យុវជនកម្ពុជាចំនួន២រូប គឺលោក តូច ឥនសុភា និងកញ្ញា ឈិត ហេឡែន ត្រូវបានជ្រើសរើសឱ្យ​ទទួលពានរង្វាន់ យុវជនថាមពលអាស៊ាន លើកទី៥ ក្នុងផ្នែកគោលនយោបាយ នៅទីក្រុងគូជីង ប្រទេសម៉ាឡេស៊ី។

នៅក្នុងការចូលរួមប្រកួតខាងលើនេះ គឺបើកសម្រាប់គ្រប់យុវជនអាស៊ានទាំង១០ប្រទេស ដែលមានអ្នកចូលរួម ៣៨៤ ក្រុម ប្រមាណជាង ៦៩៦ យុវជនមកពីបណ្ដាប្រទេសអាស៊ាន។ ហើយការជ្រើសរើសជ័យលាភីមាន ៩ក្រុម ដូចជា ៣ក្រុម សម្រាប់ Policy pitch ៣ក្រុម សម្រាប់ Video pitch និង៣ក្រុមទៀត សម្រាប់ Infographic pitch។

ការ​ប្រកួតអន្តរជាតិសម្រាប់ពានរង្វាន់ 5th ASEAN Energy Youth Award បាន​ប្រព្រឹត្តទៅរយៈពេលពីរថ្ងៃ គឺចាប់ពីថ្ងៃទី៣ ដល់ថ្ងៃទី ៤ ខែកញ្ញា នាទីក្រុងគូជីង រដ្ឋសហព័ន្ធសារ៉ាវ៉ាក់ ប្រទេសម៉ាឡេស៊ី ក្រោមសន្និបាត Sustainability and Renewable Energy Forum (SAREF 4.0) ដោយ​លោក តូច ឥនសុភា បានលើកយកប្រធានបទ “កិច្ចសហការថាមពលទឹកឆ្លងព្រំដែន – Cross Border Hydro Synergy” មកធ្វើបទបង្ហាញ។

ក្នុងការប្រកួតនេះ ក្រុមកម្ពុជា ដែលដឹកនាំដោយលោក ឥនសុភា បានបង្ហាញដំណោះស្រាយច្នៃប្រឌិតដោយការផ្សាភ្ជាប់បច្ចេកវិទ្យា បញ្ញាសិប្បនិមិត្ត (AI) ជាមួយវិស័យថាមពលជលធាតុ ដើម្បីបង្កើតប្រព័ន្ធផលិត និងចែកចាយថាមពលស្អាតប្រកបដោយប្រសិទ្ធភាព។ គម្រោងរបស់ក្រុមកម្ពុជា មានការច្នៃប្រឌិតជាចម្បងលើការប៉ាន់ស្មានតម្រូវការថាមពល ការតាមដានការផលិតជាពេលវេលាពិត និងការបង្កើនប្រសិទ្ធភាពស្ថានីយ៍ថាមពល។ ការចូលរួមក្នុងការប្រកួតនេះ បានផ្តល់ឱកាសដល់ ឥនសុភា ក្នុងការស្វែងយល់ពីបញ្ហាថាមពលក្នុងតំបន់ ការបង្កើតបណ្តាញទំនាក់ទំនងអន្តរជាតិ និងការអភិវឌ្ឍន៍ជំនាញក្នុងការបង្ហាញ និងការដឹកនាំ។

លោក តូច ឥនសុភា និងកញ្ញា ឈិត ហេឡែន ពិតជាមានកិត្តិយស និងមានមោទនភាពដែលបានទទួលពានរង្វាន់ យុវជនថាមពលអាស៊ាន ប្រចាំតំបន់អាស៊ាន។ ក្នុងនាមជានិស្សិតផ្នែកបច្ចេកវិទ្យាព័ត៌មាន និងវិទ្យាសាស្ត្រ មកពីប្រទេសកម្ពុជា នេះជាឱកាសដែលយើងអាចយកចំណេះដឹងផ្នែកបច្ចេកវិទ្យា​​ ក៏ដូចជាការប្រើប្រាស់បច្ចេកវិទ្យាបញ្ញាសិប្បនិម្មិត មករួមបញ្ចូលជាមួយនឹងវិស័យថាមពលអាស៊ាន ដើម្បីបង្កើតឡើងនូវថាមពលស្អាត ដែលមិនត្រឹមតែសម្រាប់អាស៊ានទាំង១០ប្រទេសនោះទេ តែសម្រាប់ពិភពលោកទាំងមូលផងដែរ។ នេះមិនមែនត្រឹមតែជាជោគជ័យរបស់យើងទាំង២នាក់នោះទេ តែជាសមិទ្ធិផលរួមនៃប្រទេសកម្ពុជាយើង និងអាស៊ានទាំងមូល។

តាមបទពិសោធន៍នេះ លោក ឥនសុភា បានមើលឃើញថា សមត្ថភាពរបស់យុវជនកម្ពុជាមានប្រសិទ្ធភាពមិនទាបជាងយុវជនអាស៊ានទេ។ លោកសង្កត់ធ្ងន់ថា យុវជនកម្ពុជាមានទាំងជំនាញបច្ចេកទេសដូចជា ការសរសេរកម្មវិធី និងការវិភាគទិន្នន័យ ព្រមទាំងជំនាញទន់ដូចជា ការធ្វើការជាក្រុម ការទំនាក់ទំនង និងភាពជាអ្នកដឹកនាំ។ នេះបានបញ្ជាក់ថា កម្ពុជាអាចប្រកួតប្រជែង និងសហការជាមួយប្រទេសក្នុងតំបន់ ដើម្បីជំរុញការអភិវឌ្ឍន៍វិស័យបច្ចេកវិទ្យា។

សម្រាប់អនាគត ឥនសុភា មានចក្ខុវិស័យចង់បន្តសិក្សានៅក្នុងវិស័យ AI Law (នីតិបញ្ញាសិប្បនិមិត្ត) ដើម្បីចូលរួមកំណត់ និងគ្រប់គ្រងប្រព័ន្ធច្បាប់ពាក់ព័ន្ធនឹងបញ្ញាសិប្បនិម្មិត។ ក្រៅពីនេះ ឥនសុភា ក៏បានផ្ដល់សារលើកទឹកចិត្តដល់យុវជនកម្ពុជាឱ្យក្លាហាន ចូលរួមក្នុងការប្រកួតប្រជែងទាំងក្នុង និងក្រៅប្រទេស ដើម្បីទទួលបានបទពិសោធន៍ថ្មីៗ ការស្វែងយល់អំពីសង្គម និងការបើកទស្សនៈអន្តរជាតិឱ្យកាន់តែទូលំទូលាយ។

កម្មវិធីយុវជនថាមពលអាស៊ាន ត្រូវ​បាន​បង្កើតឡើងដោយមានគោលបំណងបង្កើនការយល់ដឹងក្នុងចំណោមយុវជនអំពីកិច្ចសហប្រតិបត្តិការថាមពលក្នុងតំបន់ លើដំណោះស្រាយថាមពលវារីអគ្គិសនី និងថាមពលកកើតឡើងវិញ។ វាក៏បម្រើជាវេទិកាមួយសម្រាប់អ្នកចូលរួមសំខាន់ៗ ដើម្បីរួមចំណែកដល់ការកសាងដំណាក់កាលបន្ត នៃផែនការសកម្មភាពអាស៊ានសម្រាប់កិច្ចសហប្រតិបត្តិការថាមពល (APAEC)។ ដោយឡែកប្រធានបទសំខាន់ សម្រាប់ពានរង្វាន់ យុវជនថាមពលអាស៊ាន លើកទី៥ គឺ “ផ្តល់ថាមពលដល់អនាគតអាស៊ាន ៖ នវានុវត្តន៍របស់យុវជនក្នុងផ្នែកវារីអគ្គិសនី និងថាមពលកកើតឡើងវិញ”៕