ក្នុងការអប់រំមួយពេញលេញដែលមានគុណភាព គេមិនអាចពឹងផ្អែកតែទៅលើសាលារៀនតែមួយនោះទេ ពោលគឺត្រូវមានការចូលរួមពីផ្នែកពាក់ព័ន្ធ ពិសេសគឺការសហការគ្នារវាងឪពុកម្តាយ សាលារៀន ក៏ដូចជាសហគមន៍ ដែលជារឿងសំខាន់ជួយឱ្យកូនៗជាសិស្សានុសិស្សទទួលបាននូវការអភិវឌ្ឍដ៏ពេញលេញមួយ។

ក្នុងឱកាសដាក់ឱ្យដំណើរការសាលារៀនណត្សឡាញន៍ សាខាចំការដូង កាលពីពេលថ្មីៗនេះ លោកឧកញ៉ា ប៉ិច បូឡែន អ្នកជំនាញផ្នែកអប់រំ និងជាអគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប មានប្រសាសន៍ ដោយធ្វើការជំរុញដល់មាតាបិតា អ្នកអាណាព្យាបាលទាំងអស់ ចូលរួមសកម្មភាពជាមួយសាលារៀនដូចជាកម្មវិធីជំនួបគ្រូបង្រៀនជាមួយអាណាព្យាបាល សិក្ខាសាលាអប់រំផ្សេងៗដែលរៀបចំដោយសាលា ក៏​ដូចជា​តាមដានគ្រុបតេឡេក្រាមរបស់សាលា School App និងផលិតវីដេអូអប់រំដែលចេញផ្សាយនៅ​លើបណ្តាញ​សង្គមរបស់សាលា ដើម្បីឱ្យអ្នកអាណាព្យាបាលសិស្សទទួលបានព័ត៌មានពីការសិក្សារបស់កូនៗ ទទួលបានចំណេះដឹងផ្សេងៗដូចជា របៀបក្នុងការចិញ្ចឹមកូន ការអភិវឌ្ឍរបស់កុមារ ឬយុវជនជាដើម ដែលជាបំណិនជួយកូនៗក្នុងការអភិវឌ្ឍសមត្ថភាព និងបញ្ញាស្មារតី។

លោកឧកញ៉ា ប៉ិច បូឡែន មានប្រសាសន៍សង្កត់ធ្ងន់ថា ដើម្បីឱ្យកូនៗទទួលបានការអប់រំល្អឱ្យពិតប្រាកដ សូមមាតាបិតាកុំគ្រាន់តែបញ្ជូនកូនឱ្យផុតតែពីផ្ទះ ពោលគឺឪពុកម្តាយ អ្នកអាណាព្យាបាល ត្រូវចូលរួមជាមួយសាលារៀនក្នុងការអភិវឌ្ឍកូនៗ ដើម្បីឱ្យពួកគេក្លាយជាមូលធនមនុស្សដ៏ល្អនាពេលអនាគត។

លោក គង់ សំនៀង ប្រធានសហព័ន្ធសេវាអប់រំនៅកម្ពុជា សម្តែងការយល់ស្រប ដោយថា ក្នុងន័យអប់រំ ដើម្បីឱ្យគុណភាពអប់រំមួយជោគជ័យបាន លុះត្រាតែមានការចូលរួមពីម៉ុមទាំង៤ នៃការអប់រំ គឺ សាលារៀន សិស្ស អ្នកអាណាព្យាបាល និងសង្គម ។ លោក សំនៀង បន្តថា អ្នកអាណាព្យាបាល ជាចំណែកមួយដែលធ្វើឱ្យគុណភាពអប់រំដំណើរការទៅមុខ ដោយមានន័យថា សាលាមិនអាចប្រឹងតែឯង ហើយអ្នកអាណាព្យាបាលសិស្សមិនយកចិត្តទុកដាក់ ដូចជាពិនិត្យមើលកិច្ចការរបស់កូន ឬអប់រំកូនៗបន្ថែមនោះឡើយ។

បើតាមលោក គង់ សំនៀង មានភាពខុសគ្នាច្រើនចំពោះលទ្ធផលសិក្សា រវាងសិស្សដែលអ្នកអាណាព្យាបាលបានចូលរួមសកម្មភាពជាមួយសាលារៀន និងសិស្សដែលអ្នកអាណាព្យាបាលមិនបានចូលរួម ដោយក្នុងនោះ សិស្សដែលអ្នកអាណាព្យាបាលបានចូលរួមជាមួយសាលាឃើញថា ការសិក្សាមានការអភិវឌ្ឍ ខណៈសិស្សដែលអ្នកអាណាព្យាបាលមិនបានចូលរួមជាមួយសាលារៀន ឃើញថា ការសិក្សារបស់ពួកគេនៅមានកម្រិត ។ ដូច្នេះ លោកយល់ថា សាលារៀន និងអ្នកអាណាព្យាបាល ជាដៃគូសំខាន់ ដែលត្រូវចូលរួមជំរុញអភិវឌ្ឍការសិក្សារបស់កូន៕