ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រោយពីបញ្ចប់បេសកកម្មអនុវត្តកម្មវិធីផ្លាស់ប្រែអស់រយៈពេល ១៨ឆ្នាំជាផ្លូវការលើទឹកដីខេត្តព្រះវិហារ នាថ្ងៃទី២៩ ខែសីហានេះ អង្គការទស្សនៈពិភពលោកអន្តរជាតិនៅកម្ពុជា (World Vision) បានឱ្យដឹងថា ប្រជាពលរដ្ឋក្នុងតំបន់គោលដៅដែលខ្លួនធ្វើការចំនួន ៣ម៉ឺនប្រាំពាន់នាក់ បានទទួលផលពីកម្មវិធីអភិវឌ្ឍន៍សហគមន៍ជាបន្តបន្ទាប់ ពាក់ព័ន្ធនឹងកម្មវិធីបោសសម្អាតមីន និងអភិវឌ្ឍន៍ដីកសិកម្ម កម្មវិធីលើកកម្ពស់សុខភាព អាហារូបត្ថម្ភ ព្រមទាំងទឹកស្អាត និងអនាម័យ (WASH) ។
គំនិតផ្តួចផ្តើមខាងលើនេះ បានជះឥទ្ធិពលជាវិជ្ជមានដល់ភូមិចំនួន ២៥នៅទូទាំងឃុំចំនួន៤ នៃស្រុកត្បែងមានជ័យ និងសង្កាត់ចំនួន២ នៃក្រុងព្រះវិហារ ដែលមានប្រជាពលរដ្ឋទទួលផលសរុបចំនួន ៣៥, ២៨៥ នាក់ក្នុងនោះមានកុមារចំនួន ១៤, ០១១នាក់ ។ ផ្អែកតាមការស្ទង់មតិប្រជាសាស្រ្ត និងសុខភាពកម្ពុជា (CDHS) ឆ្នាំ២០១៤ បានបង្ហាញថា ខេត្តព្រះវិហារមានអត្រាប្រេវ៉ាឡង់កុមារខ្វះអាហារូបត្ថម្ភខ្ពស់ជាងគេ ធៀបនឹងខេត្តផ្សេងៗ និងជាខេត្តដែលមានអត្រាកង្វះអាហារូបត្ថម្ភខ្ពស់ជាងគេនៅកម្ពុជា ។ ក៏ប៉ុន្តែបច្ចុប្បន្នបញ្ហាកង្វះអាហារូបត្ថម្ភកុមារនៅខេត្តព្រះវិហារបានកាត់បន្ថយជាវិជ្ជមាន ។
លោក សុខ រដ្ឋា ប្រធានមណ្ឌលសុខភាពភូមិសន្តិភាព ឃុំឈានមុខ ស្រុកត្បែងមានជ័យ ខេត្តព្រះវិហារ បាននិយាយរំឭកពីអតីតកាលថា កន្លងទៅកុមារអាយុក្រោម ៥ឆ្នាំនៅស្រុកត្បែងមានជ័យបានពើបប្រទះបញ្ហាប្រឈមជាច្រើន ដូចជា បញ្ហាក្រិសក្រិន កុមារទម្ងន់មិនគ្រប់ និងកង្វះអាហារូបត្ថម្ភ ដោយសារម្តាយឪពុកខ្វះការថែទាំ ស្របនឹងការយល់ដឹងអំពីការផ្តល់អាហាររូបត្ថម្ភកុមារពុំទាន់ត្រឹមត្រូវ ហើយការអនុវត្តទម្លាប់បំបៅកូនដោយទឹកដោះនៅមានកម្រិត ។
លោក សុខ រដ្ឋា ប្រធានមណ្ឌលសុខភាពភូមិសន្តិភាព មានប្រសាសន៍បញ្ជាក់ទៀតថា ៖ “ភាពជាដៃគូជាមួយអ្នកស្ម័គ្រចិត្តទ្រទ្រង់សុខភាពភូមិដែលបានទទួលការបណ្តុះបណ្តាលពីអង្គការទស្សនៈពិភពលោក សហការជាមួយអាជ្ញាធរមូលដ្ឋាន បានធ្វើឱ្យបញ្ហាកុមារកង្វះអាហារូបត្ថម្ភការថយចុះជាលំដាប់ ហើយប្រជាជនចាប់ផ្តើមទទួលបានចំណេះដឹងសុខភាព ហើយស្ថានភាពអាហារូបត្ថម្ភកុមារមានភាពល្អប្រសើរឡើងជាលំដាប់ ។”
ជាក់ស្តែង តាមការស្ទង់មតិដំណាក់កាលចុងក្រោយរបស់អង្គការទស្សនៈពិភពលោក ឆ្នាំ២០២២-២០២៣ ភាគរយគ្រួសារដែលមានទឹកស្អាតពេញមួយឆ្នាំសម្រាប់ប្រើប្រាស់បានកើនឡើងយ៉ាងខ្លាំងពី ៤៨% ដល់ ៧៩% ខណៈដែលវត្តមានបង្គន់ប្រើប្រាស់ក្នុងគ្រួសារបានហក់ឡើងពី២% ទៅ ៨៦% ។ បន្ថែមលើនេះ ភូមិចំនួន ១២ ក្នុងចំណោម ២៥ ភូមិ (៧ នៅស្រុកត្បែងមានជ័យ និង ៥ ក្នុងក្រុងព្រះវិហារ) បានប្រកាសថាជា ភូមិដែលបញ្ឈប់ការបន្ទោរបង់ពាសវាលពាសកាល (ODF) ។
លោក ជេនេស អ៉ីម៉ានូអ៊ែល ហ្គីនទីញ នាយកប្រចាំប្រទេសអង្គការទស្សនៈពិភពលោក មានប្រសាសន៍ថា តាមរយៈលទ្ធផលភាពជាដៃគូរឹងមាំជាមួយភាគីពាក់ព័ន្ធទាំងអស់ បានបង្ហាញពីចក្ខុវិស័យរួមគ្នាលើកកម្ពស់សុខុមាលភាពរបស់កុមារនៅក្នុងសហគមន៍ ។ អង្គការទស្សនៈពិភពលោកពិតជាមានកិត្តិយសដែលបានក្លាយជាផ្នែកមួយនៃដំណើរការនេះ ។ ការប្តេជ្ញាចិត្តរបស់ភាគីទាំងអស់ គឺជាមូលដ្ឋានគ្រឹះជំរុញក្តីសុបិន្តឱ្យបានសម្រេចចេញជារូបរាង ហើយអនាគតរបស់កុមាររាប់ពាន់នាក់បានផ្លាស់ប្តូរជាវិជ្ជមាន ។
សូមជម្រាបថា ការចូលរួមរបស់អង្គការទស្សនៈពិភពលោកនៅក្នុងស្រុកត្បែងមានជ័យ បានចាប់ផ្តើមជាមួយនឹងកម្មវិធីបោសសម្អាតមីន និងអភិវឌ្ឍន៍ដីកសិកម្មពីឆ្នាំ២០០៣ ដល់ឆ្នាំ២០០៥ ។ ចាប់ពីឆ្នាំ២០០៥ អង្គការទស្សនៈពិភពលោក បានបង្វែរការយកចិត្តទុកដាក់របស់ខ្លួនដោយផ្តោតទៅលើវិស័យអាទិភាពមួយចំនួន ដូចជា កម្មវិធីគាំទ្រសុខភាព អាហារូបត្ថម្ភ ព្រមទាំងទឹកស្អាត និងអនាម័យ (WASH) ក្នុងគោលបំណងលើកកម្ពស់សុខភាព និងអាហារូបត្ថម្ភរបស់ម្តាយ និងកុមារ៕
