ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជិះកង់ជាលំហាត់មួយពង្រឹងសុខភាពទាំងចិត្ត និងកាយ និងផ្តល់នូវបទពិសោធន៍មិននឿយណាយ រួមទាំងជាសកម្មភាពផ្សងព្រេងដ៏រីករាយ។ ប៉ុន្តែមិនមែនមនុស្សគ្រប់គ្នាសុទ្ធតែចេះជិះកង់ និងចាប់អារម្មណ៍អំពីបច្ចេកទេសសំខាន់ៗមុនពេលចាប់ផ្តើមនោះទេ។ គេហទំព័រ HDOR បានបង្ហាញគន្លឹះមូលដ្ឋានគ្រឹះប្រាំពីរចំណុច ដើម្បីបន្ស៊ាំខ្លួនជាមួយនឹងការជិះកង់ ដោយរៀបរាប់លម្អិតជូនដូចខាងក្រោម។
១. ជ្រើសកង់ដែលសាកសម ឬត្រឹមត្រូវ ៖ ការជ្រើសប្រភេទកង់គឺជាជំហានទីមួយដែលត្រូវគិតគួរ និងអនុវត្តមុនគេ ហើយដើម្បីជ្រើសកង់មួយដែលសាកសមទៅបាន ចាំបាច់ត្រូវដឹងពីប្រភេទទីតាំងដែលត្រូវជិះ ថា តើជាប្រភេទផ្លូវធម្មតា ភ្នំ ឬវាលស្រែ ។ បន្ថែមពីនោះ ក៏ត្រូវដឹងអំពីកម្រិតថវិកាដែលខ្លួននឹងត្រូវចំណាយចំពោះការទិញកង់ផងដែរ ដើម្បីជាថ្នាលក្នុងការសម្រេចចិត្តឱ្យបានប្រសើរ ឬក៏ទៅហាងលក់កង់សុំដំបូន្មានពីអ្នកលក់ផ្ទាល់ មួយវិញទៀតអាចទៅសុំយោបល់ពីមនុស្សស្គាល់គ្នាដែលមានបទពិសោធន៍ស្រាប់ៗតែម្តង។
២. ជ្រើសសម្ភារៈដែលជួយរក្សាសុវត្ថិភាព ៖ ដើម្បីធានាឱ្យបាននូវសុវត្ថិភាពខ្ពស់កំឡុងពេលជិះកង់ គួរជ្រើសរើសឧបករណ៍មួយចំនួនដែលអាចជួយសម្រួលឱ្យការជិះកងកាន់តែមានសុវត្ថិភាពមុនពេលចេញដំណើរ គឺជាចំណែកមួយចំបាច់ក្នុងចំណោមមូដ្ឋានគ្រឹះសំខាន់ៗឯទៀត ដែលមានដូចជា មួកសុវត្ថិភាព សម្លៀកបំពាក់កីឡា ស្បែកជើងជិះកង់ ស្រោមដៃ និងវ៉ែនតាការពារពន្លឺជាដើម។ ចំណែកឯឧបករណ៍បំពាក់នឹងកង់វិញមានដូចជា ភ្លើងពន្លឺជាសញ្ញាបង្ហាញ ឬកញ្ចក់ឆ្លុះមើលទៅក្រោយ និងកណ្ដឹងកង់ដើម្បីងាយស្រួលក្នុងការផ្តល់ជាសញ្ញា។
៣. ផ្តើមដោយសន្សឹមៗ និងកំណត់គោលដៅ ៖ ដំបូងៗ ត្រូវស្ទង់ប្រមាណអំពីកម្លាំងខ្លួនឯងជាមុនសិន ហើយការចាប់ផ្តើមគួរតែធ្វើឡើងក្នុងរយៈពេលខ្លីៗ ឬចម្ងាយខ្លីៗ ។ ចំណែកឯជំហានបន្ទាប់ គឺកំណត់គោលដៅមួយដែលមានភាពជាក់លាក់ រួមទាំងតាមដានផ្ទៀងផ្ទាត់ជាប្រចាំអំពីការវិវឌ្ឍន៍ដើម្បីជាការលើកទឹកចិត្ត និងជំរុញចិត្តក្នុងការអនុវត្តបន្តទៅមុខ។
៤. ដឹងអំពីបច្ចេកទេសជិះកង់ ៖ ដើម្បីរក្សាលំហាត់ប្រាណដោយការជិះកង់ ឱ្យកាន់តែមានប្រសិទ្ធភាព និងភាពយូរអង្វែង គឺត្រូវដឹងអំពីបច្ចេកទេសខ្លះៗ ដូចជារក្សាស្មាឱ្យត្រង់កំឡុងពេលជិះកង់ សម្រួលសាច់ដុំស្មា ចំណែកឯដៃដែលកាន់ចង្កូតកង់វិញត្រូវកោងបន្តិច រួមទាំងបច្ចេកទេសដទៃទៀតមិនថាល្បឿន ឬក៏ឥរិយាបថនោះទេត្រូវសិក្សាជាមុនសិនសឹមអនុវត្តន៍តាមក្រោយ ដើម្បីរក្សាសុវត្ថិភាពផង ក៏ដូចជានិរន្តភាពផង។
៥. ពង្រឹងភាពអំណត់ ៖ ដើម្បីបន្សាំ ឬក៏ពង្រឹងក្ដីអំណត់ក្នុងការរក្សាទម្លាប់ហាត់ប្រាណដោយការជិះកង់បានទៀងទាត់ប្រចាំថ្ងៃ គួរតែពង្រីកចម្ងាយ ល្បឿន ឬក៏រយៈពេលនៃការជិះកង់បន្តិចម្តងៗ ដែលធ្វើយ៉ាងណាត្រូវតែមានការអភិវឌ្ឍ ច្រើនទៅៗ ពីមួយពេលទៅមួយពេល។
៦. បរិភោគអាហារមានជីវជាតិ និងពិសាទឹកឱ្យច្រើន ៖ ដើម្បីសម្រេចគោលដៅនៃការរក្សាទម្លាប់ជិះកង់ឱ្យបានទៀងទាត់ ការយកចិត្តទុកដាក់ចំពោះអាហារដែលមានបញ្ចូលគ្រប់ជីវជាតិ និងការបរិភោគទឹកឱ្យបានគ្រប់គ្រាន់ គឺជាការរួមចំណែកយ៉ាងសំខាន់ក្នុងការបង្កើននូវថាមពលបន្ថែម ព្រមទាំងជួយថែទាំសុខភាពទូទៅផងដែរ។
៧. សម្រាក និងប្រមូលកម្លាំងឡើងវិញ ៖ ការជិះកង់ គឺជាការប្រើប្រាស់ថាមពលជាច្រើនមិនចាញ់ប្រភេទលំហាត់ប្រាណដទៃទៀតឡើយ។ ដូច្នេះរាងកាយត្រូវការសម្រាកជាប្រចាំដើម្បីទទួលបានថាមពលបន្តទៅមុខទៀត។ ទន្ទឹមគ្នានោះ ការកំណត់ពេលគេងឱ្យបានគ្រប់គ្រាន់ សុទ្ធសឹងតែជាចំណែកស្រូបបាននូវថាមពល ក្នុងការរក្សាផែនការជិះកង់ក្នុងរយៈពេលវែង៕
