ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងសារលិខិតអបអរសាទរ ថ្ងៃបើកបវេសនកាលឆ្នាំសិក្សាថ្មី ២០២៦-២០២៧ នៅថ្ងៃទី១ វិច្ឆិកា ២០២៦ សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានលើកឡើងថា រាជរដ្ឋាភិបាលនីតិកាលទី៧ នៅតែបន្តចាត់ទុកវិស័យអប់រំ និងការអភិវឌ្ឍធនធានមនុស្សជាអាទិភាពខ្ពស់បំផុត។
ក្នុងនោះរាជរដ្ឋាភិបាលនៅតែបន្តអនុវត្តវិធានការគន្លឹះក្នុងវិស័យអប់រំ ដោយផ្តោតលើការពង្រឹងគុណភាពសាលារៀនរដ្ឋ ចាប់ពីមត្តេយ្យសិក្សា ដល់មធ្យមសិក្សា តាមរយៈ ការពង្រឹងអភិបាលកិច្ចសាលារៀន, ការអនុវត្តសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបទរបស់សិស្ស, ការយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន ព្រមទាំងការជំរុញ និងលើកទឹកចិត្តឱ្យមានការចូលរួមពីមាតាបិតា អាណាព្យាបាល និងសហគមន៍ ក្នុងការអប់រំស្របតាមពាក្យស្លោក “ភាពជាដៃគូរដ្ឋ និងសហគមន៍ ដើម្បីការអប់រំ”។
ជាមួយគ្នានេះ សាលារៀនគ្រប់កម្រិតនឹងត្រូវអភិវឌ្ឍស្របតាមស្តង់ដាសាលារៀនគំរូ ដែលមានស្តង់ដាចំនួន ៥ គឺ ១. លទ្ធផលសិក្សារបស់សិស្ស, ២. ការបង្រៀន និងរៀន, ៣.ការចូលរួមរបស់សហគមន៍, ៤.ដំណើរការប្រតិបត្តិនិងរដ្ឋបាលសិក្សា និង ៥.គណនេយ្យភាពសាលារៀន។
ដើម្បីធានាឱ្យដំណើរការអប់រំក្នុងឆ្នាំសិក្សាថ្មីនេះកាន់តែមានប្រសិទ្ធភាព និងឆ្លើយតបទៅនឹងការវិវត្តនៃសង្គម-សេដ្ឋកិច្ច ប្រមុខរាជរដ្ឋាភិបាលបានដាក់ចេញនូវការណែនាំសំខាន់ៗមួយចំនួន៖
-ក្រសួងអប់រំ ត្រូវបន្តពង្រីកការចុះឈ្មោះចូលរៀននៅគ្រប់កម្រិត និងរក្សាសិស្សឱ្យបានរៀនសូត្រគង់វង្សរហូតដល់មធ្យមសិក្សា តាមរយៈការពង្រីក និងសាងសង់សាលារៀនបន្ថែម និងកែលម្អបរិយាកាសសិក្សា ពិសេសនៅក្នុងតំបន់ដែលមិនទាន់មានសេវាអប់រំ ការបង្កើតថ្នាក់រៀនបន្ថែម ការបំពាក់មន្ទីរពិសោធន៍ បណ្ណាល័យ និងហេដ្ឋារចនាសម្ព័ន្ធឌីជីថល។
-ក្រសួងអប់រំ និងក្រសួងការងារ និងបណ្តុះបណ្តាលវិជ្ជាជីវៈ ត្រូវបន្តជំរុញការអនុវត្ត “គន្លងអប់រំថ្មីនៅកម្ពុជា” ដែលរួមមាន ការផ្តល់ការប្រឹក្សា និងតម្រង់ទិសសិស្សចាប់ពីថ្នាក់ទី៧ និង ការអនុវត្តគន្លងវិជ្ជាជីវៈចាប់ពីថ្នាក់ទី១០ និងការបែងចែកគន្លងវិទ្យាសាស្រ្ត និងគន្លងសង្គម នៅថ្នាក់ទី១១ ក្នុងគោលដៅផ្តល់នូវការសិក្សាដែលសមស្រប និងសមត្ថភាពរបស់សិស្ស និងការត្រៀមខ្លួនសម្រាប់អនាគត។
-ក្រសួងអប់រំ ត្រូវបន្តធ្វើទំនើបកម្មសៀវភៅសិក្សា ចាប់ពីបឋមសិក្សា ដល់មធ្យមសិក្សា ដើម្បីពង្រឹងការយល់ដឹងអំពីបញ្ញត្តិ ការអនុវត្តចំណេះដឹង ការត្រិះរិះពិចារណា ការដោះស្រាយបញ្ហា ហេតុផល វិទ្យាសាស្រ្ត និងសមត្ថភាពសកល រួមជាមួយនឹងការពង្រឹងគ្រឹះរឹងមាំឆ្ពោះទៅក្របខណ្ឌសមត្ថភាពសកល។
-ក្រសួងត្រូវបន្តកែទម្រង់ការអប់រំគ្រូបង្រៀន និងពង្រឹងគុណភាពគ្រូបង្រៀន ដោយធ្វើឱ្យប្រសើរឡើងនូវគុណវុឌ្ឍិ និងគរុកោសល្យរបស់គ្រូបង្រៀន ដោយបន្តជ្រើសរើសបេក្ខជនដែលមានសមត្ថភាពខ្ពស់សម្រាប់វិជ្ជាជីវៈបង្រៀន។ ជាមួយគ្នាគ្រូបង្រៀននៅកម្ពុជា ក៏ត្រូវបំពាក់បំប៉នដោយជំនាញភាសាបរទេស ជំនាញបច្ចេកវិទ្យាព័ត៌មាន និងទំនាក់ទំនង (ICT) ជំនាញឌីជីថល ជំនាញស្រាវជ្រាវ និងសមត្ថភាពបញ្ញាសិប្បនិម្មិត (AI) ដើម្បីប្រើប្រាស់ក្នុងការបង្រៀន និងការរៀនសូត្របែបទំនើប។
-ក្រសួងត្រូវបន្តលើកកម្ពស់ការអប់រំឌីជីថល តាមរយៈការកែលម្អវេទិកាឌីជីថល និងបង្កើតមជ្ឈមណ្ឌលអប់រំឌីជីថល ការផលិតវីដេអូបង្រៀនមុខវិជ្ជាគោល និងសម្រាប់ថ្នាក់ប្រឡង ការបញ្ចូលបច្ចេកវិទ្យាឌីជីថលទៅក្នុងការរៀន និងបង្រៀន ការបង្កើតកម្មវិធីអប់រំឌីជីថល ឆ្លើយតបនឹងតម្រូវការទីផ្សារការងារ ការអភិវឌ្ឍសង្គម សេដ្ឋកិច្ចជាតិ បរិវត្តកម្មបច្ចេកវិទ្យា ការផ្លាស់ប្តូរនិម្មាបនកម្មសកល ក្នុងគោលដៅកសាងពលរដ្ឋឌីជីថល និងបង្កើនសមត្ថភាពសិស្ស និស្សិតលើវិស័យឌីជីថល។
-គ្រឹះស្ថានគ្រប់កម្រិត ត្រូវបន្តយកចិត្តទុកដាក់លើកកម្ពស់អនាម័យ សុខភាព សុវត្ថិភាព និងបរិស្ថានសិក្សាប្រកបដោយភាពស្អាត បៃតង និងមានអនាម័យល្អ តាមរយៈការពង្រឹងការអប់រំសុខភាព ការរៀបចំបន្ទប់សុខភាពតាមស្តង់ដា ការធានាបាននូវសុវត្ថិភាពចំណីអាហារ និងអាហារូបត្ថម្ភ ព្រមទាំងការគ្រប់គ្រងសំរាម និងបរិស្ថានសាលារៀនឱ្យបានល្អប្រសើរ។
-មាតាបិតា និងអាណាព្យាបាលគ្រប់រូប សូមយកចិត្តទុកដាក់ជំរុញ និងគាំទ្រកូនចៅឱ្យចុះឈ្មោះចូលរៀនជាប្រចាំ ព្រមទាំងចូលរួមតាមដានការសិក្សា អត្តចរិត សីលធម៌ សុជីវធម៌ និងឥរិយាបថរបស់កូនចៅ ទាំងក្នុងគ្រួសារ និងសហគមន៍។ ទន្ទឹមនេះ សូមបង្កើតបរិយាកាសសិក្សាល្អនៅក្នុងគ្រួសារ ជួយកូនចៅរៀនសូត្របន្ថែមនៅផ្ទះ និងលើកទឹកចិត្តឱ្យមានទម្លាប់អានសៀវភៅជាប្រចាំ ដោយចំណាយពេលអាន និងពិភាក្សាជាមួយកូនចៅ ដើម្បីពង្រឹងចំណេះដឹង ជំនាញគិត និងទម្លាប់សិក្សាដោយខ្លួនឯង។ ក្នុងបរិបទឌីជីថល សូមចូលរួមណែនាំ និងតាមដានការប្រើប្រាស់បច្ចេកវិទ្យា និងបណ្តាញសង្គមរបស់កូនចៅឱ្យបានសមស្រប មានសុវត្ថិភាព និងផ្តល់ប្រយោជន៍ដល់ការសិក្សា និងការអភិវឌ្ឍ។
ជាមួយគ្នានេះ សម្រាប់បវេសនកាលឆ្នាំសិក្សាថ្មី សម្តេចធិបតី បានសំណូមពរដល់ក្មួយៗសិស្សានុសិស្ស យុវជន និងយុវនារីទាំងអស់ បន្តខិតខំរៀនសូត្រ ស្រាវជ្រាវ និងអភិវឌ្ឍខ្លួនជាប្រចាំ ដោយផ្តោតលើការអភិវឌ្ឍវិជ្ជាសម្បទា បំណិនសម្បទា កាយសម្បទា និងចរិយាសម្បទា ដើម្បីក្លាយជាមូលធនមនុស្សប្រកបដោយសមត្ថភាព និងទំនួលខុសត្រូវ៕
