ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសបើកពិព័រណ៌ការងារ និងផលិតភាពជាតិ ឆ្នាំ២០២៤ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លើកឡើងថា ពិព័រណ៍ការងារ និងផលិតភាពជាតិ គឺជាអន្តរាគមន៍ទីផ្សារការងារដ៏ចាំបាច់មួយនៅក្នុងដំណើរការផ្តល់សេវាការងារដែលមានលក្ខណៈប្រមូលផ្តុំនូវព័ត៌មាន និងកាលានុវត្តភាព ហើយត្រូវបានរៀបចំឡើងក្នុងមួយឆ្នាំម្តង បន្ថែមទៅលើការផ្តល់សេវាការងារជាប្រចាំថ្ងៃរបស់ទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ។
តាមប្រសាសន៍លើកឡើងរបស់ឯកឧត្តមរដ្ឋមន្រ្តី គោលបំណងសំខាន់បំផុតនៃព្រឹត្តិការណ៍នេះ គឺការនាំឱ្យកាន់តែខិតជិតគ្នារវាងនិយោជក ដែលមានឱកាសការងារច្រើនសន្ធឹកសន្ធាប់ និងអ្នកស្វែងរកការងារដែលមានសមត្ថភាព នៅមួយកន្លែងដោយងាយស្រួល ដើម្បីធ្វើការជ្រើសរើសកម្លាំងពលកម្មតាមតម្រូវការ ដាក់ពាក្យសុំការងារដែលខ្លួនចូលចិត្ត ទទួលបានការប្រឹក្សាយោបល់អាជីព ការត្រៀមខ្លួនចូលការងារយ៉ាងសកម្ម និងការស្វែងយល់ពីការបង្កើនផលិតភាព។
ជាក់ស្តែងក្នុងឆ្នាំ២០២៤នេះ មានក្រសួង-ស្ថាប័ន ក្រុមហ៊ុន សហគ្រាស គ្រឹះស្ថានអប់រំបណ្តុះបណ្តាល ដៃគូអភិវឌ្ឍន៍ និងអង្គការជាតិ-អន្តរជាតិ ចំនួន១៥០ចូលរួម ហើយបច្ចុប្បន្នពិព័រណ៍ការងារ និងផលិតភាពជាតិ បានក្លាយជាព្រឹត្តិការណ៍ការងារដ៏ធំជាងគេនៅកម្ពុជា ដោយបាននាំមកនូវព័ត៌មាន និងឱកាសការងារ និងវគ្គអប់រំបណ្តុះបណ្តាលគ្រប់ប្រភេទ ទាំងផ្នែករដ្ឋ, ឯកជន និងអង្គការមិនមែនរដ្ឋាភិបាលប្រមាណជាង ៦ម៉ឺនឧកាសការងារ ហើយទទួលបានការគាំទ្រ និងការចូលរួមកាន់តែទូលំទូលាយ ដែលត្រូវបានរំពឹងថា ចំនួនអ្នកមកចូលរួមពិព័រណ៍នេះ សរុបប្រមាណ ១០ម៉ឺននាក់ ដោយអ្នកចូលរួមដោយផ្ទាល់ប្រមាណជាង ៤ម៉ឺននាក់ និងអ្នកចូលរួមតាមរយៈអនឡាញ ប្រមាណ ៦ម៉ឺននាក់ក្នុងរយៈពេលពីរថ្ងៃនេះ។
សូមបញ្ជាក់ដែរថា ជាមួយនឹងការខិតខំបង្កើតឱកាសការងារកាន់តែច្រើន រាជរដ្ឋាភិបាលបានបន្តការយកចិត្តទុកដាក់ខ្ពស់លើការជួយបែងចែកឱកាសឱ្យបានទៅដល់ប្រជាជនគ្រប់រូបប្រកបដោយតម្លាភាព និងសមធម៌ សំដៅប្រែក្លាយឱកាសការងារដែលមានទាំងអស់ ឱ្យទៅជាមុខរបរកាន់តែល្អសម្រាប់ប្រជាជនគ្រប់រូប។ ក្នុងន័យនេះ រាជរដ្ឋាភិបាលកម្ពុជាតាមរយៈទីភ្នាក់ងារជាតិមុខរបរ និងការងារ (NEA) បានផ្តល់សេវាការងារជាសាធារណៈ ក្នុងការជួយផ្គូផ្គងឱកាសការងារឱ្យកាន់តែឆាប់រហ័ស ងាយស្រួលរវាងអ្នកស្វែងរកការងារធ្វើ និងនិយោជកដែលមានតម្រូវការជ្រើសរើសកម្លាំងពលកម្ម បានកាន់តែឆាប់រហ័សងាយស្រួលនៅពេលណាក៏បាន និងពីទីកន្លែងណាក៏បាន។
ដើម្បីជំរុញប្រសិទ្ធភាពការងារនេះ NEA បានផ្តល់សេវាផ្គូផ្គងការងារនៅតាមប្រព័ន្ធអេឡិចត្រូនិកដែលមានគេហទំព័រ www.nea.gov.kh, កម្មវិធីទូរស័ព្ទ NEA Job Search, បណ្តាមជ្ឈមណ្ឌលការងាររាជធានី-ខេត្តទាំង១៤, ការិយាល័យអាជីព និងការងារ នៅតាមស្នាក់ការសហភាពសហព័ន្ធយុវជនកម្ពុជានៅខេត្តកំពង់ស្ពឺ និងខេត្តកណ្តាល និងមជ្ឈមណ្ឌលការងារចល័ត ព្រមទាំងរៀបចំវេទិកាការងារនានា ដូចជា ពិព័រណ៍ការងារ ទិវាជ្រើសរើសកម្លាំងពលកម្មថ្នាក់ជាតិ ថ្នាក់ខេត្ត ថ្នាក់មូលដ្ឋាន និងនៅតាមគ្រឹះស្ថានអប់រំបណ្តុះបណ្តាលនានា ដើម្បីបង្កលក្ខណៈឱ្យអ្នកស្វែងរកការងារធ្វើ និងនិយោជកជួបគ្នាបានដោយជោគជ័យ និងងាយស្រួល៕
