ភ្នំពេញ – «ប្រសិនជាយើងគិតថាខ្លួនឯងមានពិការភាព ហើយមិនខិតខំ​ប្រឹងរៀន មិនចូលរួមក្នុងកម្មវិធីដែលផ្ដល់នូវចំណេះដឹង នោះយើងនឹងមិនមានភាពលេចធ្លោរ ឬរស់នៅក្នុងសង្គមមួយល្អប្រសើរបានទេ។ ពិការភាពមិនមែនជាឧបសគ្គក្នុងការសម្រេចលទ្ធផលជោគជ័យឡើយ អ្វីដែលសំខាន់យើងត្រូវពង្រឹងភាពក្លាហាន និងជំនឿជាក់លើខ្លួនឯង»។ នេះជាការលើកឡើងរបស់ កញ្ញា ផូ ម៉ារី និស្សិតសាកលវិទ្យាល័យស្វាយរៀង និងជាក្រុមជ័យលាភីលេខ១ ក្នុងកម្មវិធីប្រកួតវោហារស័ព្ទ ប្រធានបទ “ការលុបបំបាត់ការប្រើប្រាស់បារីអេឡិចត្រូនិក និងផលិតផលអេចឈិ៍ធីភី ដើម្បីលើកកម្ពស់សិក្សា” ដែលរៀបចំដោយក្រសួងអប់រំ យុវជន និងកីឡា កន្លងទៅថ្មីៗនេះ។

កញ្ញា ផូ ម៉ារី ឱ្យដឹងថា ការសម្រេចចិត្តចូលរួមកម្មវិធីប្រកួតវោហារស័ព្ទនេះ ព្រោះមើលឃើញថា យុវជនមួយចំនួនបានប្រើប្រាស់បារីអេឡិចត្រូនិច និងផលិតលិតផលអេចឈ៍ធីភី ដោយយល់ច្រឡំថា ជាផលិតផលផ្ដាច់បារី មានការប្រើប្រាស់ច្រើន។ លើសពីនេះ ក្មេងជាច្រើនបានទិញបារីអេឡិចត្រូនិចនេះ ដោយសារភាពទាក់ទាញរបស់ផលិតផល ធ្វើឱ្យក្រុមយុវវ័យគិតថានៅពេលប្រើប្រាស់នឹងធ្វើឱ្យឡូយឆាយ ។

“ខ្ញុំចូលរួមកម្មវិធីនេះ ព្រោះចង់ប្រើប្រាស់សំឡេងរបស់ខ្ញុំ ព្រមទាំងស្រាវជ្រាវថាវាជាផលិតផលដែលផ្ដល់ផលប៉ះពាល់ដល់សុខភាព មិនត្រឹមតែប៉ះពាស់ដល់អ្នកប្រើប្រាស់ផ្ទាល់ សូម្បីតែអ្នកស្រូបផ្សែងពីគេក៏ប៉ះពាល់ដល់សុខភាព និងប៉ះពាល់ដល់បរិស្ថានផងដែរ”

កញ្ញា ផូ ម៉ារី ជាក្រុមជ័យលាភីលេខ១ ក្នុងកម្មវិធីប្រកួតវោហារស័ព្ទ ។

យុវតីមកពីខេត្តស្វាយរៀងរូបនេះ និយាយដោយទឹកមុខរីករាយថា ក្រុមរបស់ខ្លួនមានក្ដីរំពឹងទុកជាមុនថានឹងយកជ័យលាភីលេខ១ឱ្យបាន ព្រោះយល់ថា ការសាមគ្គីគ្នាតែងនាំមកនូវភាពជោគជ័យ។ ជាពិសេស សមាជិកក្រុមបានរួមសហការគ្នា ហាត់សមនិយាយ សរសេរអត្ថបទ សម្ភាសន៍ ស្រាវជ្រាវរកព័ត៌មានផ្សេងៗ និងបានបញ្ចេញអស់ពីសមត្ថភាព។

ទោះបីកំពុងអង្គុយនៅលើរទេះរុញក៏ពិតមែន ប៉ុន្តែកញ្ញា ផូ ម៉ារី ហាក់មានក្ដីសង្ឃឹម និងភាពក្លាហានប្រកបដោយចំណេះដឹង ហើយក៏បានលើកទឹកចិត្តដល់ជនដែលមានពិការភាពទូទាំងប្រទេសកម្ពុជា ត្រូវមានភាពក្លាហាន ខិតខំរៀន ។ ក្នុងនោះ មារី ក៏សំណូមពរដល់ឪពុកម្ដាយ ឬអាណាព្យាបាលដែលមានកូនចៅមានពិការភាព ត្រូវផ្ដល់ឱកាសឱ្យកូនបានសិក្សារៀនសូត្រពង្រឹងសមត្ថភាពខ្លួន ជាពិសេសសូមជួយអ្នកដែលមានពិការភាពឱ្យមានភាពក្លាហាន និងចូលរួមក្នុងកម្មវិធីសង្គមនានាឱ្យបានច្រើន។

គួរ​បញ្ជាក់ថា កម្មវិធីប្រកួតវោហារស័ព្ទ ក្រោម​ប្រធានបទ “ការលុបបំបាត់ការប្រើប្រាស់បារីអេឡិចត្រូនិក និងផលិតផលអេចឈិ៍ធីភី ដើម្បីលើកកម្ពស់សិក្សា” បានឈាន​ដល់ក្នុងវគ្គផ្ដាច់ព្រ័ត្រកាលពីពេលថ្មីនេះ ដោយ​គណៈកម្មការបានរកឃើញ​ម្ចាស់ជ័យលាភីឆ្នើមចំនួន៣ក្រុម ក្នុងនោះ​ជ័យលាភីលេខ១ បានទៅលើ សាកលវិទ្យាល័យស្វាយរៀង, ជ័យលាភីលេខ២ បានទៅលើសាលារៀនអន្តរទ្វីបអាមេរិកកាំង និងជ័យលាភីលេខ៣ បានទៅលើបេក្ខជនមកពីក្រុមអមរា៕