ប្រទេសចិនកាលពីពេលថ្មីៗនេះបានចេញផ្សាយពីគោលការណ៍ណែនាំ ស្ដីពីការពង្រឹងការអប់រំវិទ្យាសាស្ត្រ និងបច្ចេកវិទ្យា នៅកម្រិតបឋមសិក្សា និងមធ្យមសិក្សា ដើម្បីបង្កើតមូលដ្ឋានគ្រឹះរឹងមាំក្នុងការ​អភិវឌ្ឍធនធានមនុស្សផ្នែកវិទ្យាសាស្ត្រ-បច្ចេកវិទ្យា, នេះបើតាមការ​ចុះផ្សាយ​របស់កាសែត ស៊ីនហួ។

គោលការណ៍នេះ បង្កើតឡើង ក្នុងគោលបំណងបង្កើនសមត្ថភាពពឹងផ្អែកលើខ្លួនឯង និងភាពធន់របស់ប្រទេសចិន នៅក្នុងវិស័យនេះ។ នៅឆ្នាំ២០៣០ ប្រព័ន្ធអប់រំវិទ្យាសាស្ត្រ និងបច្ចេកវិទ្យា សម្រាប់ការសិក្សាថ្នាក់បឋម និងមធ្យមសិក្សា ត្រូវបានរដ្ឋាភិបាលចិនរំពឹងថា នឹងដំណើរការយ៉ាងទូលំទូលាយទូទាំងប្រទេស។

លើសពីនេះ នៅឆ្នាំ២០៣៥ ប្រព័ន្ធអេកូឡូស៊ីអប់រំវិទ្យាសាស្ត្រ-បច្ចេកវិទ្យា នឹងបង្កើតឡើងយ៉ាងពេញលេញ ដែលជួយឱ្យចិនក្លាយជាប្រទេសឈានមុខគេក្នុងវិស័យអប់រំ, នេះបើយោងតាមគោលការណ៍ណែនាំ ដែលចេញផ្សាយដោយក្រសួងអប់រំចិន (MOE)។

នៅក្នុងសន្និសីទសារព័ត៌មានអំពីគោលការណ៍ កាលពីពេលថ្មីៗនេះ លោក Tian Zuyin មន្ត្រីក្រសួងអប់រំទទួលបន្ទុកអប់រំមូលដ្ឋាន បានថ្លែងថា ការបណ្ដុះស្មារតីឱ្យសិស្សចាប់អារម្មណ៍លើមុខវិជ្ជាវិទ្យាសាស្ត្រ ការបង្កើតថ្មី និងសមត្ថភាពអនុវត្តជាក់ស្ដែង គឺពិតជាមានសារៈសំខាន់ អំឡុងពេលសិក្សានៅថ្នាក់បឋម និងមធ្យមសិក្សា។

លោក Tian មានប្រសាសន៍បន្ថែមថា​ មន្ត្រីដែលកំពុងបំពេញការងារ លើការពង្រឹងការអប់រំផ្នែកវិទ្យាសាស្ត្រ​បច្ចេកវិទ្យា កំពុងបន្តកិច្ចខិតខំប្រឹងប្រែង និងជំរុញវឌ្ឍនភាពជាបន្តបន្ទាប់គួរឱ្យកត់សម្គាល់ ក្នុងរយៈពេលប៉ុន្មានឆ្នាំចុងក្រោយនេះ។ ជាក់ស្ដែង ចាប់តាំងពីឆ្នាំ២០២២ សារមន្ទីរវិទ្យាសាស្ត្រ និងបច្ចេកវិទ្យា ទូទាំងប្រទេស បានសហការជាមួយសាលាបឋមសិក្សា និងមធ្យមសិក្សាជាង ១៤,០០០ ដើម្បីរៀបចំសកម្មភាពផ្សេងៗ ទាក់ទងនឹងការជំរុញការសិក្សាផ្នែកវិទ្យាសាស្ត្រ និងបច្ចេកវិទ្យា។

លោក Xu Xuejun អនុប្រធានសាកលវិទ្យាល័យ Tongji ដែលមានមូលដ្ឋាននៅទីក្រុងសៀងហៃ បានសង្កត់ធ្ងន់ថា ការពង្រឹងសមត្ថភាពវិទ្យាសាស្ត្រ-បច្ចេកវិទ្យា និងនវានុវត្តន៍ដល់សិស្សនៅដំណាក់កាលដំបូងនៃការអប់រំបឋមសិក្សា គឺមានប្រយោជន៍ក្នុងការបង្កើន និងលើកកម្ពស់អ្នកវិទ្យាសាស្ត្រ និងវិស្វករនាពេលអនាគត សម្រាប់ប្រទេសចិន។

​ដើម្បីពង្រឹងការអប់រំវិទ្យាសាស្ត្រ និងបច្ចេកវិទ្យាបន្ថែមទៀត គោលការណ៍ណែនាំបានដាក់ចេញនូវភារកិច្ចចំនួន ៦ ដោយអំពាវនាវឱ្យមានកិច្ចខិតខំប្រឹងប្រែង ក្នុងការកែទម្រង់វិធីសាស្ត្របង្រៀន ពង្រឹងការធ្វើសមាហរណកម្មអន្តរវិញ្ញាសា និងកសាងកម្លាំងគ្រូបង្រៀនដ៏រឹងមាំ។

បើតាមកាសែតចិន ស៊ីនហួ ការអប់រំវិទ្យាសាស្ត្រ និងបច្ចេកវិទ្យា ក្នុងកម្រិតបឋមសិក្សា នៅតែប្រឈមនឹងបញ្ហា ជាពិសេស គឺកង្វះគ្រូបង្រៀន និងកន្លែងសម្រាប់អនុវត្ត។ លោក Lu Yongli នាយកសាលាបឋមសិក្សាមួយក្នុងទីក្រុងប៉េកាំង បានលើកឡើងថា ការចេញគោលការណ៍ណែនាំនេះ អាចជួយដោះស្រាយបញ្ហាទាំងនេះបាន៕