ភ្នំពេញ – សិទ្ធិទទួលបានការអប់រំជាសិទ្ធិចម្បងមួយក្នុងចំណោមសិទ្ធិចម្បងៗទាំងបួនរបស់កុមារ ។ ការអនុវត្តសិទ្ធិទទួលបានការអប់រំរបស់កុមារឱ្យមានភាពពេញលេញ រមែងត្រូវការម្តាយឪពុក ឬអាណាព្យាបាលកុមារគាំទ្រជាចាំបាច់ ។ ម្តាយឪពុកជាតួអង្គសំខាន់មានតួនាទីលើកទឹកចិត្តឱ្យកុមារបន្តការសិក្សា ដើម្បីបញ្ចេញសក្តានុពលរបស់ខ្លួនជាបន្តបន្ទាប់តាមរយៈការអប់រំដែលកុមារទទួលបាន ។ នេះជាប្រសាសន៍របស់លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) និងជាអនុប្រធានក្រុមប្រឹក្សាជាតិកម្ពុជាដើម្បីកុមារ ។

តាមរយៈបទពិសោធន៍ធ្វើការងារលើកកម្ពស់សិទ្ធិកុមារ លោកជំទាវ ជូ ប៊ុនអេង មានប្រសាសន៍ថា ការអប់រំជាគន្លឹះចម្បងរំដោះអវិជ្ជារបស់មនុស្ស ហើយនៅពេលដែលកុមារទទួលបានការអប់រំ នោះពួកគេនឹងមានឱកាសរីកចម្រើនជាច្រើន​ ។ លោកជំទាវបានបន្តថា ការជំរុញឱ្យកុមារទទួលបានការអប់រំពេញលេញ ទាមទារឱ្យម្តាយឪពុកចេះលើកទឹកចិត្តកុមារ ព្រមទាំងចិញ្ចឹមបីបាច់កុមារដោយវិជ្ជមាន ។

លោកជំទាវ ជូ ប៊ុនអេង អនុប្រធានក្រុមប្រឹក្សាជាតិកម្ពុជាដើម្បីកុមារ មានប្រសាសន៍បញ្ជាក់ថា ៖

“ការអប់រំរបស់កុមារត្រូវការការគាំទ្រពីម្តាយឪពុក ហើយនៅពេលដែលកុមារទទួលបានឱកាសសិក្សា ពួកគេទទួលបានការអប់រំសីលធម៌រស់នៅ ចំណេះដឹងទូទៅ ចំណេះដឹងវិទ្យាសាស្រ្ត និងបច្ចេកវិទ្យា ព្រមទាំងបានអភិវឌ្ឍន៍ខ្លួនទៅថ្ងៃអនាគត ព្រោះថ្ងៃក្រោយពួកគេនឹងក្លាយជាអ្នកដឹកនាំការងារអ្វីមួយនៅក្នុងសង្គម”

ទន្ទឹមនឹងការយល់ឃើញនេះ អ្នកជំនាញអប់រំកុមារក៏បានអំពាវនាវដល់ម្តាយឪពុក និងអាណាព្យាបាលកុមារ ត្រូវចេះលើកទឹកចិត្តកុមារឱ្យមានសេចក្តីក្លាហាន លើកទឹកចិត្តឱ្យកុមារហ៊ានលើកឡើងពីបញ្ហានិងភាពស្មុកស្មាញនៅក្នុងអារម្មណ៍ ដើម្បីគាំទ្រសុខុមាលភាពផ្លូវចិត្តកុមារឱ្យល្អប្រសើរឡើង ។ កុមារនឹងចេះចែករំលែកចំណេះដឹង ក្លាហានចូលរួមមតិយោបល់ ព្រមទាំងចេះជួយអ្នកដទៃនៅពេលដែលពួកគេធ្លាប់ទទួលអារម្មណ៍កក់ក្តៅ និងមានទំនុកចិត្តពីគ្រួសារ ។ 

សូមជម្រាបថា ការចិញ្ចឹមកូនតាមបែបវិជ្ជមានមានឥទ្ធិពលអប់រំពេញមួយដំណើរជីវិតកុមារ និងមានឥទ្ធិពលអប់រំបន្តជំនាន់ ។ ម្តាយឪពុកជាតួអង្គសំខាន់ដែលគាំទ្រដល់ការចិញ្ចឹមកូនតាមបែបវិជ្ជមាន តួអង្គអហឹង្សាគំរូ និងកសាងទំនាក់ទំនងល្អក្នុងគ្រួសារ ។ កុមារដែលទទួលបានការអប់រំល្អនៅក្នុងគ្រួសារក្លាយជាពលរដ្ឋដែលងាយអភិវឌ្ឍន៍ខ្លួនជាពលរដ្ឋល្អ និងរស់នៅមានសុខុមាលភាពផ្លូវចិត្តរឹងមាំ៕