ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រុមស្ថាបត្យករវ័យក្មេង ដែលជាម្ចាស់ជ័យលាភីនៅក្នុងការប្រកួតប្រជែងស្នាដៃស្ថាបត្យកម្ម “ដង្ហើមទីក្រុង” បានបង្ហាញពីគំនិតយុវជនជំនាន់ក្រោយ ក្នុងការកែលម្អរមណីយដ្ឋានប្រវត្តិសាស្រ្តវត្តភ្នំក្លាយជាតំបន់បៃតងដែលមានសកម្មភាពចម្រុះ តែរក្សាបាននូវអត្តសញ្ញាណប្រវត្តិសាស្រ្ត។ ការបង្ហាញគំនិតរបស់ក្រុមស្ថាបត្យករវ័យក្មេងនេះ បានធ្វើឡើងក្នុងឱកាសពិព័រណ៍វិចិត្រសាលស្ថាបត្យកម្មកម្ពុជាឆ្នាំ២០២៤ ដែលរៀបចំឡើងនៅក្រសួងរៀបចំដែនដី នគរូបនីយកម្ម និងសំណង់។
កញ្ញា សើ ហានីហ្វាស់ ស្ថាបនិក FAA+D និងជាក្រុមជ័យលាភីលេខ១ នៃការប្រកួតប្រជែងស្នាដៃស្ថាបត្យកម្ម “ដង្ហើមទីក្រុង” និយាយថា រមណីយដ្ឋានវត្តភ្នំ ជាតំបន់ប្រវត្តិសាស្រ្តមួយ ដែលក្មេងៗអាចទៅលេងទីនោះបាន ប៉ុន្តែបច្ចុប្បន្ន មិនទាន់មានអ្វីជំរុញទឹកចិត្តឱ្យក្មេងៗទៅលេង និងមិនទាន់មានការតភ្ជាប់ផ្លូវទៅតំបន់នោះនៅឡើយ។ ហេតុនេះ ក្រុមរបស់ខ្លួនបានរចនាគម្រោង វត្តភ្នំ ៖ A Timeless Park ដោយបានបំផុសគំនិតថ្មី ក្នុងការធ្វើស្ពានតភ្ជាប់ពីមាត់ទន្លេចតុមុខទៅកាន់តំបន់វត្តភ្នំ និងកែលម្អព្រែកជីកចាស់ ក្នុងរាជធានីភ្នំពេញ ដើម្បីឱ្យមានសកម្មភាពទេសចរណ៍ចម្រុះឡើងវិញ។
ប្រធានក្រុមជ័យលាភីលេខ១ បន្ថែមថា គំនិតកែលម្អថ្មីក្នុងគម្រោង វត្តភ្នំ ៖ A Timeless Park គឺផ្ដោតសំខាន់ទៅលើមនុស្សគ្រប់វ័យទាំងចាស់ ទាំងក្មេង ដោយកែលម្អរម្មណីយដ្ឋានវត្តភ្នំ ឱ្យមានកន្លែងអង្គុយ កន្លែងសម្រាក កន្លែងជួបជុំ និងកន្លែងកម្មវិធីផ្សេងៗ ដែលអាចឱ្យក្មេងៗចូលរួមបានផងដែរ។ កញ្ញា ហានីហ្វាស់ បញ្ជាក់ថា ខ្លួនចង់ឃើញគំនិតនៃគម្រោង វត្តភ្នំ ៖ A Timeless Park ចេញជារូបរាង ដូច្នេះប្រសិនបើអាជ្ញាធរ ឬម្ចាស់គម្រោងណាចង់សិក្សាលើគម្រោងនេះ កញ្ញាពិតជាសប្បាយចិត្តនឹងចូលរួមសម្រាប់ការអភិវឌ្ឍសង្គមជាតិផង និងជួយដល់ការងារអាជីពផង។ បើតាម កញ្ញា ហ្វានីហ្វាស់ មុនការចាប់ផ្ដើមអនុវត្តគម្រោងនេះ ក្រុមខ្លួនមិនត្រឹមតែគិតលើការរចនាគំរូប្លង់ប៉ុណ្ណោះទេ តែក៏បានសិក្សាអំពីផលប៉ះពាល់នៅជុំវិញនោះផងដែរ ហើយសម្រាប់រយៈពេលនៃការអនុវត្តពីមួយដំណាក់កាលទៅមួយដំណាក់កាល អាចចំណាយរយៈពេលប្រហែល៥ឆ្នាំ។
ដោយឡែកលោក ម៉ក់ ម៉ូលីឬទ្ធិរុទ្រ ស្ថាបត្យករចុះបញ្ជីនៅស្ថាបត្យករកម្ពុជា និងជាសមាជិកក្រុមជ័យលាភីលេខ៣ ក្នុងការប្រកួតប្រជែងស្នាដៃស្ថាបត្យកម្ម “ដង្ហើមទីក្រុង” ដែលមានឈ្មោះគម្រោងថា បេះដូងបៃតងនៃទីក្រុងភ្នំពេញ ទីក្រុងរយៈពេល៥នាទី ក៏បានបង្ហាញពីគំនិតក្នុងការកែលម្អតំបន់រមណីយដ្ឋានវត្តភ្នំ ឱ្យទៅជាតំបន់មួយដែលអ្នកទេសចរអាចដើររយៈពេល៥នាទី ដោយមានមុខងារដូចជា សាលារៀន មន្ទីរពេទ្យ បន្ទប់ទឹកសាធារណៈ សួនបៃតង កន្លែងចតរថយន្ត/ម៉ូតូ វិស័យដឹកជញ្ជូនសាធារណៈជាដើម។ ម៉ូលីឬទ្ធិរុទ្រ លើកឡើងថា សម្រាប់គម្រោងនេះ ក្រុមរបស់ខ្លួនបានសិក្សាស្រាវជ្រាវអំពីតំបន់វត្តភ្នំ ហើយមើលឃើញថា តំបន់នេះអាចអភិវឌ្ឍបានភាពបៃតងលើ៣ចំណុច រួមមាន ១. និរន្តរភាពនៃការថែរក្សាបរិស្ថាន, ២.និរន្តរភាពក្នុងការលើកតម្កើងសេដ្ឋកិច្ច និង ៣.និរន្តរភាពក្នុងការផ្សព្វផ្សាយសង្គមនិងវប្បធម៌។
កញ្ញា ប៉ែន លីសា ជាសមាជិកក្រុមនៃគម្រោង បេះដូងបៃតងនៃទីក្រុងភ្នំពេញ បន្ថែមថា ស្ថាបត្យកម្មថ្មីដែលក្រុមខ្លួនបង្កើតឡើងនេះ គឺជាស្ថាបត្យកម្មដែលមិនប៉ះពាល់ស្ថាបត្យកម្មបុរាណ ដោយរៀបចំឡើងវិញនូវហេដ្ឋារចនាសម្ព័ន្ធមួយចំនួននៅខាងមុខក្រសួងប្រៃសនីយ៍ និងទូរគមនាគមន៍ សួនមាត់ទន្លេ និងកែលម្អព្រែកជីកថ្មី ដើម្បីរំដោះទឹកកុំឱ្យលិច ក៏ដូចជាផ្ដល់ជាផ្លូវអាកាសមួយដែលជាលំហបៃតងសម្រាប់អ្នកដើរ។
រមណីយដ្ឋានវត្តភ្នំ ត្រូវបានគេចាត់ទុកថា គឺជាបេះដូងនៃរាជធានីភ្នំពេញ ដែលមានកម្ពស់ ២៧ម៉ែត្រ ត្រូវបានស្ថាបនាឡើងនៅឆ្នាំ១៣៧៣ ជាសំណង់សាសនាមានកម្ពស់ខ្ពស់ជាងគេក្នុងរាជធានីភ្នំពេញ និងជាកន្លែងទេសចរណ៍ដ៏មានសក្ដានុពល។
ឯកឧត្តម ហង្ស សុតសំភារ អគ្គលេខាធិការ គណៈស្ថាបត្យករកម្ពុជា ដែលបានចូលរួមមើលបទបង្ហាញពីគំនិតស្ថាបត្យកម្មរបស់ស្ថាបត្យករវ័យក្មេង ដែលឈ្នះជ័យលាភីក្នុងការប្រកួតប្រជែងស្នាដៃស្ថាបត្យកម្ម “ដង្ហើមទីក្រុង” មានប្រសាសន៍ថា គម្រោងរបស់យុវជនទាំង៥ក្រុម គឺមានទស្សនៈវិស័យខុសៗគ្នា និងមានលក្ខណៈពិសេសខុសៗគ្នា ក្នុងការរៀបចំហេដ្ឋារចនាសម្ព័ន្ធមួយចំនួនពាក់ព័ន្ធជាមួយទីតាំងវត្តភ្នំ ក៏ដូចជាសួនច្បារផ្សារចាស់ ដោយការរៀបចំនេះ ត្រូវធ្វើយ៉ាងណាឱ្យទៅជាកន្លែងទាក់ទាញ មិនត្រឹមតែជាកន្លែងគោរពសក្ការៈ ប៉ុន្តែជាបេះដូង ជាកន្លែងទេសចរណ៍ កន្លែងសុខភាព ជាកន្លែងជួបជុំ និងធ្វើយ៉ាងណាឱ្យអ្នករស់នៅទីក្រុងភ្នំពេញ យករម្មណីយដ្ឋានវត្តភ្នំ ជាកន្លែងជួបជុំគ្រប់ពេលវេលា ទាំងព្រឹក ទាំងថ្ងៃ ទាំងល្ងាច ទាំងយប់។
បើតាមឯកឧត្តមអគ្គលេខាធិការ គំនិតដែលយុវជនជាស្ថាបត្យករទាំងអស់បានសិក្សា គឺជាការចូលរួមជួយទៅដល់អាជ្ញាធរដែនដីក្នុងការផ្ដល់ជាគំនិតយោបល់ ដើម្បីយកទៅពិចារណាក្នុងការអនុវត្តជាក់ស្ដែង ហើយថា ភាពចាំបាច់មិនអាចខ្វះបាន គឺការទំនាក់ទំនងរវាងអ្នកបច្ចេកទេស វិស័យរដ្ឋ និងអាជ្ញាធរដែនដីផ្ទាល់។
គួរជម្រាបជូនថា ក្នុងការប្រកួតស្នាដៃស្ថាបត្យកម្ម “ដង្ហើមទីក្រុង” គេបានរកឃើញជ័យលាភីចំនួន៥ក្រុម ដែល រួមមាន ក្រុមដែលឈ្នះជ័យលាភីលេខ១ គឺក្រុម វត្តភ្នំ – A Timeless Park, ជ័យលាភីលេខ២ ៖ ចំណងបៃតង, ជ័យលាភីលេខ៣ ៖ បេះដូងបៃតងនៃទីក្រុងភ្នំពេញ ទីក្រុងរយៈពេល៥នាទី, ជ័យលាភីលេខ៤ ៖ សេដ្ឋកិច្ចក្នុងអរិយធម៌បៃតង និង ជ័យលាភីលេខ៥ ៖ Rebirth៕
