បច្ចេកវិទ្យាអាចជាឧបករណ៍ដ៏អស្ចារ្យសម្រាប់ជួយជំរុញការលូតលាស់ និងអភិវឌ្ឍខួរក្បាលក្មេងជំទង់។ ប៉ុន្តែប្រសិនបើគ្មានការណែនាំត្រឹមត្រូវ គ្រឿងអេឡិចត្រូនិចក៏អាចបង្កគ្រោះថ្នាក់ផងដែរ រាប់ចាប់តាំងពីការវាយប្រហារតាមអ៊ីនធឺណិត រហូតដល់ការញៀនអ៊ីនធឺណិត ក្មេងជំទង់ ងាយនឹងប្រឈមគ្រោះថ្នាក់លើបណ្ដាញអ៊ីនធឺណិតយ៉ាងខ្លាំង។ ដូច្នេះ ការបង្កើតគោលការណ៍ណែនាំ ដែលនឹងជួយការពារក្មេងជំទង់ ដែលជាកូនរបស់អ្នក ពិតជាមានសារៈសំខាន់ ហើយអាចធ្វើឱ្យពួកគេយល់ដឹងអំពីការប្រើស្មាតហ្វូន កុំព្យូទ័រយួរដៃ និងវីដេអូហ្គេម បានត្រឹមត្រូវ។

សរសេរគោលការណ៍ទៅក្នុងក្រដាស ដែលបញ្ជាក់យ៉ាងច្បាស់ពីការរំពឹងទុករបស់អ្នក ។ បន្ទាប់មក ពន្យល់ពីផលអវិជ្ជមាននៅពេលដែលពួកគេបំពានច្បាប់ ដើម្បីកុំឱ្យ​កូនរបស់អ្នកភ្ញាក់ផ្អើលនៅពេលអ្នកពិន័យ។ យោងតាម Verywell Family មានគម្រូច្បាប់ អំពីការប្រើប្រាស់គ្រឿងអេឡិចត្រូនិចសម្រាប់មនុស្សវ័យជំទង់ចំនួន ៧ ដែលអាណាព្យាបាល អាចអនុវត្តនៅផ្ទះបាន។

១. មិនឆាត ឬចុចទូរស័ព្ទពេលញ៉ាំអាហារ ៖ អាណាព្យាបាលអាចបង្រៀនកូនអំពីអាកប្បកិរិយាចំពោះការប្រើទូរស័ព្ទ ឬប្រើទូរស័ព្ទ ឬគ្រឿងអេឡិចត្រូនិចពេលញ៉ាំអាហារ ព្រោះអំឡុងពេលនេះ ជាពេលល្អសម្រាប់សមាជិកគ្រួសារសន្ទនាគ្នា។ អ្នកអាចបញ្ជាក់ប្រាប់កូនរបស់អ្នកថា ការមិនអើពើនឹងសមាជិកគ្រួសារ ឬមនុស្សជុំវិញខ្លួន អំឡុងពេលញ៉ាំអាហារជាកាយវិការមិនសមរម្យ។

២. បិទទូរទស្សន៍ពេលទទួលទានអាហារ ​៖ សំឡេងទូរទស្សន៍ ឬការសំឡេងមើលទូរទស្សន៍ អំឡុងពេលទទួលទានអាហារ អាចជាការរំខាន អំឡុងពេលញ៉ាំអាហារ ។ ម្យ៉ាងទៀត សកម្មភាពនេះ អាចក្លាយជាទម្លាប់មិនល្អ ដែលអាចនាំឱ្យកាត់បន្ថយទំនាក់ទំនងរវាងសមាជិកគ្រួសារ។

៣. ត្រូវបញ្ចប់កិច្ចការឱ្យរួចរាល់ មុនប្រើគ្រឿងអេឡិចត្រូនិច ៖ ច្បាប់ដែលធ្វើឱ្យក្មេងជំទង់យកចិត្តទុកដាក់លើទំនួលខុសត្រូវ គឺជាវិធីសាស្ត្រសំខាន់ ដែលជួយឱ្យកុមារក្លាយជាមនុស្សមានវិន័យ។ ការកំណត់នេះ អាចជារង្វាន់សម្រាប់កូនរបស់អ្នក បន្ទាប់ពីបំពេញកិច្ចការ ឬភារកិច្ចប្រចាំថ្ងៃរបស់គេបានរួចរាល់។

៤. បិទគ្រឿងអេឡិចត្រូនិចនៅពេលជាក់លាក់រាល់យប់ ៖ កំណត់ពេលវេលាជាក់លាក់ ដែលកូនរបស់អ្នកត្រូវបិទគ្រឿងអេឡិចត្រូនិចនៅពេលយប់។ ការសំឡឹងមើលអេក្រង់យប់ជ្រៅខ្លាំង អាចប៉ះពាល់ទម្លាប់ នៃការគេងរបស់ក្មេងជំទង់។ អាណាព្យាបាលអាចលើកទឹកចិត្តឱ្យកូន អានសៀវភៅ ឬចំណាយពេលជាមួយគ្រួសារមុនចូលគេង។ 

៥. ហាមមានទូរទស្សន៍ក្នុងបន្ទប់គេង ៖ ការដាក់ទូរទស្សន៍ក្នុងបន្ទប់គេងកូនរបស់អ្នក នឹងជំរុញឱ្យពួកគេមើលទូរទស្សន៍ច្រើន។ ម្យ៉ាងទៀត អ្នកមិនអាចតាមដាន និងគ្រប់គ្រងពួកគេបានទេ ថាតើពួកគេកំពុងមើលអ្វីខ្លះ ហើយមើលមួយថ្ងៃប៉ុន្មានដង។ 

៦. ទុកកុំព្យូទ័រក្រៅបន្ទប់គេង ៖ ការទុកកុំព្យូទ័រនៅក្រៅបន្ទប់គេងរបស់កូន អាចជួយអ្នកការពារពួកគេបានច្រើនរូបភាព។ ជាពិសេស គឺការតានដានសកម្មភាពរបស់ពួកគេ នៅអំឡុងពេលដែលពួកគេប្រើប្រាស់អ៊ីនធឺណិត និងអាចធានាបានថា មាតិកា ដែលពួកគេតាមដានមានខ្លឹមសារសមរម្យ។ 

៧. មិនបង្ហាញព័ត៌មានលម្អិតផ្ទាល់ខ្លួនលើអ៊ីនធឺណិត ៖ ក្មេងជំទង់ភាគច្រើន គិតថាពួកគេមានសុវត្ថិភាពខ្ពស់ និងមិនងាយគ្រោះថា្នក់ពីការវាយប្រហាតាមអ៊ីនធឺណិតនោះទេ។ ហេតុនេះ ពួកគេអាចចែករំលែកព័ត៌មានផ្ទាល់ខ្លួនទៅកាន់មនុស្សប្លែកមុខ ដែលអាចបង្កបញ្ហាជាយថាហេតុ។ ចាប់ពីរូបភាពអាសអាភាស រហូតដល់អាស័យដ្ឋានរស់នៅ, អ្នកចាំបាច់ត្រូវពន្យល់កូន​ឱ្យច្បាស់អំពីរឿង ដែលគេត្រូវចែករំលែក និងរឿងដែលត្រូវរក្សាការសម្ងាត់លើអនឡាញ៕