ស្របពេលនឹងការទន្ទឹងចង់បាន ភាពរីកចម្រើន ឬការសម្រេចបាននូវគោលដៅ ជាដំបូងគេក្រឡេកទៅមើលទម្លាប់ និងសកម្មភាពប្រចាំថ្ងៃ ព្រោះការធ្វើសកម្មភាពដែលត្រឹមត្រូវ ឆ្លើយតបនឹងគោលដៅ ជាការបើកផ្លូវឱ្យខ្លួនឯងមានការវិវឌ្ឍន៍ឆ្ពោះទៅមុខលឿន មិនតែប៉ុណ្ណោះ គឺទាមទារនូវការឆ្លុះបញ្ចាំងដ៏សមហេតុផល និងការប្តេជ្ញាអនុវត្តន៍នូវវិធីចម្រុះគ្នាជាច្រើន។ តាមរយៈគេហទំព័រ Yurk counseling បានបង្ហាញគន្លឹះ១០ចំណុច ដើម្បីជំរុញខ្លួនឯងឱ្យបន្តអភិវឌ្ឍន៍សមត្ថភាព និងបញ្ញាស្មារតីឱ្យបន្តឆ្ពោះទៅមុខជានិច្ច។

 ១. កុំអនុញ្ញាតិឱ្យគំនិតអ្នកដទៃគ្រប់គ្រងរបត់ជីវិតខ្លួនឯង ៖ កាលដែលមិនទុកគំនិតអ្នកដទៃជាធំ មិនមែនមានន័យថា មតិយោបល់ឬគំនិតទាំងនោះមិនល្អ ឬមិនសំខាន់នោះទេ ប៉ុន្តែការគិតបែបណាចំពោះខ្លួនគឺជារឿងដែលគួរយកចិត្តទុកដាក់ ឬក៏ផ្តល់អាទិភាពជាមុន មនុស្សដែលមានជំនាញត្រួសត្រាយផ្លូវ ចំពោះដំណើរ នៃការរស់នៅនៃខ្លួនឯង គឺមានតែខ្លួនឯងម្នាក់ប៉ុណ្ណោះ។ ដូច្នេះ ពេល សម្រេសចិត្ត ទទួលយក ឬក៏ធ្វើអ្វីមួយត្រូ​វតែប្រាកដថា គឺជាចំណែកល្អសម្រាប់ខ្លួនឯង និងសមស្របជាមួយនឹងស្ថានភាពជាក់ស្ដែង។ ការប្រព្រឹត្ត ឬជ្រើសយកអ្វីមួយ មិនចាំបាច់ទាល់តែអ្នកដទៃមើលមកថាល្អទើបយល់ថាល្អដែរនោះទេ ធ្វើដោយផ្អែកតាមតម្រូវការ និងស្ថានភាពជាក់ស្ដែង។  

២. កុំបារម្ភចំពោះកំហុសដែលកើតមានពីអតីតកាល ៖ កាលដែលនៅតែមន្ទិលសង្ស័យអំពីអតីតកាល ជាពិសេសការគិតកំហុសដែលកើតមាន នាពេលកន្លងមកច្រើនពេក ហាក់ពុំនាំនូវផលប្រយោជន៍នោះទេ កាលដែលមានរឿងមិនល្អពីមុនៗ ក៏មិនបានកំណត់ថា ជីវិតនៅពេលខាងមុខនឹងត្រូវរស់ជាមួយភាពអាប់អ៊ូនោះដែរ គួររំលឹកខ្លួនឯងថា អតីតកាលទុកសម្រាប់រៀនសូត្រ អ្វីដែលសំខាន់នោះគឺយកចិត្តទុកដាក់ចំពោះបច្ចុប្បន្នភាព។

៣. ស្វែងយល់ឱ្យច្បាស់ពីអ្វីដែលខ្លួនចង់បាន ៖ ដើម្បីរស់តាមរបៀបដែលខ្លួនប្រាថ្នាបាន ជាដំបូងត្រូវដឹងអំពី អ្វីទៅដែលយើងចង់បាន ដោយហេតុថា ការដឹងអំពីអ្វីដែលត្រូវការ គឺជាកត្តានាំឱ្យប្រើប្រាស់សក្ដានុពលបានច្រើនជាងកាលដែលទៅធ្វើសកម្មភាពណាមួយដែលមិនស្របនឹងចំណូលចិត្ត។ ជំរុញខ្លួនឯងឱ្យឆ្ពោះទៅមុខបាន ជាដំបូងត្រូវស្គាល់ចំណង់ នៃខ្លួនឯង។

៤. កុំពន្យារពេលក្នុងការសម្រេចគោលដៅសំខាន់ៗ ៖ ដំណើរនៃការរស់នៅ តែងមានជម្រើសពីរឱ្យជ្រើសរើស ទីមួយរស់តាមដំណើរដែលបានកំណត់ ហើយទីពីរគឺរស់ដោយមានទំនួលខុសត្រូវខ្ពស់និងមោះមុតក្នុងការផ្លាស់ប្តូរ។ ប្រសិនបើពន្យារពេលក្នុងការចាប់ផ្តើម នោះផ្លែផ្កាក៏នឹងរសាយតិចទៅៗ។ ​

៥. កាត់ចោលរឿងដែលមិនចាំបាច់ ៖ មានរឿងជាច្រើនកើតឡើងចំពោះដំណើរ នៃការរស់នៅប្រចាំថ្ងៃ ហើយមិនមែនគ្រប់រឿងដែលបានកើតមានសុទ្ធតែត្រូវទទួល និងដោះស្រាយទាំងអស់នោះទេ។ ដូច្នេះត្រូវមានសមត្ថភាពក្នុងការសម្រេចចិត្តបោះចោលអ្វីដែលគ្មានប្រយោជន៍ ហើយការមិនទទួលយកកិច្ចការខ្លះ គឺជាឱកាសនាំអ្នកឱ្យទទួលបានជម្រើសមួយដែលសមស្របនឹងអ្វីដែលខ្លួនឯងត្រូវការ។

៦. មិនបាច់ស្របតាមភាពត្រឹមត្រូវរហូតទេ ៖ ការកំណត់គោលដៅគឺជាការរឹតបន្តឹងខ្លួនឯង ឱ្យធ្វើរឿងដែលត្រឹមត្រូវ ការដាក់វិន័យ និងការប្រត្តិបត្តិខ្ជាប់ខ្ចួនសម្រួចតាមគោលដៅ។ ប៉ុន្តែការទុកចន្លោះឱ្យដើរខុសផែនការ ខុសក្បួនខ្លះ គឺជាដើមចមជួយឱ្យទទួលបាននូវឱកាសថ្មីៗ រៀនសូត្រមេរៀនថ្មីៗ និងពង្រឹងជំនាញបត់បែនបន្ថែម។

៧​. កុំគេចពីបញ្ហាដែលត្រូវដោះស្រាយ ៖ មានបញ្ហាកើតឡើង ចាំបាច់ត្រូវប្រឈមមុខដោះស្រាយឱ្យខានតែបាន ប្រសិនបើបន្តទុកបញ្ហាចោល ប្រៀបបាននឹងស្រមោលតាមលងបន្លាចជានិច្ច ហើយបញ្ហានឹងអាចរីកសាយទៅៗ ក្លាយជាបញ្ហាធំ ដែលទាមទារឱ្យរកដំណោះស្រាយពី តូចៗ ទៅ។ ការដោះស្រាយបញ្ហា តាមរយៈបន្តទំនាក់ទំនង មានសេចក្ដីអរគុណចំពោះអ្វីៗ ដែលបានកើតឡើង និងយកចិតទុកដាក់ចំពោះមនុស្សដែលសមនឹងចំណាយពេលជាមួយ។ ចំណុចទាំងនេះហើយសុទ្ធសឹងតែជាការរួមចំណែកក្នុងការដោះស្រាយបញ្ហា និងជំរុញខ្លួនឯងឱ្យបន្តឆ្ពោះទៅមុខ ពីមួយជំហានទៅមួយជំហាន។

៨. មានទម្លាប់ហានសម្រេចចិត្តជាងរកលេសដោះសា ៖ ប្រសិនបើស្ថិតក្នុងស្ថានភាពមួយតម្រូវឱ្យមានការជ្រើសរើស សូមកុំរារែក ឬព្យាយាមរកលេសដោះសា ចំពោះហេតុការណ៍ដែលបានកើតឡើង ជំនួសមកវិញនូវវការរិះគិត និងសម្រេចចិត្តឱ្យច្បាស់ៗ។ លទ្ធផលក្រោយការសម្រេចចិត្តមិនមែនសុទ្ធតែទទួលបាននូវផលវិជ្ជមានរហូតនោះទេ ប៉ុន្តែយ៉ាងហោចណាស់ គឺបានគិតគួរពីវាឱ្យអស់លទ្ធភាព។

៩. ព្យាយាមរឭករឿងវិជ្ជមានក្នុងជីវិតឱ្យបានច្រើន ៖ ត្បិតថាការរស់នៅសុខនិងទុក្ខ កើតឡើងចំពោះមនុស្សគ្រប់គ្នាក៏ពិតមែន តែក៏បង្ហាញឱ្យឃើញថា ក្នុងនាមជាមនុស្សយើងប្រាកដជាប្រទះ នូវរឿងរ៉ាវដែលយើងពេញចិត្តខ្លះដែរ ទោះបីជាមិនទាន់ឈានទៅសម្រេចក្ដីប្រាថ្នាក៏ដោយ ហេតុអ្វីយើងមិនរៀនពេញចិត្តចំពោះបច្ចុប្បន្នភាព ឬរីករាយនឹងអ្វីដែលយើងពេញចិត្ត។

១០. មោទនភាពចំពោះបច្ចុប្បន្នភាព ៖ មិនថាស្ថិតក្នុងស្ថានភាពដែលមានចំណង់ជំរុញខ្លួនឯងឱ្យឆ្ពោះទៅមុខខ្លាំងប៉ុន្មាននោះទេ ចំណែកសំខាន់ដែលមិនគួរមើលរំលងគឺ ការផ្តល់តម្លៃនិងមានមោទនភាពចំពោះពេលឥឡូវនេះតែម្តង។ ក្នុងកាលៈទេសៈមួយចំនួន មនុស្សគិតអំពីការធ្វើឱ្យខ្លួនឯងប្រសើរ ឆ្តោះទៅមុខ ជារួមគឺគិតតែពីសមិទ្ធិផលធំៗ ហើយភ្លេចរីករាយនឹងដំណើរជីវិតប្រចាំថ្ងៃ។ ចាប់ផ្តើមសញ្ជឹងគិត ថា តើថ្ងៃនេះ អ្វីដែលអាចធ្វើឱ្យអ្នកមានភាពរីករាយខ្លះ? ចាកចេញពីការជាប់គាំង ជំនួសមកវិញនូវការសាកល្បងរឿងរ៉ាវថ្មីៗ រួមទាំងរីករាយនឹងរបៀបរស់នៅប្រចាំថ្ងៃ៕