ជាកូនកសិករ និងធ្វើស្រែចំការជាមួយឪពុកម្ដាយនៅខេត្តកំពង់ស្ពឺ យុវជន ហែម ហៀន បានសម្រេចចិត្តចាកចេញពីស្រុកកំណើត មកចុះឈ្មោះរៀនជំនាញផលិតនំប៉័ងនៅវិទ្យាស្ថានជាតិសហគ្រិនភាព និងនវានុវត្តន៍ ក្រោមគម្រោងសិក្សាកម្មវិធី “បណ្តុះបណ្តាលជំនាញវិជ្ជាជីវៈ និងបច្ចេកទេស ១,៥ លាននាក់‍ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ”របស់រដ្ឋាភិបាល ដើម្បីស្វែង​រកជំនាញពិតប្រាកដមួយ​សម្រាប់ខ្លួនឯង។

លោក ហែម ហៀន បានប្រាប់ឱ្យដឹងថា ការសម្រេចចាប់យកជំនាញផលិតនំនេះ គឺផ្ដើមពីចិត្តស្រលាញ់ និងចង់ចេះផលិតនំផ្សេងៗ, ការរៀនផលិតនំ នៅវិទ្យាស្ថានជាតិសហគ្រិនភាព និងនវានុវត្តន៍ គឺលោករៀនត្រឹមតែរយៈពេល៤ខែប៉ុណ្ណោះ ដោយលោកគ្រូអ្នកគ្រូបានបង្រៀនទាំងការផលិតនំបុ័ង នំខេក ពោលគឺសុទ្ធសឹងតែជានំដែលពេញនិយមនៅលេីទីផ្សារ និងអាចទទួលបានជំនាញដុតនំមួយយ៉ាងច្បាស់លាស់ និងអាចស្វែងរកការងារធ្វើបានយ៉ាងងាយស្រួលទៀតផង។

យុវជនមកពីខេត្តកំពង់ស្ពឺរូបនេះបន្ថែមថា ការរៀនជំនាញនេះបានធ្វើឱ្យលោកទទួលបានជំនាញមួយពិតប្រាកដ ក្នុងការស្វែងរកការងារធ្វើ ជាក់ស្ដែងកំឡុងពេលរៀនបាន២ខែ លោកអាចចេញទៅហាត់ការងារ និងអាចស្វែងរកការងារនៅកន្លែងផលិតនំប៉័ងបានផងដែរ។

លោក ហែម ហៀង និយាយថា ដំបូងឡើយលោកទទួលបានការងារពីលោកគ្រូបន្ទុកថ្នាក់ដែលបានផ្ដល់ឱកាសឱ្យ​លោកធ្វើជាអ្នកដុតនំ និងការងារផ្សេងៗដែលពាក់ព័ន្ធនឹងជំនាញនេះ ។ ក្រោយពីចេះដុតនំបានច្រើនគួរសម លោកក៏សម្រេចចិត្តសុំគ្រូធ្វើជាអ្នកផលិតនំវិញម្ដង។ បទពិសោធន៍ការងារក្នុងជំនាញធ្វើនំនេះ បានធ្វើ​ឱ្យ​ លោក ហែម ហៀង បង្កើតមហិច្ឆតា ដោយសម្រេចចិត្តចេញរកស៊ីខ្លួនឯង ដើរតួជាអ្នកផ្គត់ផ្គង់នំក្រ័រសង់លក់ទៅកាន់អតិថិជន ទាំងនំឆ្អិន និងនំកក សម្រាប់អតិថិជនតាមបណ្ដាខេត្ត។

« ដើម្បីទទួលបាននំក្រូសង់នីមួយៗ បច្ចេកទេស ជំនាញ និងការចំណាយពេលវេលាច្រេីន ទំរាំទទួលបានផលឱ្យចេញជារូបរាង តែទោះជាយ៉ាងវាមិនមែនជាឧបសគ្គនោះទេព្រោះតែស្រលាញ់ចូលចិត្តខ្ញុំនៅតែអាចបន្តធ្វេីវាបានដោយក្តីរិករាយ»

លោក ហែម ហៀង ។

លោក ហែម ហៀង បានបង្ហាញពីអារម្មណ៍រីករាយ ក្រោយពីទទួលបានជំនាញធ្វើនំ ដោយថា ជំនាញមួយនេះបានផ្លាស់ប្ដូរជីវភាព និងស្ថានភាពជីវិតរបស់លោកឱ្យកាន់តែប្រសើរឡើង ពោល​គឺបានចាកចេញពីអ្នកធ្វើការឱ្យគេ រហូតអាចបង្កើតរបរមួយច្បាស់លាស់សម្រាប់ខ្លួនឯង។ សព្វថ្ងៃ លោក ហែម ហៀង ជាម្ចាស់អាជីវកម្មខ្នាតតូចដែលផលិត និងបោះដុំនំក្រ័រសង់ ដែលមានយីហោ «ក្រ័រសង់ចល័ត- Croissant Chlt» ។

ម្ចាស់អាជីវកម្មខ្នាតតូចរូបនេះបន្ថែមថា ចំពោះអ្នកដែលចង់រៀនជំនាញ មិនថាជំនាញដុតនំ ឬជំនាញផ្សេងៗនោះទេ លោកលេីកទឹកចិត្តឱ្យបងប្អូនបេីកចិត្តផ្តល់ឱកាសឱ្យខ្លួនឯងបានរៀនសូត្រដេីម្បីអភិវឌ្ឍន៍សមត្ថភាពខ្លួនឯង និងយកចិត្តទុកដាក់ក្នុងការរៀនឱ្យបានចប់សព្វគ្រប់ និងតាមដានមើលចិត្តខ្លួនឯងថា ស្រលាញ់ និងចង់រៀនជំនាញណាពិតប្រាកដ៕