សម្រាប់ឆ្នាំសិក្សា​២០២៥-២០២៦ វិទ្យាស្ថាន​ពហុបច្ចេកទេស​ខេត្ត​បន្ទាយមានជ័យ នឹង​ជ្រើសរើស​សិស្ស​និស្សិតរហូត​ដល់ចំនួន ១២០៥នាក់ សម្រាប់ទទួលអាហារូបករណ៍​ទៅតាម​មុខ​ជំនាញ និង​កម្រិតសញ្ញាបត្រ។

ក្នុងនោះសម្រាប់កម្រិត​សញ្ញាបត្រ​ជាន់ខ្ពស់​បច្ចេកទេស (បរិញ្ញាបត្រ​រងបច្ចេកទេស) វិទ្យាស្ថានផ្តល់ជូន​អាហារូបករណ៍សរុបចំនួន ១៧៥នាក់ ទៅ​លើជំនាញ វិស្វកម្ម​រថយន្ត ៣០នាក់, ការរចនា និង​បង្កើតគេហទំព័រ ៣០នាក់, គ្រប់គ្រងព័ត៌មានវិទ្យា ៣០នាក់, សេវាកម្មកុំព្យូទ័រ ២៥នាក់, បច្ចេកវិទ្យា​ប្រព័ន្ធបរិក្ខារត្រជាក់ និង​កំដៅ ៣០នាក់ និង​បសុសត្វ ៣០នាក់។

សម្រាប់កម្រិតសញ្ញាបត្រ​បច្ចេកទេស និង​វិជ្ជាជីវៈ ៣ (C3) អាហារូបករណ៍សរុបចំនួន ២៦០នាក់ ក្នុងនោះ មានជំនាញ ការផ្សារលោហៈដោយធ្នូអគ្គិសនី ២០នាក់, ការផ្សារឧស្ម័ន ២០នាក់, ការផលិតនំ ២០នាក់, ការថែទាំ និង​ជួសជុលរថយន្ត ២០នាក់, ការថែទាំ និងជួសជុលអគ្គិសនីរថយន្ត ២០នាក់, ការថែទាំ និង​ជួសជុលម៉ាស៊ីនត្រជាក់រថយន្ត ២០នាក់, ការថែទាំ និងជួសជុលទោចក្រយានយន្ត ២០នាក់, ការរចនាក្រាហ្វិក​ដោយកុំព្យូទ័រ ២០នាក់, សេវាកម្មរដ្ឋបាល ២០នាក់, សេវាកម្មកុំព្យូទ័រ ២០នាក់, ការដំឡើង និង​ថែទាំ​បណ្តាញ​កុំព្យូទ័រ ២០នាក់, សេវាកម្មបរិក្ខា​ត្រជាក់​ក្នុងគេហដ្ឋាន ២០នាក់ និង​ ការកែច្នៃបន្លែ និងផ្លែឈើ ២០នាក់។

ដោយឡែកកម្រិតសញ្ញាបត្រ​បច្ចេកទេស និង​វិជ្ជាជីវៈ ២ (C2) វិទ្យាស្ថានផ្តល់អាហារូបករណ៍សរុបចំនួន ៧៧០នាក់ ទៅលើជំនាញ ការផ្សារលោហៈដោយធ្នូអគ្គិសនី ចំនួន៥០នាក់, ការផ្សារឧស្ម័ន ៥០នាក់, ការផលិតនំ ៥០នាក់, ការថែទាំ និង​ជួសជុលរថយន្ត ៧៥នាក់, ការថែទាំ និងជួសជុល​អគ្គិសនីរថយន្ត ៥០នាក់, ការថែទាំ និង​ជួសជុល​ម៉ាស៊ីនត្រជាក់រថយន្ត ៥០នាក់, ការថែទាំ និង​ជួសជុលទោចក្រយានយន្ត ៥០នាក់, ការរចនាក្រាហ្វិកដោយ​កុំព្យូទ័រ ៦៥នាក់, សេវាកម្មរដ្ឋបាល ៥០នាក់, សេវាកម្មកុំព្យូទ័រ ៥០នាក់, ការដំឡើង និង​ថែទាំ​បណ្តាញ​កុំព្យូទ័រ ៥០នាក់, សេវាកម្មបរិក្ខារត្រជាក់​ក្នុងគេហដ្ឋាន ១២០នាក់ និង​ការកែច្នៃ​បន្លែ និង​ផ្លែឈើ ៦០នាក់។

លក្ខខណ្ឌនៃការជ្រើសរើស ៖ សម្រាប់កម្រិតសញ្ញាបត្រជាក់ខ្ពស់បច្ចេកទេស បេក្ខជនត្រូវ​ប្រឡង​ជាប់ ឬធ្លាក់​សញ្ញាបត្រ​មធ្យមសិក្សា​ទុតិយភូមិ ឬ​សញ្ញាបត្របច្ចេកទេស និងវិជ្ជាជីវៈ ៣ (C3) ឬសញ្ញាបត្រ​ដែលមានតម្លៃស្មើ។ សម្រាប់កម្រិតសញ្ញាបត្រ​បច្ចេកទេស និង​វិជ្ជាជីវៈ ៣ (C3) បេក្ខជន​ត្រូវ​មានសញ្ញាបត្រ​បច្ចេកទេស និង​វិជ្ជាជីវៈ​២ (C2) ហើយសម្រាប់កម្រិតសញ្ញាបត្រ​មធ្យមសិក្សា​បច្ចេកទេស និង​វិជ្ជាជីវៈ ២ បេក្ខជន​ត្រូវ​មាន​សញ្ញាបត្រ​បច្ចេកទេស និង​វិជ្ជាជីវៈ ១ (C1)។

ឯកសារភ្ជាប់​ក្នុងការ​ដាក់ពាក្យ​ចូលរៀន ៖ សៀវភៅគ្រួសារ (ថតចម្លង) ១ច្បាប់, សំបុត្រ​កំណើត (ថតចម្លង) ១ច្បាប់, អត្តសញ្ញាណបណ្ណសញ្ជាតិខ្មែរ (ថតចម្លង) ១ច្បាប់, រូបថតថ្មីផ្ទៃពណ៌ខៀវ (ទំហំ៤x៦) ចំនួន ៤សន្លឹក, រូបថតថ្មីផ្ទៃពណ៌ខៀវ (ទំហំ៣x៤) ចំនួន ២សន្លឹក, សញ្ញាបត្រ (ច្បាប់ចម្លងដែលមានបញ្ជាក់​ពីអាជ្ញាធរ​មានសមត្ថកិច្ច) ១ច្បាប់។

កាលបរិច្ឆេទ​ចុះឈ្មោះចូលរៀនចាប់ពីថ្ងៃជូនដំណឹងនេះ ហើយកាលបរិច្ឆេទ​ចូលរៀន​គឺនៅថ្ងៃទី២ ខែធ្នូ ឆ្នាំ២០២៥។

សម្រាប់ព័ត៌មាន សូមទំនាក់ទំនងទៅកាន់វិទ្យាស្ថាន​ដែលមានអាសយដ្ឋាន ភូមិ​គាប សង្កាត់ទឹកថ្លា ក្រុងសិរីសោភ័ណ ខេត្ត​បន្ទាយមានជ័យ ឬតាមរយៈទូរស័ព្ទលេខ ០៩៥ ៩៣៤ ៤៤៧៕