យោងតាម WE Forum បានឱ្យដឹងថា ខណៈដែលបញ្ញាសិប្បនិម្មិត (AI) បាននិងកំពុងផ្លាស់ប្ដូររបៀបធ្វើការនៅគ្រប់ឧស្សាហកម្មទូទាំងពិភពលោក។ វត្តមានបច្ចេកវិទ្យានេះ នៅក្នុងវិស័យអប់រំ គឺខុសពីវិស័យដ៏ទៃ ដោយបច្ចេកវិទ្យានេះ នឹងមិនជំនួសការងារគ្រូបង្រៀននោះទេ ប៉ុន្តែបញ្ញាសិប្បនិម្មិត (AI) នឹងបង្កើនសមត្ថភាពគ្រូបង្រៀន ឱ្យកាន់តែល្អប្រសើរជាងមុន។ ការផ្លាស់ប្ដូរនេះ កំពុងដំណើរការរួចហើយ ខណៈទីផ្សារបញ្ញាសិប្បនិម្មិត (AI) ជាសកលនឹងកើនឡើងពី ៥,១៨ពាន់លានដុល្លារក្នុងឆ្នាំ២០២៤ ដល់ ១១២,៣ ពាន់លានដុល្លារនៅឆ្នាំ២០៣៤។

បច្ចុប្បន្នមានការលើកឡើងជាច្រើន អំពីសក្តានុពលរបស់បញ្ញាសិប្បនិម្មិត (AI) ក្នុងការបំពេញការងារក្នុងវិស័យអប់រំ ដោយស្វ័យប្រវត្តិ, រឿងដ៏គួរឱ្យចាប់អារម្មណ៍ជាងនេះ គឺរបៀបដែលគ្រូបង្រៀនអាចធ្វើការជាមួយ AI ដើម្បីបង្កើតបទពិសោធន៍ថ្មី ក្នុងវិស័យអប់រំ។

ចាប់ពីវេទិកាបង្រៀនដែលមានលក្ខណៈបត់បែន សម្រាប់សិស្សរាប់លាននាក់ រហូតដល់មុខងារជំនួយការ AI ដែលជួយគ្រូបង្រៀនឱ្យធ្វើការកាន់តែមានប្រសិទ្ធភាព អនាគតនៃការអប់រំមិនមែនជាការជ្រើសរើសរវាងបញ្ញាសិប្បនិម្មិត (AI) និងគ្រូបង្រៀនជាមនុស្សនោះទេ ប៉ុន្តែគឺជាការប្រើទាំងបញ្ញាសិប្បនិម្មិត (AI) និងគ្រូបង្រៀនជាមនុស្សជាមួយគ្នា ក្នុងពេលតែមួយ ដើម្បីធ្វើឱ្យវិស័យអប់រំ កាន់តែប្រសើរឡើង។

ថាមពលនៃការសហការរវាងមនុស្ស និងបញ្ញាសិប្បនិម្មិត (AI)

ទិដ្ឋភាពនៃការអប់រំនាពេលបច្ចុប្បន្ន ទាំងគ្រូបង្រៀនជា AI និងមនុស្ស សុទ្ធតែនាំមកនូវភាពខ្លាំងក្នុងថ្នាក់រៀន។ ប្រព័ន្ធ AI ពូកែលើកិច្ចការដែលទាមទារឱ្យមានដំណើរការទិន្នន័យច្រើន និងផ្ដល់មតិកែលម្អស្របទៅតាមសមត្ថភាពបុគ្គលម្នាក់ៗ។ វេទិកាទាំងនេះអាចវិភាគនូវគម្រូ នៃការអនុវត្តរបស់សិស្ស កំណត់គម្លាតនៃការរៀនសូត្រ និងកែតម្រូវកម្រិតលំបាកដោយស្វ័យប្រវត្តិក្នុងពេលវេលាជាក់ស្ដែង។

គ្រូបង្រៀនជាមនុស្សនាំមកនូវភាពវៃឆ្លាតផ្នែកអារម្មណ៍ (EQ) ទៅក្នុងថ្នាក់រៀន ដោយបង្ហាញសិស្សនូវភាពស្មុគស្មាញនៃអារម្មណ៍ទៅដល់សិស្ស។ គ្រូបង្រៀនជាមនុស្សយល់អំពីស្ថានភាពស្មុគស្មាញរបស់សិស្ស និងអាចកែសម្រួលវិធីសាស្ត្របង្រៀន ស្របទៅតាមស្ថានភាពសិស្ស។ លើសពីនេះ គ្រូបង្រៀន អាចដើរតួរជាអ្នកណែនាំ បង្ហាញផ្លូវ និងជាគម្រូបំផុសគំនិត និងស្មារតីដល់សិស្ស ហើយជំរុញការអភិវឌ្ឍសមត្ថភាពផ្នែកសង្គម និងអារម្មណ៍របស់សិស្ស។

ទន្ទឹមមនឹងនេះ ភាពអស្ចារ្យនឹងកើតឡើងនៅពេលដែលគ្រូបង្រៀនជាមនុស្សអាចធ្វើការរួមគ្នា ជាមួយ AI ។ យោងតាម ទស្សនាវដ្តី Forbes បានឱ្យដឹងថា គ្រូបង្រៀនចំនួន ៦០ភាគរយ កំពុងប្រើប្រាស់បញ្ញាសិប្បនិម្មិត (AI) នៅក្នុងថ្នាក់រៀនរបស់គេរួចហើយ ដើម្បីដោះស្រាយកិច្ចការប្រចាំថ្ងៃ ដូចជា ការវាយតម្លៃពហុជម្រើស ការតាមដានវឌ្ឍនភាពរបស់សិស្ស និងបង្កើតលំហាត់អនុវត្ត។ ចំណុចទាំងនេះ បានអនុញ្ញាតឱ្យគ្រូបង្រៀន អាចផ្ដោតលើការផ្ដល់មតិកែលម្អ ប្រកបដោយប្រិសទ្ធភាព និងអាចសម្របសម្រួលការពិភាក្សាក្រុម។

កិច្ចសហការរវាង AI និងគ្រូបង្រៀននេះ មិនត្រឹមតែជាការពង្រឹងការអប់រំប៉ុណ្ណោះទេ ប៉ុន្តែសកម្មភាពនេះ បានក្លាយជាជាកត្តាចាំបាច់សម្រាប់ដោះស្រាយបញ្ហាប្រឈមសំខាន់ៗក្នុងវិស័យអប់រំ រួមទាំងភាពតានតឹងដោយសារការងារច្រើនហួសហេតុ និងការអស់ថាមពលទាំងផ្លូវកាយ និងផ្លូវចិត្តរបស់គ្រូបង្រៀន៕