ភ្នំពេញ – កីឡាការិនី យិន សូត ដណ្ដើមបានមេដាយមាសក្នុងការប្រកួតរត់ប្រណាំងកីឡាអត្តពលកម្មវិញ្ញាសារត់ចម្ងាយ ៨០០ម៉ែត្រ T11 នៃព្រឹត្តិការណ៍អាស៊ានប៉ារ៉ាហ្គេម លើកទី១២ ។ ចំណុចពិសេសនៃវិញ្ញាសាររត់ប្រណាំងនេះ គឺមានអត្តពលិកម្នាក់ទៀតជាអ្នកដឹកដៃរត់ជាមួយ និងរត់ឱ្យបានលឿនបំផុតដើម្បីយកឈ្នះ ។ ក្រោយទទួលបានជ័យជម្នះក្នុងការប្រកួត អត្តពលិកភ្នែកមានពិការភាពរូបនេះ បានចាត់ទុកមេដាយមាសទទួលបានពីព្រឹត្តិការណ៍អាស៊ានប៉ារ៉ាហ្គេម មានន័យធំធេងបំផុតសម្រាប់ក្រុមគ្រួសារ និងប្រទេសជាតិ ។

កញ្ញា យិន សូត បាននិយាយថា លទ្ធផលប្រកួតទទួលបានមេដាយមាសនៅពេលនេះ គឺជាភាពអស្ចារ្យមួយដែលខ្លួនអាចធ្វើបានដើម្បីក្រុមគ្រួសារ និងតំណាងឱ្យជនមានពិការភាពនៅកម្ពុជា ។ កញ្ញាបន្តថា ថ្វីត្បិតការហ្វឹកហាត់ និងការប្រកួតកីឡាពិតជាលំបាកសម្រាប់កញ្ញា ប៉ុន្តែការលំបាកទាំងនេះសុទ្ធតែជារឿងអាចជម្នះបានដោយងាយនៅពេលដែលកីឡាករមានគោលដៅច្បាស់លាស់ ។

កីឡាការិនី យិន សូត បាននិយាយដោយទំនុកចិត្តថា

“ខ្ញុំយល់ថា ការប្រកួតហ្គេម គឺមានចាញ់ និងឈ្នះ ប៉ុន្តែការត្រៀមខ្លួនជាមុនសម្រាប់ការប្រកួតជាអ្វីដែលយើងអាចធ្វើបាន ! យើងគ្រាន់តែមានពិការភាពរាងកាយ ឬផ្នែកណាមួយប៉ុណ្ណោះ វាមិនមែនពិការភាពចិត្តទេ… ជនមានពិការភាពងាយបាក់ទឹកចិត្តនៅពេលដែលមិនបានចូលរួមសកម្មភាពសង្គម ចូលរួមសង្គមបានច្រើនផ្លូវចិត្តរឹងមាំ ហើយខ្ញុំយល់អារម្មណ៍មួយនេះ”

សម្រាប់ការប្រកួតប៉ារ៉ាហ្គេមនៅកម្ពុជានេះ កីឡាការិនី យិន សូត និងគ្រូបង្ហាត់បានចូលរួមប្រកួតលើវិញ្ញាសាររត់ចម្ងាយ និងលោតចម្ងាយលើខ្សាច់ ។ ការប្រកួតរត់ចម្ងាយមានវិញ្ញាសារ ៨០០ម៉ែត្រ និង ៤០០ម៉ែត្រ ។ កន្លងទៅកីឡាការិនីកម្ពុជា យិន សូត ធ្លាប់បានចូលរួមប្រកួតកីឡាសម្រាប់អ្នកមានពិការភាពកម្រិតអន្តរជាតិបានចំនួន ៤លើករួចមកហើយរាប់ទាំងព្រឹត្តិការណ៍ប៉ារ៉ាហ្គេមនៅកម្ពុជា ។

លោក យី បារាំង គ្រូបង្ហាត់និងជាដៃគូរត់ដឹកនាំបាននិយាយថា កីឡាការិនី យិន សូត តែងព្យាយាមហ្វឹកហាត់ជានិច្ច និងមានគោលបំណងធ្វើឱ្យបានល្អនៅពេលប្រកួតព្រឹត្តិការណ៍ប៉ារ៉ាហ្គេមនៅកម្ពុជា ។ ទន្ទឹមគ្នានេះ លោកបានលើកទឹកចិត្តដល់ជនមានពិការភាពទាំងអស់ សូមកុំបោះបង់បំណងប្រាថ្នារបស់ខ្លួន ព្យាមយាមធ្វើអ្វីដែលខ្លួនចង់បាន ដើម្បីបង្ហាញពីសក្តានុពលរបស់ខ្លួនទៅកាន់មនុស្សជុំវិញខ្លួន និងសង្គម ។

ចំណែកអ្នកស្រី មាឃ សាម៉ាន់ ម្ដាយរបស់កីឡាការិនី យិន សូត ដែលបានមកទស្សនា និងលើកទឹកចិត្តកូនស្រីផ្ទាល់នៅពហុកីឡដ្ឋានជាតិមរតកតេជោ បាននិយាយថា ជ័យជម្នះមេដាយមាសរបស់កូនស្រីនៅពេលនេះ ធ្វើឱ្យអ្នកស្រីរំភើបរីករាយនឹងស្មានមិនដល់ ។ អ្នកស្រីនៅតែបន្តលើកទឹកចិត្តឱ្យកូនបន្តហ្វឹកហាត់ និងលេងកីឡា ដោយយល់ថា កីឡាជួយដល់សុខភាព និងលើកមុខមាត់កត្តិយសកីឡាករ គ្រួសារ និងប្រទេសជាតិ ។ 

គួរបញ្ជាក់ថា បច្ចុប្បន្នកីឡាការិនី យិន សូត មានវ័យ ២៥ឆ្នាំ និងជាកូនច្បងក្នុងគ្រួសារកសិករនៅភូមិស្វាយតាយាន ឃុំស្វាយតាយាន ស្រុកកំពង់រោទិ៍ ខេត្តស្វាយរៀង ។ ឆ្នាំ២០១៧ កញ្ញាបានចាប់ផ្ដើមចូលរួមហ្វឹកហាត់កីឡាផ្នែករត់ប្រណាំងជនពិការ នៃសហព័ន្ធកីឡាជនពិការកម្ពុជា ។

កាលពីឆ្នាំ២០១៩ កន្លងទៅ កីឡាការិនី យិន សូត បានប្រកួតឈ្នះមេដាយប្រាក់១ និងសំរឹទ្ធ២ ក្នុងការប្រកួតជើងឯកកម្រិតពិភពលោក World para-Athletic Grand Prix the 7th china Open Athletic Chamionships រៀបចំនៅទីក្រុងប៉េកាំងប្រទេសចិន ។ មុនពេលហ្វឹកហាត់កីឡា កញ្ញា យិន សូត្រ ធ្លាប់បម្រើការងារនៅអង្គការជនពិការកម្ពុជា លើផ្នែកតស៊ូមតិដើម្បីជនមានពិការភាព ៕