ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បុណ្យ មាឃបូជា គឺជាពិធីបុណ្យដ៏សំខាន់មួយនៅក្នុងព្រះពុទ្ធសាសនា ដែលតែងប្រារព្ធធ្វើឡើង នៅថ្ងៃ១៥កើត ខែមាឃ ជារៀងរាល់ឆ្នាំ។ ដោយឡែកឆ្នាំនេះ ប្រទេសកម្ពុជា ដែលព្រះពុទ្ធសាសនា ត្រូវបានចាត់ទុកជាសាសនារបស់រដ្ឋ នឹងរៀបចំពិធីបុណ្យមាឃបូជា នៅបរិវេណ ព្រះមហាសក្យមុនីចេតិយ ភ្នំព្រះរាជទ្រព្យ ស្ថិតក្នុងស្រុកពញាព្ញ ខេត្តកណ្តាល រយៈពេល២ថ្ងៃ គឺនៅថ្ងៃពុធ ១៥កើត និងថ្ងៃព្រស្បតិ៍ ១រោច ខែមាឃ ព.ស.២៥៦៨ ត្រូវនឹងថ្ងៃទី១២ និងថ្ងៃទី១៣ ខែកុម្ភៈ ឆ្នាំ២០២៥។
ឯកឧត្ដម ឆាត សុឆេត មន្រ្តីជាន់ខ្ពស់ និងជាអ្នកនាំពាក្យក្រសួងធម្មការ និងសាសនា មានប្រសាសន៍ថា ជារៀងរាល់ឆ្នាំ រាជរដ្ឋាភិបាល ក្រសួងធម្មការ និងសាសនា ក៏ដូចជាគណៈសង្ឃនាយកទាំងពីរគណៈ តែងតែយកចិត្តទុកដាក់ក្នុងការរៀបចំពិធីបុណ្យមាឃបូជា ដោយចង់ឃើញព្រឹត្តិការណ៍នេះ មានភាពផុសផុលកាន់តែច្រើនឡើង ពោរពេញទៅដោយភាពរីករាយ និងសប្បាយចិត្ត។
“យើងចង់ឃើញឱ្យព្រឹត្តិការណ៍នេះ គឺផុសផុលកាន់តែច្រើនឡើង… យើងចង់ឱ្យពិធីនេះ ជាពិធីមួយពោរពេញទៅដោយភាពរីករាយ សប្បាយចិត្ត…”
បើតាមក្រសួងធម្មការ និងសាសនា មាឃបូជា គឺជាបុណ្យដ៏សំខាន់មួយនៅក្នុងព្រះពុទ្ធសាសនា ដែលប្រារព្ធឡើងដើម្បីរំលឹកដល់ហេតុការណ៍សំខាន់ៗពីរយ៉ាង ទី១ ជាថ្ងៃចតុរង្គសន្និបាត ជាការជួបប្រជុំប្រកបដោយអង្គ៤ គឺ ព្រះសង្ឃសមណទូត ១២៥០អង្គ និមន្តមកជួបជុំគ្នាដោយមិនបានណាត់គ្នាជាមុន, ព្រះសង្ឃទាំងអស់សុទ្ធតែជាឯហិភិក្ខុ (ឯហិភិក្ខុឧបសម្បទា), ព្រះសង្ឃទាំងអស់សុទ្ធតែជាព្រះអរហន្តបានអភិញ្ញា៦, ថ្ងៃ១៥កើត ជាថ្ងៃពេញបូណ៍មីខែមាឃ និង ទី២ ជាថ្ងៃដែលព្រះសម្មាសម្ពុទ្ធទ្រង់ប្រកាសកំណត់ព្រះជន្មាយុសង្ខារ។
ជាការកត់សម្គាល់របស់ ឯកឧត្ដម ឆាត សុឆេត បច្ចុប្បន្ននេះ ពីមួយឆ្នាំទៅមួយឆ្នាំ យុវជនកម្ពុជាបានស្គាល់កាន់តែច្បាស់ពីពិធីបុណ្យមាឃបូជា តាមរយៈការទទួលព័ត៌មានកាន់តែឆាប់រហ័សតាមបណ្តាញសង្គម ក្នុងនោះយុវជនមួយចំនួនធំបានចងចាំនូវព្រឹត្តិការណ៍សំខាន់ៗក្នុងពិធីបុណ្យមាឃបូជានេះយ៉ាងច្បាស់ ។
ជាមួយគ្នានេះដែរ ឯកឧត្តមក៏កត់សម្គាល់ឃើញដែរថា យុវជនបានចូលរួមក្នុងពិធីបុណ្យមាឃបូជាយ៉ាងស្រស្រាក់ស្រស្រាំ ដោយពួកគាត់ស្លៀកសម្លៀកបំពាក់សមរម្យ មើលទៅប្រកបដោយទឹកចិត្តជ្រះថ្លា និងគួរជាទីកោតសរសើរ ដោយឯកឧត្តម ស្នើដោយទទូចដល់យុវជនសូមបន្តនូវសកម្មភាព ទង្វើ ក៏ដូចជាកិច្ចការទាំងអស់នេះបន្តទៀត ដើម្បីឱ្យសង្គមជាតិរបស់យើងកាន់តែរុងរឿងឡើង៕
