រដ្ឋលេខាធិការក្រសួងអប់រំ យុវជន និងកីឡា ឯកឧត្តម អ៊ុង បូរ៉ាត់ មានប្រសាសន៍ថា នៅក្នុងពិភពលោកដែលកំពុងផ្លាស់ប្តូរយ៉ាងឆាប់រហ័សនេះ ភាពស្ទាត់ជំនាញលើផ្នែក STEM និងបំណិនសតវត្សរ៍ទី២១ តាំងពីវ័យក្មេង គឺជាមូលដ្ឋានគ្រឹះដ៏សំខាន់សម្រាប់ភាពជោគជ័យនាពេលអនាគតរបស់កុមារ។

ការលើកឡើងនេះ បានធ្វើឡើងនៅក្នុងព្រឹត្តិការណ៍ប្រកួតកម្មវិធីសិក្សាបែប STEM ប្រចាំឆ្នាំ២០២៦ Think!Think! World Cup រៀបចំសហការរវាងក្រសួងអប់រំ យុវជន និងកីឡា (MoEYS), ទីភ្នាក់ងារសហប្រតិបត្តិការអន្តរជាតិជប៉ុន (JICA) និង Think!Think! ប្រចាំកម្ពុជា។

ឯកឧត្តម អ៊ុង បូរ៉ាត់ មានប្រសាសន៍ថា កម្មវិធី Think!Think! World Cup មិនមែនគ្រាន់តែជាការប្រកួតប្រជែងមួយប៉ុណ្ណោះទេ ប៉ុន្តែវាគឺជាវេទិកាដ៏សំខាន់មួយដែលជួយឱ្យកុមារបណ្ដុះក្តីស្រឡាញ់ចំពោះជំនាញដ៏ចាំបាច់ទាំងនេះ តាមរយៈបទពិសោធន៍ប្រកបដោយភាពសប្បាយរីករាយ និងមានអត្ថន័យជាទីបំផុត។

លោក Kei Kawashima នាយកប្រតិបត្តិក្រុមហ៊ុន Wonderfy បានមានប្រសាសន៍ថា ជាមូលដ្ឋាន ការអប់រំគួរតែជាបទពិសោធន៍ដ៏រីករាយមួយ។ លោកថា Think!Think! បំផុសគំនិតនៃការចង់ដឹង ចង់ឮពីធម្មជាតិរបស់កុមារ និងទាញចេញសក្តានុពលពេញលេញរបស់ពួកគេ តាមរយៈការធ្វើឱ្យការសិក្សាមានភាពសប្បាយរីករាយ។

នាយកប្រតិបត្តិក្រុមហ៊ុន Wonderfy បន្ថែមថា​ កុមារគ្រប់រូបរីកចម្រើនទៅតាមល្បឿនរបស់ពួកគេរៀងៗខ្លួន ដូច្នេះអ្វីដែលសំខាន់បំផុត គឺពួកគេបានទទួលបទពិសោធន៍​នូវភាពរំភើបរីករាយកើតចេញពីការគិតដ៏ពិតប្រាកដ។ កម្មពិធី World Cup ប្រចាំឆ្នាំនេះ គឺជាការអបអរសាទរការរៀនដែលជម្រុញការគិតបែបនោះ។

“យើងនៅតែប្តេជ្ញាថានឹងនាំមកនូវបច្ចេកវិទ្យា និងជំនាញអប់រំដ៏ល្អបំផុតរបស់ប្រទេសជប៉ុន ដើម្បីផ្តល់ដល់កុមារគ្រប់រូបនៅក្នុងប្រទេសកម្ពុជា”

គួរជំរាបជូនថា Think!Think! គឺជាកម្មវិធីបច្ចេកវិទ្យាអប់រំ (EdTech) ឈានមុខគេរបស់ប្រទេសជប៉ុន ដែលផ្តោតលើការអភិវឌ្ឍជំនាញគិតបែបវិភាគ និងជំនាញមិនមែនពុទ្ធិបញ្ញា (Non-cognitive Skills) របស់កុមារ។ ជាមួយនឹងអ្នកប្រើប្រាស់ជាង ២,៥ លាននាក់ទូទាំងពិភពលោក កម្មវិធីនេះមានល្បែងផ្គុំរូប និងហ្គេមយុទ្ធសាស្ត្រយ៉ាងទូលំទូលាយ ដែលត្រូវបានរចនាឡើងដើម្បីជំរុញចំណង់ចង់រៀនសូត្រពេញមួយជីវិត។

ក្នុងព្រឹត្តិការណ៍ប្រកួតកម្មវិធីសិក្សាបែប STEM ប្រចាំឆ្នាំ២០២៦ ដែលបានប្រព្រឹត្តទៅកាលពីដើមសប្តាហ៍នេះ មានកុមារប្រមាណ១ពាន់នាក់ មកពីសាលា Think!Think!, សាលាបឋមសិក្សារដ្ឋ និងមជ្ឈមណ្ឌលសិក្សាអភិវឌ្ឍន៍ជប៉ុន (JDLC) បានចូលរួមប្រកួត ដើម្បីបង្ហាញពីជំនាញគិតបែបវិភាគ ជំនាញដោះស្រាយបញ្ហា និងភាពច្នៃប្រឌិតផ្នែកគណិតវិទ្យា។ ជាលទ្ធផល សិស្សឆ្នើមចំនួន ២រូបដែលមានពិន្ទុខ្ពស់បំផុតក្នុងប្រភេទថ្នាក់នីមួយៗ ពួកគេ​នឹង​ទទួលបានរង្វាន់សំបុត្រយន្តហោះ និងឱកាសចូលរួមព្រឹត្តិការណ៍ Think!Think! Cup នៅទីក្រុងតូក្យូក្នុងឆ្នាំ ២០២៦៕