នៅពេលដែលលឺពាក្យថា ការសិក្សាអាហារូបករណ៍នៅសាកលវិទ្យាល័យ សិស្សដែលទើបបញ្ចប់មធ្យមសិក្សាទុតិយភូមិ ជាពិសេសសិស្សដែលត្រៀមខ្លួនបន្តការសិក្សានៅសាកលវិទ្យាល័យគិតថា ជាការប្រសើរណាស់ព្រោះបានសិក្សាដោយមិនអស់លុយ ប៉ុន្តែសូមមានការប្រុងប្រយ័ត្នចំពោះអាហារូបករណ៍មួយចំនួនដែលនឹងធ្វើឱ្យមានផលលំបាកនៅពេលក្រោយ ។ នេះជាការចែករំលែករបស់លោក ភាព សុភ័ក អតីតសិស្សនិទ្ទេស A ឆ្នាំ២០១៨ ។

លោក ភាព សុភ័ក បានលើកឡើងថា ពិតណាស់អាហារូបករណ៍សិក្សានៅសាកលវិទ្យាល័យបានសម្រាលការចំណាយដល់សិស្ស ជាពិសេសបានផ្ដល់ឱកាសដល់សិស្សដែលមិនមានលទ្ធភាពក្នុងការបន្តសិក្សានៅមហាវិទ្យាល័យ ប៉ុន្តែសិស្ស-និស្សិតត្រូវប្រុងប្រយ័ត្នចំពោះអាហារូបករណ៍មួយចំនួន ។ អាហារូបករណ៍ជាការផ្ដល់ជូនការសិក្សាដោយឥតគិតថ្លៃ និងមិនទាមទារសំណង ប៉ុន្តែអាហារូបករណ៍បច្ចុប្បន្នមួយចំនួនតូចជាអាហារូបរកណ៍ដែលបង្កើតឡើងក្នុងរូបភាពបោកប្រាស់តែប៉ុណ្ណោះ ។

អតីតសិស្សនិទ្ទេស A រូបនេះបន្តថា អាហារូបករណ៍ខ្លះផ្ដល់ជូនការសិក្សាដល់សិស្សឥតគិតថ្លៃពិតមែន ប៉ុន្តែមានកុងត្រា មានលក្ខខណ្ឌមួយចំនួនដែលនិស្សិតត្រូវការសង ឬធ្វើអ្វីមួយសម្រាប់ម្ចាស់ជំនួយវិញក្នុងលក្ខខណ្ឌពិបាកទទួលយកណាមួយ ។ កុងត្រា ឬលក្ខខណ្ឌដែលអាហារូបករណ៍ដាក់មកដើម្បីឱ្យនិស្សិតធ្វើមិនមែនជារឿងអាក្រក់ទាំងអស់នោះទេ ដូចជាតម្រូវឱ្យសិស្សធ្វើការជាបុគ្គលិកក្នុងក្រុមហ៊ុនរបស់ម្ចាស់ជំនួយជាដើម ព្រោះឱកាសទាំងនោះអាចផ្ដល់ឱ្យនិស្សិតទទួលបានការងារក្រោយបញ្ចប់ការសិក្សា និងអាចរៀនពីការងារបានកាន់តែប្រសើរ ។

លោក ភាព សុភ័ក

“អាហារូបករណ៍ច្រើន ត្រូវប្រុងប្រយ័ត្នឱ្យបានកាន់តែច្រើន”

ជាបទពិសោធន៍​ដែល​លោក ភាព សុភ័ក បានដឹង អាហារូបករណ៍ខ្លះបង្កើតក្នុងរូបភាពផ្សេងៗគ្នាដូចជា ការទាក់ទងតាមទូរស័ព្ទទៅកាន់សិស្សថា បានជាប់អាហារូបករណ៍ណាមួយនៃសាកលវិទ្យាល័យណាមួយហើយតម្រូវឱ្យបង់ប្រាក់ក្នុងតម្លៃណាមួយដែលកំណត់ដើម្បីឱ្យខាងគេរត់ការឯកសារឱ្យជាដើម និងក្នុងរូបភាពជាច្រើនទៀត ។

លោក ភាព សុភ័ក បានបន្ថែមថា រូបភាពនៃការបោកប្រាស់ដល់សិស្សអំពីអាហារូបករណ៍មានច្រើនទម្រង់ណាស់ ដូចនេះមុនធ្វើការសម្រេចចិត្តទទួលយកអាហារូបករណ៍ណាមួយ សិស្ស-និស្សិតត្រូវគិតឱ្យបានច្បាស់ សិក្សាឱ្យបានស៊ីជម្រៅ ស្រាវជ្រាវ និងស្វែងយល់ឱ្យបានត្រឹមត្រូវ ៕