ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការងារបច្ចុប្បន្នតម្រូវឱ្យគ្រប់គ្នាមានជំនាញវិជ្ជាជីវៈច្បាស់លាស់បើទោះបីជាការងារអ្វីក៏ដោយ ដូចនេះការចេះជំនាញមួយក្នុងខ្លួនពិតជាមានសារៈសំខាន់សម្រាប់មនុស្សម្នាក់ៗ។ នេះជាការលើកឡើងរបស់លោក យឺន ខន ជាអតីតសិស្សរៀនជំនាញសេវាកម្មបរិក្ខាត្រជាក់ក្នុងគេហដ្ឋាន នៅមជ្ឈមណ្ឌលបណ្ដុះបណ្ដាលវិជ្ជាជីវៈខេត្តកែប។
លោក យឺន ខន និងភរិយា បានចុះឈ្មោះរៀនជំនាញវិជ្ជាជីវៈក្រោមគម្រោង ១លាន៥សែននាក់របស់រដ្ឋាភិបាលនៅមជ្ឈមណ្ឌលបណ្ដុះបណ្ដាលវិជ្ជាជីវៈខេត្តកែប ជំនាញសេវាកម្មបរិក្ខាត្រជាក់ក្នុងគេហដ្ឋានរយៈពេល៤ខែ និងទើបបញ្ចប់ការសិក្សាកាលពីពេលថ្មីៗនេះ។ លោក យឺន ខន បានប្រាប់ឱ្យដឹងថា លោកបានឈប់រៀនត្រឹមថ្នាក់ទី១០ព្រោះបញ្ហាជីវភាព បន្តក្រោយមកមុនរៀនជំនាញនេះលោកបានរៀនជំនាញវគ្គខ្លីជាច្រើនដូចជា វគ្គកុំព្យូទ័រ វគ្គភាសាអង់គ្លេសសន្ទនា វគ្គជំនាញគ្រប់គ្រង និងដឹកនាំនៅសាលាធនធានមនុស្ស។ ហើយបន្តមកទៀតក៏ធ្លាប់ធ្វើការជាច្រើនកន្លែងដូចជា ការងារជាមួយក្រុមដោះមីននៅខេត្តបន្ទាយមានជ័យប្រហែល៥ឆ្នាំ រួចទៅធ្វើការនៅសណ្ឋាគារ២ឆ្នាំ និងនៅអគ្គិសនី៣ឆ្នាំ។
មានបទពិសោធន៍ការងារច្រើនកន្លែង ប៉ុន្តែមិនទាន់មានជំនាញច្បាស់លាស់ទើបលោក យឺន ខន សម្រេចចិត្តទៅរៀនវគ្គខ្លីជំនាញបរិក្ខាត្រជាក់ក្នុងគេហដ្ឋាន ដើម្បីមានជំនាញច្បាស់លាស់ និងអាចស្វែងរកការងារបានកាន់តែងាយស្រួល។ លោក យឺន ខន បន្ថែមថា ការទៅរៀននេះ លោកក៏បាននាំភរិយាទៅរៀនផងដែរ គឺរៀនជំនាញសម្អាងកាយនៅមជ្ឈមណ្ឌលបណ្ដុះបណ្ដាលវិជ្ជាជីវៈខេត្តកែបផងដែរ។
មានវ័យចំណាស់បន្តិច និងទៅរៀនទាំងពីរនាក់ លោក យឺន ខន និងភរិយាមិនធ្លាប់ទទួលបានពាក្យមិនល្អទេ ផ្ទុយទៅវិញមានតែទទួលបានការលើកទឹកចិត្តពីមិត្តអ្នកស្គាល់ ជាពិសេសលោកគ្រូ អ្នកគ្រូដែលបង្ហាត់បង្រៀនផ្ទាល់ព្រោះបរិបថសង្គមបច្ចុប្បន្នតម្រូវឱ្យមានជំនាញ។
លោក ខន បានបន្តថា ក្នុងការសិក្សារយៈពេល៤ខែនៃជំនាញវគ្គខ្លីនេះ លោកបានរៀនអំពីមេរៀនស្នូលរបស់ម៉ាស៊ីនត្រជាក់ អគ្គិសនី ជំនាញទន់ ជំនាញរឹងផ្នែកផ្សេងៗនៃម៉ាស៊ីនត្រជាក់ ដោយសិក្សាពីថ្ងៃច័ន្ទដល់សុក្រ។ លោក យឺន ខន បន្តថា ការជ្រើសរើសរៀនជំនាញនេះបានធ្វើឱ្យលោកទទួលបានចំណេះជំនាញបន្ថែមមួយទៀត ហើយអាចមានការងារបន្ថែម និងកែប្រែស្ថានភាពជីវភាពបាន។
លោក យឺន ខន បន្ថែមថា អ្នកដែលចង់រៀនជំនាញនេះជាពិសេសអ្នកដែលមានគ្រួសារ ឬមានកូនតូចដូចជាលោកផ្ទាល់ បេក្ខជនត្រូវត្រៀមនូវរឿងចាំបាច់មួយចំនួនដូចជា ពេលវេលា និងត្រៀមថវិការមួយចំនួនព្រោះបេក្ខជននឹងត្រូវរៀនពេញម៉ោងក្នុងរយៈពេល៥ថ្ងៃក្នុងមួយសប្ដាហ៍។ ដោយឡែកសម្រាប់លោក យឺន ខន និងភរិយា ត្បិតជាប់រៀនក៏ឆ្លៀតយកពេលវេលាដែលនៅសល់ទៅប្រកបរបរមួយចំនួនដើម្បីផ្គត់ផ្គង់ជីវភាពដូចជា ដុតធ្យូង ធ្វើចម្ការជុំវិញផ្ទះដោយដាំបន្លែតិចតួចរួមមាន ដាំដំណាំស្វាយកែវរមៀត ដូង និងកំពីងរាជជាដើម។
សម្រាប់យុវជន យុវនារី ដែលមិនទាន់មានការងារធ្វើ ឬមិនទាន់មានជំនាញមួយច្បាស់លាស់អាចទៅចុះឈ្មោះសិក្សាជំនាញវិជ្ជាជីវៈនៅតាមមជ្ឈមណ្ឌលបណ្ដុះបណ្ដាលវិជ្ជាជីវៈនៅតាមបណ្ដាខេត្តដែលនៅជិតលោកអ្នក ឬនៅរាជធានីភ្នំពេញ។
អត្ថប្រយោជន៍ដែលទទួលបាន ការសិក្សាដោយឥតបង់ថ្លៃ, ទទួលបានប្រាក់ឧបត្ថម្ភប្រចាំខែចំនួន ២៨ម៉ឺនរៀលក្នុង១ខែ ដោយសិក្សាពេញម៉ោងសម្រាប់យុវជនមានបណ្ណសមធម៌ ឬបណ្ណគ្រួសារងាយរងហានិភ័យ, មានផ្តល់ការប្រឹក្សាយោបល់ពីការជ្រើសរើសជំនាញ និងព័ត៌មានទីផ្សារការងារ, ផ្តល់កន្លែងចុះកម្មសិក្សានៅតាមសហគ្រាស គ្រឹះស្ថានឧស្សាហកម្ម និងក្រុមហ៊ុនឯកជន, ទទួលបានសញ្ញាបត្របច្ចេកទេស និងវិជ្ជាជីវៈ១ និងឱកាសបន្តការសិក្សា, ទទួលបានជំនាញមួយពិតប្រាកដដែលទីផ្សារការងារកំពុងត្រូវការ, ទទួលបានឱកាសការងារធ្វើសមរម្យ និងចំណូលទៀងទាត់។
ជាមួយគ្នានេះសូមភ្ជាប់ជាមួយឯកសារចាំបាច់ក្នុងការដាក់ពាក្យចូលរៀនដូចជា សៀវភៅគ្រួសារ (ថតចម្លង) ១ច្បាប់, សំបុត្រកំណើត (ថតចម្លង) ១ច្បាប់, អត្តសញ្ញាណបណ្ណសញ្ជាតិខ្មែរ (ថតចម្លង) ១ច្បាប់, រូបថតថ្មីផ្ទៃពណ៌ខៀវ (ទំហំ៤x៦) ៤សន្លឹក, រូបថតថ្មីផ្ទៃពណ៌ខៀវ (ទំហំ៣x៤) ២សន្លឹក, បណ្ណសមធម៌ ឬបណ្ណសម្គាល់គ្រួសារងាយរងហានិភ័យ ឬបណ្ណសម្គាល់ជនមានពិការភាព ឬបណ្ណមូលនិធិសមធម៌សុខាភិបាល ឬលិខិតឧទ្ទេសនាមដោយរដ្ឋបាលខេត្ត ស្រុក/ក្រុង ឃុំ/សង្កាត់ (ច្បាប់ដើម)៕
