យុវតីតំណាងកម្ពុជា៣រូប បានទទួលជ័យលាភីលេខ៣ ផ្នែក Network Track នៅក្នុងការប្រកួតប្រជែង កម្មវិធី “ប្រកួតប្រជែងពិភពលោកផ្នែកបច្ចេកវិទ្យាគមនាគមន៍ និងព័ត៌មានរបស់ក្រុមហ៊ុន Huawei ឆ្នាំ២០២៣-២០២៤ វគ្គផ្ដាច់ព្រ័ត្រ (Huawei ICT Competition Global Final 2023-2024) នៅទីក្រុង Shenzhen ប្រទេសចិន កាលពីពេលកន្លងទៅថ្មីៗនេះ។

គួររំលឹកថា កាលពីពេលកន្លងទៅ យុវតីតំណាងកម្ពុជា៣រូបនេះ ក៏បានទទួលជ័យលាភីលេខ៣ ផ្នែក Network Track នៅក្នុងការប្រកួតប្រជែងកម្មវិធី “Huawei ICT Competition 2023-2024 Regional Round” ផ្នែក Network Track នៅទីក្រុង Jakarta ប្រទេស Indonesia ផងដែរ។

កញ្ញា សេង សុមន្ថាវរិន្ទ និស្សិតឆ្នាំទី៤ ជំនាញទូរគមនាគមន៍ និងបណ្តាញ នៃវិទ្យាស្ថានបច្ចេកវិទ្យាកម្ពុជា បានប្រាប់ឱ្យដឹងថា ក្រុមរបស់ខ្លួនពិតជាមានអារម្មណ៍រីករាយ និងមានមោទនភាពដែលបានតំណាងឱ្យប្រទេសកម្ពុជាលើឆាកអន្តរជាតិ។ ទន្ទឹមគ្នានេះ ក្រុមរបស់ខ្លួនអាចមានឱកាសចូលរួមប្រកួតប្រជែងក្នុងកម្មវិធីនេះ ដើម្បីបានសាកល្បងលើសមត្ថភាពក្នុងការរៀបចំបណ្ដាញ ការកំណត់រចនាសម្ព័ន្ធបណ្តាញ ដោះស្រាយបញ្ហាបណ្ដាញ និងការគ្រប់គ្រងបណ្តាញប្រកបដោយប្រសិទ្ធភាព។

កញ្ញា សេង សុមន្ថាវរ័ត្ន និស្សិតឆ្នាំទី៤ ជំនាញទូរគមនាគមន៍ និងបណ្តាញ នៃវិទ្យាស្ថានបច្ចេកវិទ្យាកម្ពុជា បានបន្ថែមថា ចំពោះការប្រកួតមួយនេះ ក្រុមខ្លួនទទួលបានពិសោធន៍ថ្មីៗ និងចំណេះដឹងជាច្រើនទាក់ទងនឹង network និងការអនុវត្តន៍ជាក់ស្ដែងក្នុងមុខជំនាញដែលកំពុងរៀននៅសាកលវិទ្យាល័យ។ សុមន្ថាវរ័ត្ន បន្ថែមថា រូបគេក៏បានយល់ដឹងបន្ថែមពីការធ្វើការងារជាក្រុម និងមានទំនាក់ទំនងល្អជាមួយបេក្ខភាពប្រកួតពីបណ្តាប្រទេសផ្សេងៗផងដែរ។

យុវតី សឿន ឧស្សា និស្សិតឆ្នាំទី៤ ជំនាញទូរគមនាគមន៍និងបណ្តាញ នៃវិទ្យាស្ថានបច្ចេកវិទ្យាកម្ពុជា ក៏បានថ្លែងអំណរគុណដល់ក្រុមហ៊ុន HUAWEI ដែលបានបង្កើតកម្មវិធី ICT Competition នេះឡើងដែលបានផ្ដល់ឱកាសឱ្យក្រុមរបស់ខ្លួនបញ្ចេញសមត្ថភាព និងទទួលបានបទពិសោធន៍ថ្មីៗទាក់ទងនឹងផ្នែកបច្ចេកវិទ្យា network។

គួរជម្រាបជូនថា នៅក្នុងកម្មវិធីប្រគល់រង្វាន់ជូនជ័យលាភីថ្នាក់ពិភពលោក (Global Final Awards Ceremony ) ដល់បក្ខជនជ័យលាភី ក៏មានការចូលរួមពីសំណាក់ថ្នាក់ដឹកនាំក្រសួងអប់រំនៃបណ្ដាប្រទេសមួយចំនួន តំណាងអង្គការ UNESCO និងសិស្ស-និស្សិតប្រមាណជាង ១៧ម៉ឺននាក់ មកពីជាង ២ពាន់ សាកលវិទ្យាល័យនៃជាង ៨០ប្រទេសជុំវិញពិភពលោក៕