នៅពេលដែលអ្នកបន្តអភិវឌ្ឍបំណិនជីវិត (Life Skill) ជាប្រចាំ អ្នកនឹងទទួលបានភាពជឿជាក់ និងឯករាជ្យភាព ក្នុងការរស់នៅ។ ត្បិតថា មិនអាចក្លាយជាអ្នកជំនាញទៅលើជំនាញទាំងអស់ ប៉ុន្តែការយល់ដឹងពីមូលដ្ឋានគ្រឹះនៃជំនាញ នឹងជំរុញឱ្យអ្នករស់នៅក្នុងជីវិតជាយុវវ័យ ដោយមិនមានអារម្មណ៍ថាលំបាកនៅពេលជួបបញ្ហា និងឧបសគ្គផ្សេងៗ។ យោងតាម BetterUp យុវជនសម័យថ្មី គួរសិក្សាពីជំនាញសំខាន់ចំនួន ៥ ដើម្បីរស់នៅក្នុងភាពជាមនុស្សពេញវ័យដោយឯករាជ្យ។

១. ជំនាញបញ្ញាផ្នែកអារម្មណ៍ (EQ) ៖ បញ្ញាផ្នែកអារម្មណ៍ ដែលជាទូទៅត្រូវបានគេស្គាល់ថា EI ឬ EQ គឺជាសមត្ថភាពក្នុងការយល់ និងគ្រប់គ្រងខ្លួនឯង ព្រមទាំងអាចយល់អំពីអារម្មណ៍អ្នកដទៃ។ បញ្ញាផ្នែកអារម្មណ៍ស្ដែងឡើងតាមរយៈរបៀបដែលយើងមើលថែខ្លួនឯង និងយល់ចិត្តមនុស្សជុំវិញខ្លួន។ នៅក្នុងជំនាញបញ្ញាផ្នែកអារម្មណ៍មានជំនាញសំខាន់ៗចំនួនបី ដែលអ្នកត្រូវមានដោយខានពុំបាន គឺ សមត្ថភាពនិយាយការពារ និងគាំទ្រគំនិតខ្លួនឯង ឬនរណាម្នាក់ (Assertiveness) សមត្ថភាពយល់ពីអារម្មណ៍អ្នកដទៃ (Empathy) និងការទទួលដឹងច្បាស់ថាខ្លួនឯងកំពុងតែធ្វើអ្វី (Self-awareness)។

២. ការងារផ្ទះ (Housekeeping) ៖ មនុស្សភាគច្រើនមិនចូលចិត្តការងារផ្ទះនោះទេ និងតែងតែមានទម្លាប់ពន្យាពេល នៅពេលដែលត្រូវធ្វើការងារផ្ទះ។ ប៉ុន្តែប្រសិនបើអ្នកមានទម្លាប់គិតថាការងារនេះ ជាកិច្ចការចាំបាច់ អ្នកនឹងអាចសម្រេចកិច្ចការទាំងនេះ​បានលឿន និងមានប្រសិទ្ធភាព។ ជាពិសេស អ្នកនឹងមានអារម្មណ៍រីករាយ ខណៈពេលកំពុងធ្វើ ឬធ្វើកិច្ចការនោះរួចរាល់។ ជំនាញសំខាន់ៗក្នុងផ្ទះ ដែលយុវវ័យគួរចេះ មានដូចជា ជំនាញចម្អិនអាហារ ជំនាញជួសជុលឧបករណ៍ប្រើប្រាស់ក្នុងផ្ទះ និងជំនាញតុបតែង និងរៀបចំផ្ទះ។

៣. ជំនាញបង្កើត និងរក្សាទំនាក់ទំនង (Relationship skills) ៖ ការបង្កើត និងចំណាយពេលវេលាល្អៗជាមួយគ្រួសារ សាច់ញាតិ មិត្តភក្ដិ និងដៃគូស្នេហា គឺជារឿងសំខាន់ ដែលមនុស្សពេញវ័យត្រូវធ្វើ។ ការបង្កើតឱ្យមានទម្លាប់នេះ នឹងធ្វើឱ្យទំនាក់ទំនងជាមួយមនុស្សជុំវិញខ្លួនមានភាពស្អិតរមួត និងល្អប្រសើរ។ លើសនេះ អ្នកនឹងយល់ដឹងកាន់តែប្រសើរអំពីមនុស្សជាទីស្រឡាញ់របស់អ្នក។

៤. ជំនាញគ្រប់គ្រងលុយ (Money Management skills) ៖ ជំនាញគ្រប់គ្រងលុយ មិនត្រូវបានបង្រៀននៅក្នុងសាលានោះទេ។ ហេតុនេះហើយបានជាមនុស្សជាច្រើន មានបញ្ហាហិរញ្ញវត្ថុ ខណៈវិបត្តិហិរញ្ញវត្ថុនេះ ក៏ជាប្រភពនៃភាពតានតឹងផងដែរ។ យ៉ាងណាក៏ដោយ គ្មានពាក្យថាយឺតពេលក្នុងការចាប់ផ្ដើមបង្កើតទម្លាប់គ្រប់គ្រងលុយឱ្យមានរបៀបរៀបរយនោះទេ។ ដើម្បីបន្ធូរបន្ថយភាពតានតឹងផ្នែកហិរញ្ញវត្ថុ យុវជនត្រូវសិក្សាអំពីការគ្រប់គ្រងចំណូលចំណាយ (Budgeting) បង្កើតគណនីសន្សំ មានគណនីសន្សំសម្រាប់ជីវិតក្រោយចូលនិវត្តន៍ និងសិក្សាអំពីសេវាកម្មធានារ៉ាប់រ៉ង។

៥. ជំនាញបច្ចេកវិទ្យា (Tech skill) ៖ បច្ចេកវិទ្យាបានក្លាយជាផ្នែកមួយដ៏សំខាន់ សម្រាប់ការរស់នៅក្នុងពិភពលោកសម័យទំនើប ហើយជំនាញមួយចំនួននៅក្នុងវិស័យបច្ចេកវិទ្យា រឹតតែមានសារៈសំខាន់ខ្លាំងសម្រាប់សុវត្ថិភាពផ្ទាល់ខ្លួន និងការអភិវឌ្ឍវិជ្ជាជីវៈ។ យោងតាម​ វិទ្យាស្ថានសម្រាប់អនាគត (Institute for the future) បានឱ្យដឹងថា ៨៥ភាគរយ នៃការងារដែលនឹងមានតម្រូវការខ្ពស់នៅឆ្នាំ ២០៣០ មិនទាន់បានបង្កើតនៅឡើយទេ។ ដូច្នេះ ក្នុងនាមជាយុវជន និងមនុស្សសម័យថ្មី អ្នកត្រូវបន្តស្វែងយល់ពីបច្ចេកវិទ្យាជាប្រចាំ ដើម្បីតាមទាន់ការវិវត្តន៍នៃពិភពលោក និងមានឱកាសបំពេញការងារនៅក្រុមហ៊ុនធំៗ។ ជំនាញបច្ចេកវិទ្យាមូលដ្ឋាន ដែលអ្នកត្រូវចេះមានដូចជា សុវត្ថិភាពឌីជីថល (Digital Safety) ការគ្រប់គ្រងលេខកូដសម្ងាត់ (Password management) ការគិតបែបត្រិះរិះ (Critical Thinking) និងការទំនាក់ទំនងតាមប្រព័ន្ធឌីជីថល៕