ជំនាញវិទ្យាសាស្ត្រទិន្នន័យ (Data Science) និងបញ្ញាសិប្បនិម្មិត (AI) ជាជំនាញដែលកំពុងមានតម្រូវការខ្ពស់នៅកម្ពុជា និងអាចយកទៅប្រើបាននៅគ្រប់វិស័យ ។

លោកស្រីបណ្ឌិត ព្រហ្ម សុភា សាស្ត្រាចារ្យនៃសាកលវិទ្យាល័យខេមតិច ថា ការរៀនជំនាញវិទ្យាសាស្ត្រទិន្នន័យ គឺជាការរៀនអំពីមុខវិជ្ជាមួយ ដែលជួយឱ្យយើងអាចសម្រេចចិត្តលើរឿងអ្វីមួយ ដោយផ្អែកលើទិន្នន័យ ខណៈបញ្ញាសិប្បនិម្មិត គឺជាបញ្ញាដែលបង្កើតឡើងដោយមនុស្ស ហើយជាបច្ចេកវិទ្យាដែលមានសមត្ថភាព អាចសម្រេចចិត្តលើរឿងអ្វីមួយដោយខ្លួនឯង។

លោកស្រីបណ្ឌិត ព្រហ្ម សុភា មានប្រសាសន៍ថា បច្ចុប្បន្នជំនាញទាំងពីរនេះ គឺជាជំនាញថ្មីនៅកម្ពុជា និងមិនទាន់មានការប្រើប្រាស់ទូលំទូលាយនៅឡើយទេ ដូច្នេះចំពោះទីផ្សារការងារវិញ ជំនាញនេះ មានទីផ្សារការងារមានទូលំទូលាយខ្លាំង ដោយក្រោយពីបញ្ចប់ការសិក្សានិស្សិតអាចធ្វើការនៅគ្រប់វិស័យ។

បើតាមលោកស្រីសាស្ត្រាចារ្យ ដើម្បីអាចចូលរៀនជំនាញនេះបាន សិស្សនិស្សិតក៏ត្រូវមានការខិតខំប្រឹងប្រែង អត់ធ្មត់ខ្ពស់ និងត្រូវមានចំណេះដឹងមូលដ្ឋានលើជំនាញវិទ្យាសាស្ត្រ​ផងដែរ។

ដើម្បីសិក្សាលើជំនាញនេះ និស្សិតត្រូវមានចំណូលចិត្តលើបច្ចេកវិទ្យា គណិតវិទ្យា និងការធ្វើអាជីវកម្ម។ ខណៈនិស្សិតត្រូវចំណាយពេលរៀន ត្រឹមតែ ៣ឆ្នាំប៉ុណ្ណោះ។

លោកស្រីបណ្ឌិត ព្រហ្ម សុភា

លោក ហុង សុវណ្ណដារ៉ា ប្រធាននាយកដ្ឋានធនធានមនុស្សនៃធនាគារកាណាឌីយ៉ា និងជាអ្នកជំនាញលើវិស័យគ្រប់គ្រងធនធានមនុស្ស បានលើកឡើងថា ចំពោះបច្ចេកវិទ្យាបញ្ញាសិប្បនិម្មិត (AI) អាចជារឿងថ្មីសម្រាប់កម្ពុជា ប៉ុន្តែវិទ្យាសាស្ត្រទិន្នន័យ (Data Science) មិនមែនជារឿងថ្មីទេ ក្នុងវិស័យការងារ ព្រោះជំនាញនេះមានតម្រូវការ និងត្រូវបានប្រើប្រាស់សម្រាប់ប្រតិបត្តិការការងារយូរមកហើយ។ ប៉ុ​ន្តែបច្ចុប្បន្នជំនាញវិទ្យាសាស្ត្រទិន្នន័យ និងបញ្ញាសិប្បនិម្មិត កាន់តែមានតម្រូវការ និងមានសារៈសំខាន់ខ្លាំង។ ជាពិសេស នៅក្នុងវិស័យគ្រប់គ្រងធនធានមនុស្ស (HR) វិស័យហិរញ្ញវត្ថុ វិស័យបច្ចេកវិទ្យា វិស័យកសិកម្ម ការធ្វើសាវនកម្ម ការគ្រប់គ្រង ការធ្វើអាជីវកម្មតាមបែបឌីជីថល និងការធ្វើទីផ្សារ ។ល។

យ៉ាងណាក៏ដោយចំពោះនិស្សិតដែលចាប់អារម្មណ៍ចង់រៀនជំនាញនេះ មានសាលាមួយចំនួនតម្រូវឱ្យមានការប្រឡងជ្រើសរើសនិស្សិត ខណៈសាលាមួយចំនួនទៀតមិនមានលក្ខណៈនេះទេ។ ប៉ុន្តែប្រសិនបើមានលក្ខខណ្ឌប្រឡងចូលរៀន មុខវិជ្ជាគណិតវិទ្យា និងភាសាអង់គ្លេស គឺជាវិជ្ជាអាទិភាពដែលត្រូវប្រឡង៕