ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – យុវសិស្ស ហេង មុនីរៀម ដែលជាសិស្សមកពីសាលាវៀនវ៉េស្ទឡាញន៍ សាខាសន្ធរម៉ុក ត្រូវបានមន្ទីរអប់រំ យុវជន និងកីឡា ប្រកាសថា ជាម្ចាស់ជ័យលាភីលេខ១ ក្នុងក្របខណ្ឌរាជធានី ក្នុងការប្រកួតតែងនិពន្ធកំណាព្យ ពានរង្វាន់សម្តេចអគ្គមហាសេនាបតីតេជោ ហ៊ុន សែន ក្នុងការអបអរទិវាជាតិអំណានលើកទី៨។
ដើម្បីអបអរសាទរដល់ទិវាជាតិអំណានលើកទី៨ ដែលគ្រោងនឹងប្រព្រឹត្តធ្វើនៅថ្ងៃទី១១ ខែមីនា ខាងមុខ ក្រសួងអប់រំ យុវជន និងកីឡា បានប្រកាសឱ្យមានការរៀបចំកម្មវិធីប្រឡងប្រណាំងអានអត្ថបទ ស្មូតកំណាព្យ និងតែងនិពន្ធ ដើម្បីជ្រើសរើសជ័យលាភីថ្នាក់ជាតិ ពានរង្វាន់សម្តេចតេជោនាយករដ្ឋមន្រ្តី ក្រោមប្រធានបទ «អំណាន ជាមាគ៌ា ឆ្ពោះទៅបរិវត្តកម្ម វិស័យអប់រំ»។
ការទទួលបានជ័យលាភីលេខ១ ផ្នែកនិពន្ធកំណាព្យនៅទូទាំងរាជធានីភ្នំពេញនេះ យុវសិស្ស ហេង មុនីរៀម បានសម្តែងក្តីរីករាយ ដោយថា ពីដំបូងឡើយរូបគេមិនរំពឹងទទួលបានចំណាត់ថ្នាក់នេះទេ ព្រោះគិតថា ស្នាដៃរបស់ខ្លួននៅមានកម្រិត ខណៈដែលមានការប្រកួតប្រជែងជាមួយសិស្សមកពីវិទ្យាល័យដទៃទៀតជាច្រើន ។ តែយ៉ាងណា លទ្ធផលដែលទទួលបាននេះ គឺហួសពីអ្វីដែលរំពឹងទុក ហើយខ្លួនពិតជាសប្បាយចិត្ត។
ជាមួយគ្នានេះ មុនីរៀម ក៏បានបង្ហាញពីការតាំងចិត្តចំពោះការបន្តទៅប្រកួតនៅទូទាំងប្រទេសក្នុងពេលឆាប់ៗខាងមុខនេះថា ខ្លួននឹងប្រឹងឱ្យអស់ពីលទ្ធភាព។
យុវសិស្ស ហេង មុនីរៀម
“ក្រសួងបានជូនដំណឹងមកខ្ញុំឱ្យត្រៀមខ្លួនសម្រាប់ការបន្តប្រកួតទូទាំងប្រទេស… ខ្ញុំនឹងប្រឹងឱ្យអស់ពីលទ្ធភាព ហើយលទ្ធផលបែបណា ខ្ញុំនឹងទទួលយក”
តាមពិតទៅកំណាព្យដែលធ្វើឱ្យ មុនីរៀម ជាប់ជ័យលាភីលេខ១ថ្នាក់រាជធានី ក្នុងការប្រកួតតែងនិពន្ធពានរង្វាន់សម្តេចតេជោនេះ មិនមែនជាកំណាព្យទីមួយ ដែល មុនីរៀម តែងនិពន្ធនោះទេ , មុនីរៀម ធ្លាប់បានតែងកំណាព្យរាប់មិនភ្លេចហើយ ពោលគឺ យុវសិស្សរូបនេះ ស្រឡាញ់ការតែងនិពន្ធតាំងពីនៅតូចៗមកម្ល៉េះ គ្រាន់តែកម្រិត នៃការតែងនិពន្ធនៅពេលនោះ និងពេលនេះខុសគ្នា ។
មូលហេតុដែលធ្វើឱ្យយុវសិស្ស ហេង មុនីរៀម ចូលចិត្តការតែងកំណាព្យ
ទោះបីជា មុនីរៀម ជាអ្នករស់នៅរាជធានីភ្នំពេញ ជាក្រុងដ៏ឆើតឆាយសម្បូរដោយវប្បធម៌ចម្រុះក៏ដោយ ប៉ុន្តែយុវសិស្សរូបនេះបែរជាចូលចិត្តការតែងកំណាព្យ ។
យុវសិស្ស ហេង មុនីរៀម និយាយថា អ្វីដែលផ្តើមឱ្យរូបគេចូលចិត្តការនិពន្ធតែងកំណាព្យនេះ គឺក្រោយពីរូបគេការមើលសិល្បៈបុរាណដូចជា ចាប៉ី អាយ៉ៃ ជាដើម ដែលសិល្បៈប្រភេទនេះ ភាគច្រើនស្មៀន ឬសិល្បៈករតែងតែប្រើប្រាស់ពាក្យចាប់ចុងជួនពិរោះរណ្តំ ធ្វើឱ្យ មុនីរៀម ចាប់អារម្មណ៍ នឹងតែងតែស្តាប់ការលេងចាប៉ី និងអាយ៉ៃ តាំងតែពីខ្លួននៅតូចម្ល៉េះ។
សម្រាប់ មុនីរៀម ដើម្បីអាចនិពន្ធកំណាព្យមួយបានល្អ ប្រកបដោយឃ្លោងឃ្លាជាទីចាប់អារម្មណ៍ រូបគេតែងតែអានកំណាព្យរបស់បុគ្គលល្បីៗ ដូចជាកំណាព្យរបស់លោកតាក្រមង៉ុយជាដើម ។ ជាបទពិសោធន៍ផ្ទាល់របស់ មុនីរៀម ដើម្បីអាចតែងកំណាព្យបានល្អ ចាំបាច់ត្រូវមានកត្តា៤សំខាន់ៗ ក្នុងនោះ គឺ ទី១ យ៉ាងហោចណាស់ក៏ត្រូវចងចាំ ពាក្យកាព្យពី២០ ទៅ៣០វគ្គ ដោយការចងចាំនេះ នឹងអាចជួយឱ្យយើងរីកចម្រើនក្នុងការតែងនិពន្ធ, ទី២ ចាំបាច់ត្រូវមានភាពអំណត់ ព្រោះថា ការតែងនិពន្ធ មិនអាចអង្គុយតែងភ្លាមបានភ្លាមនោះឡើយ មានអ្នកខ្លះតែងកំណាព្យមួយវគ្គ ត្រូវប្រើរយៈពេល១០ ទៅ២០នាទី ហើយអ្នកខ្លះទៀតអាចប្រើពេលដល់ទៅ១ម៉ោងក៏មាន ដូច្នេះចាំបាច់ត្រូវមានភាពអំណត់។
ទី៣ អ្នកតែងនិពន្ធកំណាព្យ ក៏ត្រូវជាអ្នកដឹងពាក្យ ស្គាល់ពាក្យច្រើន ព្រោះថា ប្រសិនបើយើងមិនស្គាល់ពាក្យច្រើននោះទេ យើងអាចនឹងពិបាករកនឹកពាក្យដើម្បីបន្ត ។ សម្រាប់ចំណុចទី៤ ដែលជាចំណុចចុងក្រោយ គឺអ្នកតែងនិពន្ធ ចាំបាច់ត្រូវតែមានចំណេះដឹងទូទៅទូលំទូលាយ ព្រោះថា យើងមិនអាចដឹងទេថា ប្រធានបទដែលគណៈកម្មការដាក់ឱ្យ គឺជាប្រធានបទអ្វីនោះទេ ដូច្នេះអ្នកតែងគឺចាំបាច់ត្រូវមានចំណេះដឹងទូលំទូលាយ ។
“អក្សរសិល្ប៍អត់មានព្រំដែនទេ អក្សរសិល្ប៍បើកចំហរឱ្យអ្នកនិពន្ធគ្រប់រូបបង្ហាញនូវអារម្មណ៍របស់ខ្លួន បង្ហាញនូវគំនិត បង្ហាញនូវស្នាដៃរបស់ខ្លួន អញ្ចឹងទាល់តែអ្នកនិពន្ធមានភាពអំណត់ និងមានចំណេះដឹងអាចថា ច្រើនទាក់ទងទៅនឹងចំណេះដឹងជុំវិញខ្លួន បំណិនជីវិត និងការសិក្សាផ្សេងៗ”
