ការចាប់ផ្តើមសប្តាហ៍ថ្មី ដោយមិនបានរៀបចំ នាំឱ្យមានអារម្មណ៍មិនល្អ ព្រោះបង្កបាននូវភាពប្រញាប់ប្រញាល់ខ្លាំង ភ្លេចមុខភ្លេចក្រោយ រួមទាំងជំរុញអាការស្ត្រេសកើនឡើងស្ទើរតែមួយអាទិត្យពេញ មានពេលខ្លះភ្លេចទាំងកិច្ចការសំខាន់ៗទៀតផង។

សាកស្រមៃបន្តិច! ប្រសិនបើក្រោកពីគេង ដោយមានបរិវេណផ្ទះស្អាត អាហារមានការរៀបចំបានល្អ និងមានផែនការសកម្មភាពការងាររួចជាស្រេច តើអាចកាត់បន្ថយភាពស្មុគស្មាញបានយ៉ាងណាទៅ? ការចាប់ផ្តើមសប្តាហ៍ថ្មីដោយអារម្មណ៍ល្អ នោះថ្ងៃច័ន្ទដែលចូលមកដល់ ក៏បង្កើតបាននូវភាពស្រស់បំព្រងទៅតាមនោះដែរ។ ហើយការរៀបចំសម្រាប់ថ្ងៃថ្មី គិតអំពីការអនុវត្តសកម្មភាពទាំងឡាយណាដែលនាំឱ្យមានទម្លាប់ល្អ ការរស់នៅមានរបៀបដើម្បីបង្កើនបាននូវផលិតភាព និងតុល្យភាពនៃការរស់នៅ។

យ៉ាងណាក៏ដោយតាមរយៈ Rinse បានបង្ហាញអំពីអត្ថប្រយោជន៍នៃការរៀបចំ និងការចាប់ផ្តើមសប្តាហ៍ថ្មីដ៏ប្រសិទ្ធភាព ដោយមានរៀបរាប់ដូចតទៅ ៖

១. លក្ខណៈការរៀបចំសប្តាហ៍បន្ទាប់ ៖ ការរៀបចំសម្រាប់សប្តាហ៍ថ្មី ជាការឌីហ្សាញពេលវេលាដែលមាន និងជាការជម្រះរាល់មន្ទិលចាស់ៗ រួមទាំងធ្វើផែនការសកម្មភាពសម្រាប់សប្តាហ៍បន្ទាប់។ បន្ថែមពីនោះ ត្រូវរកឱ្យឃើញអ្វីដែលនាំឱ្យមានភាពស្មុគស្មាញទៅកាន់ការគិតប្រចាំថ្ងៃ និងការកត់ត្រាអំពីទំនួលខុសត្រូវសម្រាប់សប្តាហ៍បន្ទាប់ ក៏ដូចជាបង្ហើយកិច្ចការដែលនៅសេសសល់ផងដែរ។ សកម្មភាពទាំងនេះគឺជាឱកាសក្នុងការផ្ទៀងផ្ទាត់គោលដៅ និងការតាមដានសកម្មភាពដែលមានភាពជាក់លាក់បានប្រសើរជាងមុន។

២. ឆ្លើយបតនឹងតម្រូវការក្នុងរយៈពេលខ្លី និងវែង ៖ ការធ្វើផែនការសកម្មភាព ឬការរុះរើអាទិភាពការងារ ​រៀងរាល់ពេលចាប់ផ្តើមសប្តាហ៍ថ្មី ជាពិសេសមុនពេលចាប់ផ្តើមថ្ងៃច័ន្ទ ព្រោះវាមានឥទ្ធិពលជារួមទៅកាន់សុខភាពផ្លូវចិត្ត ផលិតភាព និងសុខុមាលភាពនៃការរស់នៅជារួម! ដោយសារតែការរៀបចំឱ្យមានរបៀបរៀបរយទាំងនេះ មានឥទ្ធិពលកាត់បន្ថយស្ត្រេស ជំរុញឱ្យខ្លួនឯងខិតជិតទៅកាន់គោលដៅ មានពេលឆ្លុះបញ្ចាំង និងការថែទាំខ្លួនឯង រួមទាំងការបង្កើនទំនុកចិត្តចំពោះខ្លួនឯង។

៣. សកម្មភាពដែលគួររៀបចំ ៖ ការងារមានច្រើនប្រភេទ តែបើជជែកជាទូទៅវិញ តើសកម្មភាពអ្វីខ្លះដែលពុំគួរមើលរំលង? ក្រៅតែការរៀបចំផែនការសកម្មភាពដើម្បីអាជីពវិជ្ជាជីវៈ ការរៀបចំចំពោះការរស់នៅប្រចាំថ្ងៃផ្ទាល់ខ្លួន ក៏មានភាពពាក់ព័ន្ធគ្នាដែរ!​ ហើយដើម្បីដឹងអំពីអាទិភាពទាំងនេះ គឺត្រូវការពេលក្នុងការធ្វើសេចក្ដីឆ្លុះបញ្ចាំង ការសរសេរកំណត់ហេតុតាមរយៈសៀវភៅ ឬតាមរយៈកម្មវិធីឌីជីថល។ បន្ថែមពីនោះ ការជម្រុះចោលរាល់សម្ភារៈមិនចាំបាច់ ការរៀបចំប្រភេទអាហារសម្រាប់សប្តាហ៍បន្ទាប់ ការដាក់គោលដៅសម្រាប់មួយអាទិត្យទុកជាមុនចាប់ផ្តើមថ្ងៃថ្មី ការគ្រប់គ្រងហិរញ្ញវត្ថុ សម្អាតសម្លៀកបំពាក់ និងការរៀបចំខោអាវទៅតាមប្រភេទការងារ សុទ្ធសឹងតែជាការរួមចំណែកយ៉ាងសំខាន់ក្នុងការរៀបចំសប្តាហ៍ថ្មីឱ្យមានប្រសិទ្ធភាព៕