ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រ ជូននិស្សិតសាកលវិទ្យាល័យវេស្ទើន នៅព្រឹកថ្ងៃព្រហស្បត្តិ៍នេះ (២៦ មករា) សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានធ្វើការអំពាវនាវដល់គ្រប់សាកលវិទ្យាល័យទាំងអស់ ជំរុញការយកចិត្តទុកដាក់ទៅលើការពង្រឹងគុណភាព នៃការអប់រំ។
សម្តេចតេជោមានប្រសាសន៍ថា ការអភិវឌ្ឍរបស់យើងមិនបានលឿន គឺនៅត្រង់ថា ធនធានមនុស្សរបស់យើងនៅមានកម្រិត ខណៈអ្នកវិនិយោគជាទូទៅគេតែងមើលទៅលើធនធានមនុស្សជាមុន។
បើតាមប្រសាសន៍របស់សម្តេចនាយករដ្ឋមន្រ្តី បច្ចុប្បន្នប្រទេសកម្ពុជាមានយុវជនច្រើន ក៏ប៉ុន្តែការបណ្តុះបណ្តាលធនធានមនុស្សដើម្បីតម្រូវការ នៃរោងចក្រ សហគ្រាស និងបណ្តាក្រុមហ៊ុននានាដែលមកវិនិយោគនៅកម្ពុជា ពិតជានៅមានកម្រិតនៅឡើយ។
“…ខ្ញុំសូមអំពាវនាវទាំងគ្រឹះស្ថានរដ្ឋ គ្រឹះស្ថានឯកជន ខិតខំពង្រឹងគុណភាព នៃការបណ្តុះបណ្តាល, យើងមិនមែនគ្រាន់តែបណ្តុះបណ្តាលដើម្បីពាក់មួកមកទទួលសញ្ញាបត្រ ឬកាន់សញ្ញាបត្រដើរទៅទេ.. យើងត្រូវប្រឹងប្រែងធ្វើម៉េចឱ្យចំណេះវិជ្ជាមានពិតប្រាកដស្របជាមួយនឹងឯកសណ្ឋានដែលយើងពាក់ “
សម្តេចតេជោលើកឡើងថា នៅក្នុងមួយឆ្នាំៗមាននិស្សិតរាប់ម៉ឺននាក់បានបញ្ចប់ការសិក្សា, សម្តេចបន្តថា សម្រាប់បរិមាណគឺយើងមានហើយ ប៉ុន្តែបញ្ហាគឺគុណភាពដែលយើងត្រូវយកចិត្តទុកដាក់បន្ថែម។
យ៉ាងណាក៏ដោយសម្តេចតេជោនៅតែធ្វើការកោតសរសើរ ពីការខិតខំប្រឹងប្រែងរបស់មាតាបិតា សិស្សានុសិស្សក្នុងការសិក្សា រហូតបានបន្តមកកាន់ឧត្តមសិក្សា ។ បើតាមប្រសាសន៍របស់សម្តេចតេជោនាយករដ្ឋមន្រ្តី គ្មានការផ្តល់ជូនមួយណា ល្អជាងការផ្តល់ជូនចំណេះដឹង ចំណេះធ្វើនោះទេ។ «ការវិនិយោគលើវិស័យអប់រំ គឺជារឿងចាំបាច់ ដែលយើងត្រូវតែធ្វើ និងពង្រឹងជាប់ជានិច្ច»៕
