វិទ្យាស្ថានជាតិពហុបច្ចេកទេសតេជោសែន កំពុងប្រកាសជ្រើសរើស សិស្ស និងសាធារណជនទៅរៀនជំនាញបច្ចេកទេស និងវិជ្ជាជីវៈ ជាច្រើនកន្លែងសម្រាប់ថ្នាំសិក្សាថ្មី ក្នុងកម្រិតសញ្ញាបត្របច្ចេកទេស និងវិជ្ជាជីវៈ១ ។

ជំនាញដែលវិទ្យាស្ថានជ្រើសរើស ឱ្យរៀនអាហារូបករណ៍រួមមាន ៖ ជំនាញការថែទាំ និងជួសជុលរថយន្ត, ជំនាញសេវាកម្មបរិក្ខាត្រជាក់ក្នុងគេហដ្ឋាន និងជំនាញការដំឡើងបណ្ដាញអគ្គិសនីក្នុងអគារ។

បេក្ខជននឹងសិក្សាជំនាញបច្ចេកទេសទៅតាមជំនាញនីមួយដូចជា ការថែទាំ និងជួសជុលរថយន្ត សិក្សាពីជំនាញទន់ ប្រមុំ ការពិនិត្យ ផ្លាស់ប្ដូរ និងជួសជុលម៉ាស៊ីនត្រជាក់ និងប្រព័ន្ធម៉ាស៊ីន(ម៉ាស៊ីនឌីហ្សែល និងសាំង) ការថែទាំ និងជួសជុលប្រព័ន្ធចង្កូតបញ្ជាដោយដៃ និងចង្កូតជំនួយថាមពល ការថែទាំ និងជួសជុលប្រព័ន្ធហ្រ្វាំង ការថែទាំ និងជួសជុលប្រព័ន្ធស៊ុស្បង់ស្យុង។

សម្រាប់ជំនាញសេវាកម្មបរិក្ខាត្រជាក់ក្នុងគេហដ្ឋាន នឹងសិក្សាអំពីការប្រើប្រាស់សម្ភារៈ និងបរិក្ខារ ការដំឡើងម៉ាស៊ីនត្រជាក់លើជញ្ជាំង ការថែទាំលាងសម្អាតម៉ាស៊ីនត្រជាក់លើជញ្ជាំង និង ការវាយតម្លៃការខូចខាត និងជួសជុលតូចតាចក្នុងម៉ាស៊ីនត្រជាក់។

ចំពោះជំនាញការដំឡើងបណ្ដាញអគ្គិសនីក្នុងអគារ​ នឹងសិក្សាអំពីការដំឡើងបណញដាញអគ្គិសនីសម្រាប់ប្រព័ន្ធបំភ្លឺ និងឆ្នាប់ចរន្ត ការដំឡើងប្រព័ន្ធសុវត្ថិភាពក្នុងគេហដ្ឋាន និងប្រព័ន្ធសម្រាប់ការប្រាស្រ័យទាក់ទង ការដំឡើងបណ្ដាញចរន្តមេចូលគេហដ្ឋាន និងទូរចែកចាយ និង ការត្រួតពិនិត្យ និងវាយតម្លៃក្រោយបញ្ចប់ការងារ។

លក្ខខណ្ឌនៃការជ្រើសរើស ៖ ជាបេក្ខជនជាសាធារណជនទាំងពីរភេទដែលមានសញ្ជាតិខ្មែរ បានប្រឡងជាប់ ឬធ្លាក់បាក់ឌុប ចំពោះបេក្ខជនជានារី យុវជនក្រីក្រ និងជនមានពិការភាពត្រូវបានផ្ដល់អាទិភាព។ ចំពោះបេក្ខជនមាន ប័ណ្ណសមធម៌ ឬប័ណ្ណបញ្ជាក់គ្រួសារងាយរងហានិភ័យនឹងទទួលបានប្រាក់ឧបត្ថម្ភប្រចាំខែ២៨ម៉ឺនរៀល ក្នុងមួយខែ។

បេក្ខជនដែលមានចំណាប់អារម្មណ៍ក្នុងការដាក់ពាក្យ អាចចុះឈ្មោះតាមរយៈ  https://forms.gle/ntjQNJjRwXavsqzX9 ឬអាចទៅកាន់វិទ្យាស្ថានដោយផ្ទាល់ដែលមានអាស័យដ្ឋាននៅ ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្ដាល។ សម្រាប់ព័ត៌មានបន្ថែមអាចទំនាក់ទំនងទៅកាន់ ០៩៩ ៧៧៧ ៣៧៧ / ០៩៨ ៤៤៤៤ ៩៥ / ០៩២ ៧៣៥ ២៦៣ / ០១៦ ៤៧៥ ៥៤៤ / ០១២ ២១៦ ១៦៩ / ០១១ ៦៧ ៤៥ ៦៧ ៕