ក្រូចឆ្មារមានផ្ទុកសារធាតុចិញ្ចឹម និងមានសមត្ថភាពទ្រទ្រង់សុខភាពសរសៃឈាមបេះដូង ​​គ្រួស​ក្នុង​តម្រងនោម ​និង​រាងកាយដែលមានសភាពស្ងួតឬស្លេកស្លាំង។ ក្រូចឆ្មារ មានប្រភពដើមនៅតំបន់អាស៊ីភាគឦសាន នៃប្រទេសឥណ្ឌា ហើយនៅក្នុងសារធាតុរបស់ក្រូចឆ្មារ គឺមានជាតិវីតាមីន C ក្នុងកម្រិតមួយខ្ពស់ និងជាតិសរសៃ រួមទាំងភាពចម្រុះជាច្រើនទៀតអាស្រ័យលើអ្នកជំនាញកែច្នៃ។

តាមរយៈ Healthline បានឱ្យដឹងថា អត្ថប្រយោជន៍ពីផលដំណាំមួយនេះ គេអាចយកទៅផ្សំជាភេសជ្ជៈ និងម្ហូបអាហារ ការព្យាបាលរបួស និងជួសជុលជាលិកាក្នុងរាងកាយមនុស្ស។ តាមរយៈការសិក្សាដដែល បានបង្ហាញថា ក្រូចឆ្មារមានសមត្ថភាពពង្រឹងទៅកាន់សុខភាពបេះដូង និងគ្រប់គ្រងទម្ងន់ ឬរក្សាទម្ងន់រាងកាយឱ្យមានតុល្យភាព រួមទាំងសុខភាពប្រព័ន្ធរំលាយអាហារផងដែរ។ ខាងក្រោមជាភ័ស្តុតាងបួនចំណុច ដែលបង្ហាញពីអត្ថប្រយោជន៍របស់ក្រូចឆ្មារ។

១. សុខភាពបេះដូង ៖ ក្រូចឆ្មារ គឺជាប្រភពនៃវីតាមីន C មានកម្រិតមួយខ្ពស់ ដោយឡែកតាមរយៈការសិក្សាដដែលនោះបានឱ្យដឹងថា ក្រូចឆ្មារមួយផ្លែ មានលទ្ធភាពផ្តល់វីតាមីន C ប្រហែល ៥៣មីលីក្រាម។ បើនិយាយអំពីទំទុកចិត្តនៃការចម្រាញ់វិតាមីន C វិញ មានរហូតទៅដល់ 60 ភាគរយ។ គួរជម្រាបជូនថា ការ​ទទួល​ទាន​បន្លែ និង​ផ្លែ​ឈើ ​ដែល​សម្បូរទៅដោយ​វីតាមីន C បានរួមចំណែក​កាត់​បន្ថយ​ហានិភ័យ​ចំពោះអាការៈដូចជា ​ជំងឺ​បេះដូង និង​ដាច់​សរសៃឈាម​ខួរក្បាលបានក៏ពិតមែន ប៉ុន្តែវីតាមីន C មិនមែនជាវីតាមីនតែមួយមុខអាចសន្និដ្ឋានបានថាល្អគ្រប់គ្រាន់សម្រាប់សុខភាពបេះដូងនោះទេ គឺត្រូវមានកត្តារួមផ្សំដទៃទៀត។

២.​ រក្សាតុល្យភាពគីឡូ នៃរាងកាយ ៖ ការរក្សាគីឡូមួយដែលមានតុល្យភាព មិនសំដៅទៅលើភាពស្អាតដែលបានកំណត់ដោយផ្នត់គំនិតនៃក្រុមមនុស្សណាមួយនោះទេ ប៉ុន្តែចង់សំដៅលើការរក្សាគីឡូឱ្យសមស្របនឹងតម្រូវការរាងកាយផ្ទាល់ខ្លួន យ៉ាងណាមិញ ផ្លែក្រូចឆ្មារ ក៏បានរួមចំណែកឱ្យរាងកាយមានគីឡូមានស្ថិរភាពតាមការចង់បាន។ នៅឆ្នាំ២០២១ ការសិក្សាមួយបានបង្ហាញថា សារធាតុក្នុងក្រូចឆ្មារ ធ្វើឱ្យមានអារម្មណ៍ថាឆ្អែត ទប់ចិត្តកុំឱ្យបរិភោគអាហារលើសកម្រិត។

៣. ការពារគ្រួសក្នុងតម្រងនោម ៖ គ្រួសក្នុងតម្រងនោម គឺជាដុំតូចៗម្យ៉ាងដែលចាប់ផ្តើមកកើតមាន នៅពេលដែលអាហារមានសំណល់មិនល្អ ឬរឹង និងរក្សាទុកបន្តិចម្តងៗនៅតម្រងនោម វាបន្តកើតមាននៅពេលទទួលទានមិនល្អជារឿយៗ។ យ៉ាងណាមិញ ជាតិអាស៊ីតនៃក្រូចឆ្មារ អាចជួយការពារគ្រួសក្នុងតម្រងនោម ដោយបង្កើនបរិមាណទឹកនោម និងមានសក្តានុពលនៃអ៊ីដ្រូសែនតាមរយៈទឹកនោម។ ការទទួលទានទឹកក្រូចឆ្មារកន្លះពែង ឬ១២៥មីលីលីត្រ ក្នុងមួយថ្ងៃ គឺជាឱកាសការពារ នៃការកកើតគ្រួសក្នុងតម្រងនោមចំពោះអ្នកដែលមានអាការនេះរួចហើយ។ ហើយដើម្បីរក្សាសុវត្ថិភាព និងប្រសិទ្ធភាព គួរពិគ្រោះជាមួយអ្នកជំនាញ ឬពេទ្យ ដោយហេតុថារាងកាយរបស់មនុស្សម្នាក់ៗមានត្រូវការខុសៗគ្នា។

៤. ការពារអាការស្លេកស្លាំង ៖ ភាពស្លេកស្លាំងបណ្តាលមកពីកង្វះជាតិដែក ហើយកើតឡើងនៅពេលដែលមនុស្សមិនទទួលបានជាតិដែកគ្រប់គ្រាន់ពីអាហារដែលធ្លាប់ទទួលទានកន្លងមក។ ដោយឡែកក្រូចឆ្មារមានផ្ទុកជាតិដែកមួយចំនួន ហើយរួមចំណែកការពារភាពស្លេកស្លាំងបានមួយកម្រិត៕