បទពិសោធន៍ក្នុងការងារសង្គមជាច្រើនដែល កញ្ញា ហ្គូវ យូអ៉ី ធ្លាប់ឆ្លងកាត់ បានក្លាយជាចំណែកមួយដែលធ្វើឱ្យកញ្ញាឈ្នះពានរង្វាន់ «ទេពកោសល្យយុវជនអាស៊ាន» នៅក្នុងព្រឹត្តិការណ៍ពិព័រណ៍រឿងនិទានចិន អំពី “ខ្ញុំនិងប្រទេសចិន” លើកដំបូង នៃវេទិការកម្មវិធីសិស្សនិស្សិតអាស៊ាន នៃទីក្រុងប៉េកាំង-ទីក្រុងធានជីន-ខេត្តហឺប៉ី ឆ្នាំ២០២៤។ 

កញ្ញា ហ្គូវ យូអ៉ី ជានិស្សិតខ្មែរកំពុងសិក្សាឆ្នាំទី១ នៃមហាវិទ្យាល័យវិទ្យាសាស្ត្រសង្គម នៃសាកលវិទ្យាល័យ Tsinghua University ទីក្រុងប៉េកាំង ប្រទេសចិន។ កញ្ញា ហ្គូវ យូអ៉ី បានប្រាប់ AMS Education ថា ការប្រកួតខាងលើជាវិញ្ញាសារដែលមានប្រធានបទ «Story of Me and China ឬ ចំណងវិស័យរវាងខ្ញុំ និងប្រទេសចិន» ដែលមានចំនួនបេក្ខជនចូលរួមជាង៣ពាន់នាក់ មកពីសាកលវិទ្យាល័យ និងស្ថាបនសិក្សាផ្សេងៗចំនួន៦២។

កញ្ញា យូអ៉ី បន្តថា នៅក្នុងវីដេអូដែលធ្វើឱ្យកញ្ញាអាចឈ្នះពានរង្វាន់បាន គឺដោយសារតែកញ្ញា បានដាក់បញ្ជូលនូវបទពិសោធន៍ក្នុងការងារសង្គមផ្សេងៗរបស់ខ្លួនដូចជា ការរៀនភាសាចិនតាំងពីវ័យកុមារ និងការងារស្ម័គ្រចិត្តផ្សេងៗ ។ កាលពីឆ្នាំ២០១៨ កញ្ញាបានតំណាងឱ្យប្រទេសកម្ពុជាចូលរួមប្រកួតកម្មវិធី «ស្ពានភាសាចិន» ដែលជាកម្មវិធីអន្តរជាតិមានបេក្ខជនចូលរួមពីបណ្ដាប្រទេសជាង១០០លើពិភពលោក។

បទពិសោធន៍បន្ទាប់របស់ យូអ៉ី គឺជាអ្នកបកប្រែភាសាខ្មែរ-ចិននៅក្នុងគម្រោងជំនួយបច្ចេកទេសសំរាប់ការអប់រំនៅកម្ពុជា ដែលជាគម្រោងមួយនៅក្នុងចំណោមគម្រោងទាំងអស់របស់ China Ad ។ លើសពីនេះ កញ្ញា យូអ៉ី ក៏បានធ្វើជាយុវជនស្ម័គ្រចិត្តបកប្រែភាសាចិនក្នុងពិធីបើក-បិទ SEAGAME និង PARA-GAME ដោយធ្វើការជាមួយក្រុមការងារផ្នែកបច្ចេកទេស និងបកប្រែផ្សេងៗ​។ 

បទពិសោធន៍ខាងលើទាំងអស់នេះហើយដែលជាចំណុចជួយឱ្យខ្ញុំមានភាពលេចធ្លោ និងបានឈ្នះពានរង្វាន់នេះផងដែរ

កញ្ញា ហ្គូវ យូអ៉ី ។

ម្ចាស់ពានរង្វាន់ «ទេពកោសល្យយុវជនអាស៊ាន» រូបនេះបន្ថែមថា ក្នុងការប្រកួតមួយនេះបានផ្ដល់បទពិសោធន៍ថ្មីដល់កញ្ញាដែលបានប្រកួតជាមួយបេក្ខជននិស្សិតអន្តរជាតិជាច្រើននាក់ ជាពិសេសពិតជាមានអារម្មណ៍រំភើប និងមានមោទនភាពដែលបានតំណាងឱ្យប្រទេសកម្ពុជា។ លើសពីនេះ កញ្ញាកាន់តែមានមោទនភាពនៅពេលដែលបានស្លៀកឈុតសម្លៀកបំពាក់ខ្មែរ និងកាន់ទង់ជាតិប្រទេសកម្ពុជា ទៅឡើងប្រកួត និងឡើងទទួលពានរង្វាន់នៅលើឆាកអន្តរជាតិ។

អារម្មណ៍ទាំងនេះបានលើកទឹកចិត្តដល់កញ្ញាបន្ថែមឱ្យកាន់តែមោះមុតក្នុងការសិក្សារៀនសូត្រ និងខិតខំប្រឹងប្រែងដើម្បីខ្លួនឯង និងប្រទេសជាតិកាន់តែប្រសើរឡើង។

ជារួម កញ្ញា ហ្គូវ យូអ៉ី សូមលើកទឹកចិត្តដល់សិស្សានុសិស្សទាំងអស់ ត្រូវ ហ៊ានស្រមៃ ហ៊ានគិត ហ៊ានធ្វើនូវអ្វីដែលអ្នកស្រឡាញ់ឱ្យអស់ពីសមត្ថភាព និងកុំបោះបង់ ព្រោះឱកាសនៃការសិក្សា ឬកម្មវិធីប្រកួតប្រជែងនានាជាការផ្ដល់ឱកាសដល់ខ្លួនឯងឱ្យជួបមនុស្សថ្មីៗ បទពិសោធន៍ច្រើនផ្សេងគ្នា និងរៀនសូត្របានច្រើនផងដែរ៕