សម្រាប់សិស្សនិស្សិត​ដែល​កំពុងស្វែង​រក​អាហារូបករណ៍​សម្រាប់ការ​សិក្សាថ្នាក់បរិញ្ញាបត្រ ពេល​នេះ សាកលវិទ្យាល័យអន្តរជាតិផារ៉ាហ្គន បានប្រកាស​ផ្តល់អាហារូបករណ៍ចំនួន ៥៦០កន្លែង ចាប់ពី២៥% ដល់ ១០០% លើគ្រប់ជំនាញសិក្សាសម្រាប់ឆ្នាំសិក្សាថ្មី ២០២៤-២០២៥ ។

ការទទួលពាក្យសុំប្រឡងអាហារូបករណ៍ នឹងចាប់បើកពីពាក់កណ្តាលខែសីហា ឆ្នាំ២០២៤ រហូតផុតកំណត់ទទួលពាក្យនៅថ្ងៃទី០៣ ខែកញ្ញា ឆ្នាំ២០២៤ ខាងមុខ ហើយ​ការប្រឡងនឹងត្រូវធ្វើឡើងនៅថ្ងៃទី០៧ ខែកញ្ញា ឆ្នាំ២០២៤។

ក្នុងនោះ សាលាផ្តល់ជូនជ័យលាភីអាហារូបករណ៍ ១០០% ចំនួន ២៥កន្លែង, ៧៥% ចំនួន ៦៥កន្លែង, ៥០% ចំនួន ២០០កន្លែង និង ២៥% ចំនួនកន្លែង អាស្រ័យលើលទ្ធផលនៃការធ្វើតេស្តសមត្ថភាពចំនួន ២ ដំណាក់កាល ពោលគឺ ទី១ វិញ្ញាសារសរសេរដោយធ្វើឡើងតាមប្រព័ន្ធអនឡាញ និង ទី២ ការសម្ភាសន៍។

សម្រាប់វិញ្ញាសាសរសេរសម្រាប់ការប្រឡងជ្រើសរើសត្រូវ​បែងចែកជា ៣ ផ្នែក ទី១ វិទ្យាសាស្ត្រសង្គម (ចំពោះតែមុខជំនាញទំនាក់ទំនងអន្តរជាតិ) ទី២ គណិតវិទ្យា និងតេស្តកម្រិត IQ (សម្រាប់គ្រប់មុខជំនាញ លើកលែងជំនាញទំនាក់ទំនងអន្តរជាតិ) និងទី៣ រូបវិទ្យា (សម្រាប់តែមុខជំនាញវិស្វកម្មសំណង់ស៊ីវិល និងវិស្វកម្មឧស្សាហកម្ម) ។ បន្ទាប់មក បេក្ខជនដែលទទួលពិន្ទុល្អលើវិញ្ញាសាសរសេរ នឹងត្រូវបានជ្រើសរើសមកធ្វើការសម្ភាសន៍ដោយផ្ទាល់នៅសាកលវិទ្យាល័យដើម្បីជម្រុះយកយកជ័យលាភី។

សម្រាប់បេក្ខជនដែលមានបំណងចង់ដាក់ពាក្យ​អាហារូបករណ៍នេះ ត្រូវចុះឈ្មោះដោយផ្ទាល់នៅសាលវិទ្យាល័យ ឬអាចធ្វើឡើងតាមរយៈប្រព័ន្ធអនឡាញ តាមតំណភ្ជាប់ផ្លូវការរបស់សាលា (https://my.paragoniu.edu.kh/form/scholarship) ដែលអាចរកមើលបានលើគេហទំព័រ ឬនៅលើបណ្តាញសង្គមផ្លូវការរបស់សាកលវិទ្យាល័យ ដូចជា Facebook និង Telegram ឱ្យបានមុនថ្ងៃទី០៣ ខែកញ្ញា ខណៈបន្ទាប់ពីចុះឈ្មោះរួច សាកលវិទ្យាល័យនឹងបង្ហោះផ្សាយបញ្ជីររាយឈ្មោះបេក្ខជនប្រឡងនៅថ្ងៃទី៦ ខែកញ្ញា ឆ្នាំ២០២៤ មួយថ្ងៃមុនប្រឡង នៅលើបណ្តាញសង្គមផ្លូវការរបស់សាលា។

គិតត្រឹមឆ្នាំសិក្សា២០២៤ សាកលវិទ្យាល័យអន្តរជាតិ ផារ៉ាហ្គន ផ្តល់ការបណ្តុះបណ្តាលលើមុខជំនាញចំនួន១០ ក្នុងកម្រិតបរិញ្ញាបត្រ ដែលមានមហាវិទ្យាល័យចំនួន៣ ក្នុងនោះ ទី១ មហាវិទ្យាល័យវិស្វកម្មដែលមានមុខជំនាញ ស្ថាបត្យកម្ម, វិស្វកម្មឧស្សាហកម្ម និងវិស្វកម្មសំណង់ស៊ីវិល។ ទី២ មហាវិទ្យាល័យព័ត៌មាន និងបច្ចេកវិទ្យាកុំព្យូទ័រ រួមមាន ជំនាញវិទ្យាសាស្ត្រកុំព្យូទ័រ និងគ្រប់គ្រងប្រព័ន្ធព័ត៌មាន។ ទី៣ មហាវិទ្យាល័យវិទ្យាសាស្ត្រសង្គម និងសេដ្ឋកិច្ច រួមមាន ជំនាញធនាគារ និងហិរញ្ញវត្ថុ, គ្រប់គ្រងពាណិជ្ជកម្ម, សេដ្ឋកិច្ច, ទំនាក់ទំនងអន្តរជាតិ និងភ័ស្តុភារ និងពាណិជ្ជកម្មអន្តរជាតិ។

យុវនិស្សិត ប៉ែន កុលបុត្រ បច្ចុប្បន្នជានិស្សិតឆ្នាំទី២ ផ្នែកវិទ្យាសាស្ត្រកុំព្យូទ័រ នៅសាលវិទ្យាល័យអន្តរជាតិផារ៉ាហ្គនផ្ទាល់ ដែលទទួលបានអាហារូបករណ៍ ១០០% នៅឆ្នាំ២០២២ បានចែករំលែកថា នៅពេលប្រឡង រូបគេបានត្រៀមខ្លួនយ៉ាងល្អិតល្អន់ ដូចជាស្វែងយល់បន្ថែមជាប្រចាំថ្ងៃលើផ្នែកតក្កវិទ្យា គណិតវិទ្យា ពីសៀវភៅនានា និងនៅលើ​អ៊ីនធើណែត បើទោះបីខ្លួនត្រូវត្រៀមខ្លូនប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបក្តី។ បន្ថែមពីនោះ រូបគេបានឆ្លាស់កាលវិភាគដោយម៉ត់ចត់ និងមានវិធីសាស្ត្រសម្រួលភាពតានតឹងតាមរយៈការផ្លាស់ប្តូរបរិយាកាសសិក្សាជាដើម។

យុវនិស្សិតជ័យលាភីអាហារូបករណ៍រូបនេះ ផ្តាំផ្ញើដល់អ្នកដែលមានបំណងប្រឡងអាហារូបករណ៍របស់សាកលវិទ្យាល័យអន្តរជាតិផារ៉ាហ្គន ត្រូវត្រៀមខ្លួនឱ្យបានច្រើន ជាពិសេសទៅលើបំណែងចែកវិញ្ញាសារដែលសាលាតម្រូវ ក្នុងនោះ រួមមាន គណិតវិទ្យានិងតក្កវិទ្យា, រូបវិទ្យា និងវប្បធម៌ទូទៅ ជាដើម អាស្រ័យលើមុខជំនាញដែលយើងរើស។

លោកបណ្ឌិត ដេត សុខឧត្តម អតីតសាកលវិទ្យាធិការ និងបច្ចុប្បន្នជាប្រធានប្រតិបត្តិ(COO) នៃក្រុមហ៊ុន ផារ៉ាហ្គន អេឌ្យូខេសិន សង្កត់ធ្ងន់ថា ការផ្តល់អាហារូបករណ៍ជាចំណែកសំខាន់ដើម្បីជំរុញវិស័យអប់រំ ជាពិសេសការផ្តល់លទ្ធភាពដល់សិស្សានុសិស្សអាចទទួលការអប់រំស្តង់ដារមួយបាន ដោយស្មើភាពផ្អែកលើសមត្ថភាព និងកិច្ចខិតខំប្រឹងប្រែង ខណៈសាកលវិទ្យាល័យផ្តល់អាហារូបករណ៍ជូនដល់និស្សិតរាប់រយនាក់ក្នុងមួយឆ្នាំៗ ចាប់តាំងពីឆ្នាំ២០១១ មកម្ល៉េះ ជាចំណែកកសាងមូលធនមនុស្សដើម្បីការអភិវឌ្ឍន៍សង្គមជាតិ។ លោកថា ការផ្តល់អាហារូបករណ៍នេះ គឺបើកទទួលរាល់សិស្សានុសិស្សដែលចាប់អារម្មណ៍ មិនចំពោះតែអ្នកកំពុងសិក្សាកម្រិតថ្នាក់ទី១២ ឡើយ៕