ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កុមារដែលមានសុខភាពរឹងមាំ និងមានភាពរីករាយក្នុងវ័យកុមារភាព អាចជួយឱ្យពួកគេ មានឱកាសសម្រេចភាពជោគជ័យខ្ពស់ក្នុងការរស់នៅ និងមានអនាគតល្អប្រសើរ។ ប៉ុន្តែឪពុកម្ដាយជាច្រើនមានចម្ងល់ថា តើពួកគាត់ត្រូវចិញ្ចឹមកូនបែបណា ដើម្បីឱ្យកុមារមានសុភមង្គលក្នុងពិភពលោកបច្ចុប្បន្ន? ការស្រាវជ្រាវបានបង្ហាញថា ឪពុកម្ដាយអាចជួយកុមារអភិវឌ្ឍទម្លាប់ ចំនួន ៤ ដើម្បីឱ្យកុមារទទួលបានអារម្មណ៍រីករាយក្នុងការរស់នៅ។
១. លើកទឹកចិត្តឱ្យរត់លេងក្រៅផ្ទះ ៖ ការរត់លើស្មៅ ឡើងដើមឈើ អង្គុយយោលទោង និងសកម្មភាពក្រៅផ្ទះជាច្រើនទៀត គឺល្អសម្រាប់កុមារ។ ការសិក្សាបង្ហាញថា ក្លិនដែលទាក់ទងនឹងធម្មជាតិ ដូចជា ដើមស្រល់ ស្មៅ និងផ្កាឡាវេនឌឺ អាចបង្កើនអារម្មណ៍រីករាយដល់កូនរបស់អ្នក។ ដូច្នេះ អ្នកអាចលើកទឹកចិត្តកូនរបស់អ្នកឱ្យអានសៀវភៅ ឬធ្វើកិច្ចការសាលាក្រៅផ្ទះ ដើម្បីជំរុញឱ្យពួកគេទទួលអារម្មណ៍មានក្ដីសុខ។
ការសិក្សាមួយនៅឆ្នាំ២០១៧ និងត្រូវចេញផ្សាយដោយ Journal of Science and Medicine in Sport បានរកឃើញថា ការរត់លេងក្រៅផ្ទះ ក៏អាចជួយកុមារពង្រឹងជំនាញសង្គមផងដែរ ដោយកុមារដែលមានពេលវេលាលេងនៅខាងក្រៅ មានសមត្ថភាពយល់ចិត្តអ្នកដទៃ ចេះពីរបៀបទំនាក់ទំនង និងគ្រប់គ្រងខ្លួនឯង។
២. កំណត់ពេលមើលអេក្រង់ ៖ ការចំណាយពេលជាមួយអេក្រង់ ឬលេងហ្គេមច្រើនម៉ោង ធ្វើឱ្យកុមារសប្បាយចិត្ត ប៉ុន្តែការស្រាវជ្រាវរកឃើញថា ការចំណាយពេលច្រើនម៉ោងជាមួយអេក្រង់ មិនល្អសម្រាប់ផ្លូវចិត្តពួកគេនោះទេ។ ការសិក្សានៅឆ្នាំ២០១៨ ដែលបានចេញផ្សាយនៅក្នុងនានុប្បវត្តិ Emotion បានរកឃើញថា កុមារ និងក្មេងជំទង់ ដែលចំណាយពេលតិចជាមួយឧបករណ៍ឌីជីថល ហើយងាកមកចំណាយពេលធ្វើសកម្មភាព ដូចជា លេងកីឡា កិច្ចការផ្ទះ ឬជជែកជាមួយមិត្តភក្ដិ ធ្វើឱ្យពួកគេមានអារម្មណ៍សប្បាយចិត្តខ្លាំង។
ហេតុនេះ ការបង្កើតដែនកំណត់ច្បាស់លាស់ សម្រាប់កុមារ ពិតជាមានសារៈសំខាន់ណាស់ សម្រាប់សុខភាពផ្លូវចិត្ត អារម្មណ៍ និងការលូតលាស់របស់កុមារ។
៣. ចាត់តាំងការងារ ៖ ការងារអាចបង្រៀនកុមារនូវមេរៀនជីវិតជាច្រើន ដូចជា ការទទួលខុសត្រូវ និងសមត្ថភាពក្នុងការសហការជាដើម។ លើសពីនេះ កុមារដែលធ្វើការងារផ្ទះ ធ្វើឱ្យពួកគេមានអារម្មណ៍ថា ពួកគេមានទំនាក់ទំនងជាមួយគ្រួសារ ហើយមានស្មារតីរឹងមាំ នៅពេលជួបស្ថានការណ៍លំបាកក្នុងការរស់នៅ។ ឪពុកម្ដាយអាចចាត់តាំងឱ្យពួកគេរៀបចំគ្រែរបស់ខ្លួនក្រោយក្រោកពីគេង សម្អាតផ្ទះបាយ ឬជួយការងារផ្សេងៗទៀតដែលអ្នកយល់ថា សក្តិសមសម្រាប់កុមារ។ ទម្លាប់នេះនឹងធ្វើឱ្យពួកគេមានអារម្មណ៍ថា ពួកគេមានសមិទ្ធិផលប្រចាំថ្ងៃ បើទោះបីជាពួកគេនៅក្មេងក៏ដោយ។
៤. ញ៉ាំអាហារពេលល្ងាចជុំគ្នា ៖ ការញ៉ាំអាហារជាលក្ខណៈគ្រួសារជុំគ្នា អាចជាវិធីសាស្ត្រល្អបំផុត ដែលធ្វើឱ្យកុមារមានអារម្មណ៍កក់ក្ដៅ និងភាពរីករាយ។ ការស្រាវជ្រាវបង្ហាញថា ការញ៉ាំអាហារជុំគ្រួសារញឹកញាប់ មានទំនាក់ទំនងនឹងអារម្មណ៍វិជ្ជមានរបស់ក្មេងជំទង់។ ម្យ៉ាងទៀត កុមារ ឬក្មេងជំទង់ ដែលចំណាយពេលញ៉ាំអាហារជាមួយគ្រួសារ អាចមានភាគរយខ្ពស់ជៀសផុតពីបញ្ហាគ្រឿងញៀន និងវិបត្តិអាកប្បកិរិយា៕
