ភ្នំពេញ- កម្មវិធីអាហារូបករណ៍ ស សុខា បានប្រកាស​ផ្ដល់ជូនអាហារូបករណ៍សិក្សាថ្នាក់បរិញ្ញាបត្រចំនួន១០កន្លែងនៅសាកលវិទ្យាល័យភូមិន្ទភ្នំពេញឆ្នាំសិក្សា២០២២-២០២៣ ។

ជំនាញដែលអាហារូបករណ៍ផ្ដល់ជូនរួមមាន ទស្សនវិជ្ជា(វេនរសៀល) សង្គមវិទ្យា សង្គមកិច្ចវិទ្យា ភាសាវិទ្យា ប្រព័ន្ធផ្សព្វផ្សាយនិងសារគមនាគមន៍ ជីវវិទ្យា(វេនយប់) អភិវឌ្ឍន៍សេដ្ឋកិច្ច គ្រប់គ្រងនិងអភិវឌ្ឍន៍ធនធានធម្មជាតិ អភិវឌ្ឍន៍សហគមន៍ ITE, Telecom, អប់រំពេញមួយជីវិត សិក្សាអប់រំ គ្រប់គ្រងនិងអភិវឌ្ឍន៍ឧត្ដមសិក្សា ភាសាអង់គ្លេស ភាសាបារាំង ភាសាជប៉ុន ភាសាចិន ភាសាកូរ៉េ និងភាសាថៃ ។ ដោយវេនសិក្សាត្រូវតាមការកំណត់របស់សាកលវិទ្យាល័យ និងតម្រូវឱ្យបង់ថ្លៃរដ្ឋបាលដោយខ្លួនឯងសម្រាប់ឆ្នាំសិក្សានីមួយៗ ។

អាហារូបករណ៍ផ្ដល់ជូនសម្រាប់សិស្ស-និស្សិតទូទាំងប្រទេស ជាបុគ្គលដែលធ្លាប់បានចូលរួមសកម្មភាពការងារសង្គម ឬមានជីវភាពខ្វះខាត  (ត្រូវភ្ជាប់ជាមួយលិខិតបញ្ជាក់ថា បានចូលរួមសកម្មភាពការងារសង្គម ឬលិខិតបញ្ជាក់ភាពក្រីក្រចេញដោយអាជ្ញាធរ) សិស្ស-និស្សិតត្រូវបំពេញពាក្យស្នើសុំប្រវត្តិរូបសង្ខេប សលាកប័ត្រឯកត្តជន(មានគំនូរ) និងបំពេញកិច្ចសន្យាខិតខំរៀនសូត្រ ដោយគោរពតាមវិធានបទបញ្ជាផ្ទៃក្នុងរបស់ក្រុមការងារ និងត្រូវមានសញ្ញាបត្រមធ្យមសិក្សាទុតិយភូមិ ឬសញ្ញាបត្រដែលមានតម្លៃសមមូល ។ ជាមួយគ្នានេះ បេក្ខជនដែលមកពីខេត្តព្រៃវែង ខេត្តបាត់ដំបង និងខេត្តបន្ទាយមានជ័យ នឹងមានអាទិភាពក្នុងការទទួលបានអាហារូបករណ៍ ។

បេក្ខជនដែលមានចំណាប់អារម្មណ៍ក្នុងការដាក់ពាក្យសូមធ្វើការស្នើសុំពាក្យអាហារូបករណ៍តាមរយៈ ការដាក់ពាក្យផ្ទាល់នៅទីស្នាក់ការអាហារូបករណ៍ ស សុខា ដែលមានអាសយដ្ឋានផ្ទះលេខ៤៤ ផ្លូវលេខ៤៣២ សង្កាត់ទួលទំពូងទី១ ខណ្ឌចំការមន រាជធានីភ្នំពេញ(បណ្ណាគារកម្ពុជា) ដោយលេខទំនាក់ទំនង ០៩៦ ៨៦៩ ៦៦៦៥ ។ ជម្រើសទី២ អាចបំពេញពាក្យស្នើសុំ និងភ្ជាប់ជាមួយនឹងឯកសារ រួច Scan ឬថត(ថតឱ្យបានច្បាស់ល្អ) ហើយផ្ញើចូល Page ។

ជម្រើសទី៣ តាមរយៈ Telegram របស់ក្រុមការងារអាហារូបករណ៍ ស សុខា ដោយបំពេញពាក្យស្នើសុំ និងភ្ជាប់ជាមួយឯកសារ រួចScan ឬថត(ថតឱ្យបានច្បាស់ល្អ) ហើយផ្ញើទៅកាន់តេឡេក្រាមក្រុមការងារតាមរយៈលោក រ៉ាត់ រ៉ាទី ០៩៦ ៨៦៩ ៦៦៦៥, កញ្ញា លី សុគន្ធា ០១៧ ៦៨៤ ៨៨១, និងលោក ម៉ៅ រិទ្ធច័ន្ធសំណាង ០៩៦ ៥៩១ ៦៩៤២ និងលេខទំនាក់ទំនងជាមួយគ្រឹះស្ថានសិក្សាអំពីជំនាញសិក្សា និងព័ត៌មានទូទៅ ០១២ ២១៣ ៤៣៣ ។ ក្នុងករណីនិស្សិតស្នើសុំពាក្យអាហារូបរកណ៍នៅវិទ្យាស្ថានភាសាបរទេស សិស្ស-និស្សិតត្រូវប្រលងជាប់ជាមុនសិន រួចអាចជូនដំណឹងទៅកាន់ក្រុមការងារអាហារូបករណ៍ ។

ចាប់ផ្ដើមទទួលពាក្យស្នើសុំអាហារូបករណ៍ពីថ្ងៃផ្សាយដំណឹងនេះរហូតដល់ថ្ងៃទី១៨ ខែមករា ឆ្នាំ២០២៣ ៕