ការយល់ដឹងអំពីការគ្រប់គ្រងហិរញ្ញវត្ថុ គឺជាជំនាញជីវិតដ៏មានតម្លៃដែលកម្រត្រូវបានបញ្ចូលក្នុងកម្មវិធីសិក្សាតាមសាលារៀនទូទៅណាស់ ដែលកត្តានេះតម្រូវឱ្យឪពុកម្ដាយដើរតួនាទីយ៉ាងសំខាន់បំផុតក្នុងការបណ្ដុះផ្នត់គំនិត និងទម្លាប់គ្រប់គ្រងលុយកាក់ដល់កូនៗតាំងពីវ័យកុមារ។ ការបណ្ដុះផ្នត់គំនិតត្រឹមត្រូវលើការប្រើប្រាស់លុយកាក់តាំងពីវ័យកុមារ មិនត្រឹមតែជួយឱ្យពួកគេស្គាល់ពីតម្លៃនៃការនឿយហត់របស់អាណាព្យាបាលប៉ុណ្ណោះទេ ប៉ុន្តែថែមទាំងជាគ្រឹះយ៉ាងរឹងមាំក្នុងការកសាងវិន័យ សេចក្តីអត់ធ្មត់ និងភាពម្ចាស់ការលើការសម្រេចចិត្តផ្នែកហិរញ្ញវត្ថុនៅពេលពួកគេធំដឹងក្តី។

ខាងក្រោមនេះ គឺ ៤ ចំណុចរឿងលុយ ដែលឪពុកម្ដាយគួរអប់រំកូនៗ ៖

១. បង្រៀនឱ្យស្គាល់តម្លៃលុយ ៖ ពន្យល់កូនឱ្យយល់ថា លុយមិនមែនងាយស្រួលរកនោះទេ គឺបានមកពីកម្លាំងញើសឈាម និងការនឿយហត់។ នៅពេលក្មេងយល់ពីចំណុចនេះ ពួកគេនឹងរៀនគិតពិចារណាឱ្យបានច្បាស់លាស់មុនពេលចំណាយ មិនចាយវាយខ្ជះខ្ជាយតាមតែចិត្តចង់ និងចេះបែងចែករវាងអ្វីដែល «គួរទិញ» និង «មិនគួរទិញ»។

២. បង្កើតទម្លាប់សន្សំតាំងពីតូច ៖ បង្រៀន​កូនៗ​ឱ្យចេះសន្សំលុយតាំងពីនៅក្មេង ដូច្នេះអ្នកអាចទិញកូនជ្រូក ឬកំប៉ុងសន្សំឱ្យពួកគេ។ ឧទាហរណ៍ ប្រសិនបើឱ្យលុយទៅសាលារៀន ១០,០០០ រៀលក្នុងមួយថ្ងៃ គួរបង្រៀនឱ្យកូនដក ៣,០០០ ឬ ៤,០០០ រៀលទុកសន្សំជារៀងរាល់ថ្ងៃ ដើម្បីបណ្ដុះទម្លាប់ «សន្សំមុន ចាយតាមក្រោយ»។

៣. បែងចែករវាង «តម្រូវការ» និង «ចំណង់»៖ ឪពុកម្ដាយត្រូវជួយតម្រង់ទិសកូនៗឱ្យយល់ច្បាស់ពីភាពខុសគ្នានេះ។ លើកទឹកចិត្តឱ្យពួកគេចំណាយលើរបស់ចាំបាច់ (តម្រូវការ) ដូចជា ប៊ិច សៀវភៅ ឬសម្ភារសិក្សា ជាជាងការចំណាយលើរបស់លេងច្រើនហួសហេតុ ឬនំចំណីដែលប៉ះពាល់ដល់សុខភាព (ចំណង់)។

៤. បង្រៀនឱ្យចេះកំណត់គោលដៅហិរញ្ញវត្ថុ៖ នៅពេលកូនចង់បានរបស់អ្វីមួយ ដូចជាសៀវភៅរឿង ឬរបស់លេង ឪពុកម្ដាយមិនគួរទិញឱ្យភ្លាមៗនោះទេ។ ផ្ទុយទៅវិញ ត្រូវលើកទឹកចិត្តឱ្យពួកគេចេះកំណត់គោលដៅ និងដកលុយដែលអ្នក​ឱ្យប្រចាំថ្ងៃទៅសន្សំដោយខ្លួនឯងដើម្បីទិញវា។ វិធីសាស្ត្រនេះជួយឱ្យក្មេងរៀនចេះអត់ធ្មត់ មានវិន័យ និងមានមោទនភាពចំពោះលទ្ធផលដែលសម្រេចបាន។

ដូច្នេះការបណ្តុះបណ្តាលចំណេះដឹងហិរញ្ញវត្ថុដល់កុមារ គឺជាការវិនិយោគរយៈពេលវែងលើអនាគតរបស់ពួកគេ។ កុមារដែលទទួលបានការអប់រំពីរឿងលុយកាក់បានល្អ នឹងក្លាយជាមនុស្សពេញវ័យដែលមានឯករាជ្យភាពហិរញ្ញវត្ថុ និងចេះគ្រប់គ្រងជីវិតប្រកបដោយទំនួលខុសត្រូវខ្ពស់៕

_{Source : លុយខ្ញុំ}