អំឡុងពេលដំណើរការនៃការដាក់ពាក្យស្នើសុំអាហារូបករណ៍ ជាដំណាក់កាលដែលបេក្ខជនត្រូវសិក្សាឱ្យបានលម្អិត និងច្បាស់លាស់ពីលក្ខខណ្ឌវិនិច្ឆ័យ (Eligibility Criteria) និងឯកសារតម្រូវការផ្សេងៗរបស់អាហារូបករណ៍ដូចជា តម្រូវការភាសាអង់គ្លេស (IELTS​) និងឯកសារចាំបាច់ផ្សេងៗទៀត ព្រមទាំងតម្រូវការនៃការបកប្រែឯកសារទាំងនោះជាភាសាអង់គ្លេស ។

គន្លឹះទី៣ បេក្ខជនត្រូវកត់សម្គាល់អំពីកាលបរិច្ឆេទចាប់ផ្តើមទទួលពាក្យស្នើសុំ និងកាលបរិច្ឆេទនៃការបិទទទួលពាក្យស្នើសុំអាហារូបករណ៍​ ។ លោកស្រី មុន្នីរតនា បានសង្កត់ធ្ងន់ថា ការអនុវត្តគន្លឹះទាំង៣ខាងលើនេះអាចរួមចំណែកយ៉ាងខ្លាំង ក្នុងការឱ្យបេក្ខជនត្រៀមខ្លួនរួចជាស្រេចសម្រាប់ការប្រកួតប្រជែងយកជ័យលាភីលើអាហារូបករណ៍នេះ ។

«បេក្ខជនគួរតាមដានការផ្សព្វផ្សាយលើគេហទំព័រ ឬ Facebook ផ្លូវការរបស់ Australian Awards Cambodia លើការរៀបចំសិក្ខាសាលាណែនាំនានាលើការដាក់ពាក្យស្នើសុំអាហារូបករណ៍ និងពិនិត្យលទ្ធភាពចូលរួមសិក្ខាសាលាដើម្បីទទួលបានចំណេះដឹង និងគន្លឹះសំខាន់ផ្សេងៗ»

យុវតី សុខ មុន្នីរតនា

ដំណាក់ទី២ជាអំឡុងពេល នៃការដាក់ពាក្យស្នើសុំអាហារូបករណ៍ បេក្ខជនត្រូវយកចិត្តទុកដាក់ជាចម្បង ព្រោះជាដំណាក់កាលកំណត់ជោគវាសនារបស់បេក្ខជនត្រូវបានជ្រើសរើសដើម្បីបន្តទៅវគ្គប្រកួតប្រជែង និងវគ្គសម្ភាសន៍ ។ លោកស្រីបន្តថា គន្លឹះទី១ គឺការពិនិត្យ និងស្វែងយល់ពីផ្នែកនីមួយៗនៃពាក្យស្នើសុំអាហារូបករណ៍ ជាពិសេសត្រូវអាន ស្វែងយល់ឱ្យបានច្បាស់ និងស៊ីជម្រៅលើផ្នែកសំណួរចម្លើយ ។ បេក្ខជនគួរអានឱ្យបានច្រើនដង ដើម្បីឱ្យបានយល់ច្បាស់ជៀសវាងការភាន់ច្រឡំសំណួរ ឬស្រពិចស្រពិល និង ដើម្បីឱ្យប្រាកដថាអ្នកនឹងមិនបង្កើតកំហុសណាមួយក្នុងការឆ្លើយសំណួរ ។

គន្លឹះទី២ ការស្វែងរកជំនួយតាមរយៈការចែករំលែកបទពិសោធន៍ ឬជួយផ្តល់មតិយោបល់លើការឆ្លើយសំណួររបស់បេក្ខជន ពីសំណាក់រៀមច្បង ឬអ្នកដែលមានបទពិសោធន៍ខ្ពស់នានា ដើម្បីកែលម្អ និងសម្រួចខ្លឹមសារនៃការឆ្លើយសំណួររបស់បេក្ខជនឱ្យបានកាន់តែល្អប្រសើរ ប៉ុន្តែទោះបីជាមានការណែនាំយ៉ាងណាក្តី បេក្ខជនគួរមានជំហរផ្ទាល់ខ្លួនច្បាស់លាស់ និងមិនគួរទោរទន់ខ្លាំងពេកលើការផ្តល់យោបល់ពីអ្នកជុំវិញខ្លួនទេ ។

ដំណាក់កាលទី៣ ក្រោយការដាក់ពាក្យស្នើសុំអាហារូបករណ៍ ជាដំណាក់កាលផ្ដោតលើការធ្វើបទសម្ភាសន៍ ក្រោយបេក្ខជនត្រូវបានជ្រើសរើសក្នុងវគ្គបំពេញពាក្យស្នើសុំអាហារូបករណ៍បានជោគជ័យ (Shortlist) ។ ក្នុងវគ្គសម្ភាសន៍នេះ បេក្ខជននឹងទទួលបានសំណួរសម្រាប់ត្រៀមសម្ភាសន៍តាមរយៈ Email មុនពេលចាប់ផ្ដើមកិច្ចសម្ភាសន៍ ប៉ុន្តែបេក្ខជនត្រូវត្រៀមខ្លួនទុកជាមុនដើម្បីទទួលបានជោគជ័យក្នុងដំណាក់កាលនេះ ។ បេក្ខជនត្រូវត្រៀមរៀបចំកម្រងសំណួរចម្លើយសម្រាប់ហាត់សមឱ្យបានលឿនបំផុតក្រោយពីទទួលបានសំណួរពី Email របស់អាហារូបករណ៍ និងការសាកសួរបទពិសោធន៍ពីសិស្សច្បង ឬនិស្សិតអាហារូបករណ៍ជំនាន់មុន ។

យុវតី មុន្នីរតនា បានបន្ថែមថា ក្នុងការត្រៀមសំណួរចម្លើយនេះ បេក្ខជនអាចសមចម្លើយរបស់ខ្លួនជាប្រចាំ ឬមួយថ្ងៃមួយសំណួរដើម្បីពង្រឹងទំនុកចិត្ត ភាពក្លាហាន និងការចងចាំល្អលើចម្លើយរបស់ខ្លួនដែលបានត្រៀមទុក ។ អំឡុងពេលសម្ភាសន៍ បេក្ខជនត្រូវស្តាប់ ផ្តោតអារម្មណ៍ មានភាពបត់បែនប្រកបដោយភាពឈ្លាសវៃ និងស្ដាប់សំនួររបស់គណៈកម្មការឱ្យបានច្បាស់លាស់ បើចាំបាច់គួរបញ្ជាក់សំណួរឱ្យបានច្បាស់មុននឹងធ្វើការឆ្លើយតប ។

«ក្នុងការសម្ភាសន៍អាហារូបករណ៍ Australian Awards Scholarships បេក្ខជនគួរចាប់ផ្តើមដោយការណែនាំអំពីខ្លួនឯងដោយសង្ខេប មុនពេលចាប់ផ្តើមឆ្លើយសំណួរ ដោយនេះជាចំណុចឆ្លាតវៃមួយរបស់បេក្ខជន ព្រោះនៅក្នុងពេលធ្វើបទសំភាសន៍ បេក្ខជនអាចនឹងមិនត្រូវបានសាកសួរឱ្យធ្វើការណែនាំខ្លួនជាមុននោះឡើយ។»

 យុវតី សុខ មុន្នីរតនា

ជ័យលាភីអាហារូបករណ៍រូបនេះបន្ថែមថា ថ្វីត្បិតតែការណែនាំខ្លួនខ្លីៗនេះ អាចផ្តល់ផលវិជ្ជមានដល់បេក្ខជនក៏ពិតមែន ប៉ុន្តែបេក្ខជនត្រូវផ្តោតសំខាន់លើការឆ្លើយសំណួរដែលបានសួរឱ្យបានត្រឹមត្រូវ និងត្រូវត្រៀមលើឱកាសនៃការសាកសួរពីគណៈកម្មការលើសំណួរផ្សេងៗ ដែលពុំបានផ្តល់ជូនជាមុន។ សំណួរខ្លះអាចនឹងស្ថិតក្នុងកម្រងសំណួរដែលធ្លាប់បានត្រៀមទុកដោយបេក្ខជន ប៉ុន្តែត្រូវបានលើកមកសាកសួរដោយបែបបទខុសៗគ្នា ដូចនេះភាពបត់បែនរបស់បេក្ខជនក្នុងការទាញយកចម្លើយដែលខ្លួនបានត្រៀម អាចបង្ហាញពីភាពឈ្លាសវៃ និងសក្តានុពលសំខាន់របស់បេក្ខជន ព្រមទាំងជាចំណែកដ៏សំខាន់ដែលធ្វើឱ្យបេក្ខជនអាចទទួលបានជោគជ័យក្នុងដំណាក់កាលសម្ភាសន៍នេះ ។

« បរាជ័យមិនមែនជាកត្តាកំណត់អនាគតរបស់យើងនោះឡើង តែជាកត្តាមួយដែលកំណត់ថាជោគជ័យនឹងកើតមាននាពេលបន្ទាប់»

យុវតី សុខ មុន្នីរតនា

ជារួមយុវតី សុខ មុន្នីរតនា សូមលើកទឹកចិត្តដល់និស្សិតកម្ពុជាទាំងអស់ ដែលមានបំណងក្នុងការដាក់ពាក្យស្នើសុំអាហារូបករណ៍​ Australian Awards Scholarship សូមយកចិត្តទុកដាក់បំផុតលើចំណុចសំខាន់ៗនៃដំណាក់កាលនីមួយៗខាងលើ និងព្យាយាមដុះខាត់សម្ថភាពរបស់ខ្លួនបន្ថែមដើម្បីទទួលបានជ័យលាភី និងសម្រេចក្ដីស្រមៃរបស់ខ្លួន ៕