សមាគមនិស្សិតវិទ្យាស្ថានបច្ចេកវិទ្យាកម្ពុជា ប្រកាសដំណឹងជូនដល់សិស្សនិស្សិតដែលកំពុងសិក្សានៅវិទ្យាស្ថានបច្ចេកវិទ្យាកម្ពុជាឱ្យទទួលបានកន្លែងស្នាក់នៅបណ្ដោះអាសន្ននៅអន្តេវាសិកដ្ឋានចំនួន៤៥នាក់ក្នុងឆ្នាំសិក្សា២០២៤-២០២៥។ ការជ្រើសរើសសម្រាប់សិស្សស្រីចំនួន១៥នាក់ និងសិស្សប្រុស៣០នាក់។

លក្ខខណ្ឌនៃការជ្រើសរើស ៖ ជាបេក្ខជនដែលកំពុងសិក្សានៅវិទ្យាស្ថានបច្ចេកវិទ្យា​កម្ពុជា ជានិស្សិតក្រីក្រមកពីខេត្តនានា (មានភ្ជាប់លិខិតពីភូមិ ឃុំ) ឬមិនមានសាច់ញាតិនៅភ្នំពេញ និងជាបុគ្គលដែលមានវិន័យល្អ មានសីលធម៌ល្អ និងគោរពតាមបទបញ្ជាផ្ទៃក្នុងរបស់អន្តេវាសិកដ្ឋាន។

ក្រោយការដាក់ពាក្យ សមាគមនឹងប្រកាសបិទផ្សាយឈ្មោះបេក្ខជននៅបន្ទប់សមាគមនិស្សិត និងតាមរយៈគេហទំព័រផ្លូវការរបស់សមាគមនិស្សិតវិទ្យាស្ថានបច្ចេកវិទ្យាកម្ពុជា នៅថ្ងៃទី២២ ខែមករា ឆ្នាំ២០២៥។ បេក្ខជននឹងត្រូវសម្ភាសន៍នាថ្ងៃទី១៦ ខែមករា ឆ្នាំ២០២៥ ហើយ​សម្រាប់លទ្ធផលរបស់បេក្ខជនដែលបានជាប់ចូលស្នាក់នៅបណ្ដោះអាសន្នអន្តេវាសិកដ្ឋានវិទ្យាស្ថានបច្ចេកវិទ្យាកម្ពុជា នឹងប្រកាសនៅថ្ងៃទី២៨ ខែមករា ឆ្នាំ២០២៥។

ចំពោះ និស្សិតដែលជាប់ចូលស្នាក់នៅបណ្ដោះអាសន្ននៅអន្តេវាសិកដ្ឋានវិទ្យាស្ថានបច្ចេកវិទ្យាកម្ពុជា តម្រូវឱ្យចូលប្រជុំជាមួយសមាគមនិស្សិត និងគណៈគ្រប់គ្រងអន្តេវាសិកដ្ឋានវិទ្យាស្ថានបច្ចេកវិទ្យាកម្ពុជា នៅរសៀលថ្ងៃទី២៩ ខែមករា ឆ្នាំ២០២៥។ បេក្ខជនត្រូវចូលស្នាក់នៅអន្តេវាសិកដ្ឋាន នឹងត្រូវបង្ហាញខ្លួនចាប់ពីថ្ងៃទី០១ រហូតដល់ថ្ងៃទី០៩ ខែកុម្ភៈ ឆ្នាំ២០២៥។

សម្រាប់ព័ត៌មានបន្ថែម បេក្ខជនអាចសាកសួរព័ត៌មានដោយផ្ទាល់នៅការិយាល័យ សមាគមនិស្សិត ឬទាក់ទងទៅកាន់ ០៩៦២៩៤០៨៤០ (សមាគមននិស្សិត) ឬ ០៧១៤៩៦១០៣៥ (អន្តេនារី) និង ០៩៧២៩៧៧៤៤៩ (អន្តេបុរស)។

និស្សិតដែលមានចំណាប់អារម្មណ៍ក្នុងការដាក់ពាក្យ អាចសុំ និងដាក់ពាក្យនៅបន្ទប់ សមាគមនិស្សិត ជាន់ផ្ទាល់ដីអគារ F នៃវិទ្យាស្ថានបច្ចេកវិទ្យាកម្ពុជា រៀងរាល់ម៉ោងធ្វើការ។ កាលបរិច្ឆេទទទួលពាក្យចាប់ពីថ្ងៃជូនដំណឹងនេះតទៅ រហូតដល់ថ្ងៃទី១៨ ខែមករា ឆ្នាំ២០២៥ មុនម៉ោង៥:០០ នាទីល្ងាច៕