ការត្រៀមលក្ខណៈសម្រាប់ សមាជិកថ្មី គឺជារឿងសំខាន់បំផុតសម្រាប់ឪពុកម្តាយគ្រប់រូប។ ការទិញសម្ភារៈប្រើប្រាស់សម្រាប់ទារកតូច គឺជាកិច្ចការមួយដែលធ្វើឱ្យអ្នកម្តាយជាច្រើនមានអារម្មណ៍ថា ភ្លេចមុខ ភ្លេចក្រោយ ឬទិញខ្វះជាដើម។ ដើម្បីជួយសម្រួលដល់ការរៀបចំនេះ យើងបានចងក្រងនូវបញ្ជីសម្ភារៈសំខាន់ៗដែលអ្នកម្តាយគួរទិញទុកជាមុន សម្រាប់ត្រៀមប្រើប្រាស់ក្រោយពេលសម្រាលកូនរួច។

១. សម្លៀកបំពាក់សម្រាប់ទារក

ការជ្រើសរើសសម្លៀកបំពាក់ដែលមានផាសុកភាព និងសុវត្ថិភាព គឺជារឿងសំខាន់បំផុត ដូច្នេះអ្នកម្តាយអាចត្រៀម ៖

• អាវដៃខ្លី និង អាវដៃវែង
• អាវឈុតទារក (Bodysuits/Rompers): គួរជ្រើសរើសសាច់ទន់ និងងាយស្រួលស្លៀកពាក់
• ខោជើងខ្លី និង ខោជើងវែង
• ស្រោមជើង និងស្រោមដៃ: គួរជ្រើសរើសប្រភេទដែលមិនរឹបកដៃ ឬកជើងពេក
• មួកទារក: ជ្រើសរើសប្រភេទដែលអាចឱ្យមានខ្យល់ចេញចូលល្អ
• ក្រណាត់រុំទារក (Swaddle/Receiving Blanket): សម្រាប់រុំទារកឱ្យមានអារម្មណ៍កក់ក្តៅ និងសុវត្ថិភាព។

២. សម្ភារៈសុខភាពសម្រាប់ទារក

ការថែទាំសុខភាព និងអនាម័យទារក គឺមិនអាចមើលរំលងបានឡើយ។ អ្នកម្តាយអាចត្រៀមសម្ភារៈមួយចំនួនដូចជា ៖

• កន្ត្រៃកាត់ក្រចក (មានគែមមូល): សម្រាប់កាត់ក្រចកទារកដោយសុវត្ថិភាព
• ប្រដាប់វាស់កម្ដៅទារក (Thermometer): សម្រាប់តាមដានសីតុណ្ហភាពខ្លួនទារក
• គ្រីមលាប រោល ឬផ្តល់សំណើម: សម្រាប់ការពារ និងព្យាបាលបញ្ហាស្បែកទារក
• ប្រអប់ First-Aid សម្រាប់ទារក (មូលដ្ឋាន): សម្រាប់ទុកសម្ភារៈសង្គ្រោះបឋម និងថ្នាំមូលដ្ឋាន។

៣. សម្ភារៈប្តូរខោទឹកនោមទារក

ការប្តូរខោទឹកនោម អាចនឹងក្លាយជាទម្លាប់ប្រចាំថ្ងៃរបស់អ្នកម្តាយ ដូច្នេះត្រូវត្រៀមឱ្យបានគ្រប់គ្រាន់ដូចជា ៖

• ខោទឹកនោម (ប្រភេទដែលអាចប្រើឡើងវិញបាន ឬបោះចោល): គួរត្រៀមទុកទាំងទំហំសម្រាប់ទារកទើបនឹងកើត (Newborn size)
• ក្រដាសសើម (Baby Wipes): សម្រាប់ជូតសម្អាតកន្លែងដែលប្រឡាក់
• គ្រីមលាប បំបាត់រលាកស្បែក (Diaper Rash Cream): សម្រាប់ការពារការរលាកដោយសារទឹកនោម
• ក្រដាសស្ងួតទារក ឬកន្សែងទន់ (Dry Wipes): សម្រាប់ជូតឱ្យស្ងួតមុនពេលលាបគ្រីម។

៤. សម្ភារៈងូតទឹកសម្រាប់ទារក

ការងូតទឹក គឺជាពេលវេលាល្អសម្រាប់បង្កើតទំនាក់ទំនងជាមួយកូន សូមត្រៀម ៖

• អាងងូតទារក (Baby Tub): សម្រាប់ងូតទឹកដោយសុវត្ថិភាព
• សាប៊ូកក់សក់ និងសាប៊ូដុសខ្លួនសម្រាប់ទារក: គួរជ្រើសរើសប្រភេទដែលគ្មានជាតិគីមី និងមិនធ្វើឱ្យក្រហាយភ្នែក
• កន្សែងជូតខ្លួនទារក (មានមួក): ជ្រើសរើសប្រភេទទន់ៗ អាចជក់ទឹកបានល្អ។

៥. សម្ភារៈប្រើប្រាស់សម្រាប់ការគេងទារក

ការគេងគ្រប់គ្រាន់ គឺសំខាន់ណាស់សម្រាប់ទារក និងអ្នកម្តាយ ប្រសិនបើមានថវិកាគ្រប់គ្រាន់ អាច​ត្រៀមសម្ភារៈដូចជា ៖

• គ្រែទារក (Crib/Bassinet): គួរមានលក្ខណៈរឹងមាំ និងមានសុវត្ថិភាព
• ពូកទន់ៗ មានផាសុកភាព: គួរជ្រើសរើសពូកដែលមិនទន់ពេក និងសមស្របតាមស្តង់ដារសុវត្ថិភាព
• ខ្នើយ និងភួយ: គួរប្រើដោយមានការប្រុងប្រយ័ត្នខ្ពស់ ដោយយោងតាមការណែនាំសុវត្ថិភាពដើម្បីការពារហានិភ័យនៃ SIDS (Sudden Infant Death Syndrome) – ទារកមិនគួរគេងជាមួយភួយ ឬខ្នើយក្រាស់ៗទេ។

៦. សម្ភារៈបំបៅទារក

មិនថាអ្នកបំបៅកូនដោយទឹកដោះម្តាយ ឬទឹកដោះគោទេ សម្ភារៈទាំងនេះគឺមានសារៈសំខាន់ ៖

• ដបទឹកដោះគោ និងក្បាលដោះ (Nipples): គួរត្រៀមទុកជាច្រើនដប
• ម្សៅទឹកដោះគោ (Formula Milk): (ប្រសិនបើអ្នកមានគម្រោងប្រើប្រាស់ ឬមិនបំបៅដោយទឹកដោះម្តាយទាំងស្រុង)
• ម៉ាស៊ីនបូមទឹកដោះ (Breast Pump): (សម្រាប់អ្នកម្តាយបំបៅកូនដោយទឹកដោះ)
• សាប៊ូលាងដប និង ជក់លាងដប
• ម៉ាស៊ីនសម្លាប់មេរោគដបទឹកដោះគោ (Sterilizer): សម្រាប់ធានាអនាម័យ
• កន្សែង ឬអៀមទារក (Burp Cloths/Bibs): សម្រាប់ជូតមាត់ និងការពារសម្លៀកបំពាក់កុំឱ្យប្រឡាក់
• ខ្នើយសម្រាប់បំបៅទារក (Nursing Pillow): ជួយសម្រួលដល់ការអង្គុយបំបៅកូន។

៧. សម្ភារៈធ្វើដំណើរសម្រាប់ទារក

ការធ្វើដំណើរជាមួយទារក ត្រូវការការត្រៀមលក្ខណៈបន្ថែម ដូចជា ៖

• កៅអីឡានសុវត្ថិភាពសម្រាប់ទារក (Car Seat): នេះជាសម្ភារៈដ៏សំខាន់បំផុតសម្រាប់ការដឹកជញ្ជូនទារកដោយសុវត្ថិភាព
• រទេះរុញទារក (Stroller): សម្រាប់ងាយស្រួលក្នុងការធ្វើដំណើរទៅក្រៅ
• ប្រដាប់ស្តាយទារក (Baby Carrier/Wrap): សម្រាប់ពកូនជាប់នឹងខ្លួន
• កាបូបសម្រាប់ដាក់សម្ភារទារក (Diaper Bag): សម្រាប់ដាក់សម្ភារៈទាំងអស់នៅពេលចេញក្រៅ។

ចំណាំ ៖ ការទិញសម្ភារៈត្រៀមទុក គឺមិនចាំបាច់ត្រូវតែទិញទាំងអស់ក្នុងពេលតែមួយ និងមិនចាំបាច់ត្រូវតែថ្លៃៗទាំងអស់នោះទេ។ សូមជ្រើសរើសសម្ភារៈណាដែលមានសុវត្ថិភាព ងាយស្រួលប្រើប្រាស់ និងសមស្របតាមតម្រូវការជាក់ស្តែងរបស់គ្រួសារ៕