សុវត្ថិភាពអ៊ីនធឺណិតសម្រាប់កុមារ គឺជាទិដ្ឋភាពសំខាន់មួយ ដែលអាណាព្យាបាល និងអ្នកពាក់ព័ន្ធនឹងការអប់រំកុមារត្រូវយកចិត្តទុកដាក់។ គេហទំព័រប្រព័ន្ធផ្សព្វផ្សាយ ដូចជា ហ្វេសប៊ុក អ៊ីស្ដាក្រាម តិកតុក និងកម្មវិធីជាច្រើនទៀត គឺជាមធ្យោបាយដ៏ល្អសម្រាប់ក្មេងៗប្រាស្រ័យទាក់ទងគ្នា ប៉ុន្តែបណ្ដាញសង្គមទាំងនេះ ក៏អាចមានឥទ្ធិពលអវិជ្ជមានលើកុមារផងដែរ។ ដូច្នេះ ការយល់ដឹងរបស់ឪពុកម្ដាយ អំពីផលវិជ្ជមាន និងគ្រោះថ្នាក់នៃការប្រើប្រព័ន្ធផ្សព្វផ្សាយ គឺពិតជាមានសារៈសំខាន់។ យោងតាមការស្រាវជ្រាវ មានគន្លឹះចំនួន ៤ ដែលអ្នក​អាណាព្យាបាលអាចអនុវត្ត ដើម្បីរក្សាសុវត្ថិភាពកុមារនៅលើប្រព័ន្ធផ្សព្វផ្សាយសង្គម។

១. គិតថាអ៊ីនធឺណិតគឺជាលំហដ៏ធំ ៖ អ្នកមិនអាចទុកកូនរបស់អ្នកនៅក្នុងលំហសាធារណៈដ៏ធំ ហើយគ្រប់គ្នាសុទ្ធតែមានចិត្តល្អ និងការពារផលប្រយោជន៍របស់អ្នកនោះទេ។ អ្នកត្រូវពន្យល់គេ អំពីមនុស្ស និងប្រភេទមិត្តិភក្តិ ដែលគេត្រូវបង្កើតទំនាក់ទំនង និងតាមដានយ៉ាងដិតដល់ ថាតើកូនរបស់អ្នកកំពុងមានទំនាក់ទំនង ជាមួយអ្នកណាខ្លះលើបណ្ដាញសង្គម។

២. យល់ដឹងអំពីសក្តានុពល នៃការគំរាមកំហែងតាមអ៊ីនធឺណិត ៖ ខណៈពេលដែលកុមារជាច្រើនកំពុងតែមានទំនាក់ទំនងល្អ និងរីករាយក្នុងការបង្កើតទំនាក់ទំនង ជាមួយមិត្តភក្ដិ ក៏មានកុមារជាច្រើនទៀត កំពុងតែទទួលរងការគំរាមកំហែងពីមិត្តភក្តិ ទាំងលើអ៊ីនធឺណិត និងជីវិតជាក់ស្ដែង។ ដូច្នេះ​ អ្នក​អាណាព្យាបាល ត្រូវយល់ដឹងអំពីការគំរាមហែង (bully) ទាំងនៅលើបណ្ដាញសង្គម សាលារៀន និងសង្គមជាក់ស្ដែង ហើយពន្យល់កូនអ្នកអំពីបញ្ហានេះ និងបង្ហាញពួកគេពីវិធីទប់ទល់។

៣. យល់អំពី Facebook Depression ៖ ក្រុមអ្នកស្រាវជ្រាវរកឃើញថា ការសំឡឹងរូបភាព ឬវីដេអូលើហ្វេសប៊ុក និងបណ្ដាញសង្គមផ្សេងៗទៀត ដែលបង្ហាញអំពីជីវិតដ៏ល្អឥតខ្ចោះរបស់អ្នកដទៃ អាចធ្វើឱ្យកុមារ មានការគោរព និងឱ្យតម្លៃខ្លួនឯងទាប (Self-Esteem) ហើយស្ថានភាពនេះ នឹងកាន់តែអាក្រក់ទៅៗ បើមិនមានការយកចិត្តទុកដាក់។ ដូច្នេះ អ្នកត្រូវពន្យល់ប្រាប់កូនរបស់អ្នកថា រាល់រូបភាព ដែលពួកគេឃើញនៅលើបណ្ដាញសង្គមមិនមែនជាការពិតទាំងស្រុងនោះទេ ព្រោះមនុស្សទំនងជាមិនបង្ហាញពីភាពបរាជ័យរបស់ខ្លួនលើបណ្ដាញសង្គមឡើយ។

៤. មានទំនាក់ទំនងល្អជាមួយកូន និងផ្ដល់ភាពកក់ក្ដៅ ៖ អ្នកត្រូវប្រាកដថា កូនរបស់អ្នកមានជំនឿទុកចិត្តថា ពួកគេអាចរត់ទៅរកអ្នក នៅពេលដែលពួកគេត្រូវការជំនួយ ឬត្រូវការអ្នកជជែកពិភាក្សា ដើម្បីរកដំណោះស្រាយផ្សេងៗ។ លើសពីនេះ អ្នកត្រូវតែដើរតួជាអ្នកស្ដាប់ដ៏ល្អ នៅពេលដែលកូនរបស់អ្នកត្រូវការអ្នកស្ដាប់ និងផ្ដល់ភាពកក់ក្ដៅ នៅពេលដែលពួកគេជួបបញ្ហា៕