មហោស្រព​អក្សរសីល្ប៍ខ្មែរ សម្រាប់ឆ្នាំ២០២៣នេះ គ្រោងនឹងប្រារព្ធធ្វើ​ឡើង​រយៈពេល​៣ថ្ងៃ ចាប់ពីថ្ងៃទី២០ ដល់ថ្ងៃទី២២ ខែតុលា នៅខេត្តកោះកុង ក្រោម​ប្រធានបទ «សំឡេង​ចម្រុះពណ៌»។

អ្នកស្រី ហួត សុជាតា ជាអ្នកនិពន្ធ និងជា​សមាជិកស្ថាបនិក និងជាសមាជិកក្រុមប្រឹក្សាភិបាលនៃមហោស្រពអក្សរសិល្ប៍ខ្មែរ​ បង្ហាញចំណាប់អារម្មណ៍​ដោយថា អ្នក​ស្រីមានមោទនភាព ដែលជា​តំណក់ទឹក​ជួយ​បំពេញ​អាង នៃវិស័យ​អក្សរសីល្ប៍​នៅ​កម្ពុជា ។ ចំណែក​លោក ឥន្ទ សម៉ាណាក់ ប្រធានកម្មវិធី សម្តែងចំណាប់អារម្មណ៍ថា ឆ្នាំនេះជាឆ្នាំទី២ដែលរូបលោក​ខ្ញុំបានចូលរួមរៀបចំមហោស្រពអក្សរសិល្ប៍ខ្មែរ ហើយថា ការដែលលោកបន្តចូលរួមក៏​ដោយសារលោកនឹកអនុស្សាវរីយ៌កាលពីឆ្នាំមុនដែលឃើញអ្នកនិពន្ធ កវី អ្នកស្រឡាញ់អក្សរសិល្ប៍ គ្រូ និងសិស្សនិស្សិត បានចូលរួមយ៉ាងច្រើន និងទទួលបានបទពិសោធន៍ល្អៗពីកម្មវិធី។ «ដូច្នេះ សូមនិមន្តនិងអញ្ជើញចូលរួមឱ្យបានច្រើនកុះករ ដើម្បីទទួលបានបទពិសោធន៍ ចំណេះដឹង និងបង្ហាញពីការគាំទ្រដល់ផ្នែកអក្សរសិល្ប៍»។

សម្រាប់លោក ម៉ុង ម៉ានិត អ្នកនិពន្ធ អ្នកចម្រៀង និងអ្នក​និពន្ធបទភ្លេង ព្រមទាំងជា​ទូតសុឆន្ទៈ នៃមហោស្រព​អក្សរសីល្ប៍ប្រចាំឆ្នាំ២០២៣ បានថ្លែងថា លោកពិតជារីករាយ​ដែលបាន​ចូលរួម​ចំណែក​​ជាផ្នែក​មួយ នៃមហោស្រព​នៅ​ឆ្នាំនេះ។ លោកថា ការ​ចូលរួមនេះ នឹង​ជួយជំរុញ​ការ​ផ្សព្វផ្សាយ​អំពីមហោស្រព​ឱ្យ​សាធារណជនបានជ្រាប ក៏​ដូចជា​អភិវឌ្ឍន៍​វិស័យអក្សរសីល្ប៍ វិស័យអំណាន ជំរុញ និង​បង្កើន​ស្នាដៃនិពន្ធ ព្រមទាំងផ្សារ​ភ្ជាប់យ៉ាង​ជិតស្និទ្ធ​ជាមួយ​អ្នក​អាន និង​ប្រជាជន​កម្ពុជា​ឱ្យ​យល់​ច្បាស់​ពីសក្តានុពល នៃអក្សរសីល្ប៍ខ្មែរ។

សូមបញ្ជាក់ថា ឆ្នាំនេះ គឺជាឆ្នាំទី៦ហើយ នៃការ​ប្រព្រឹត្តទៅ នៃមហោស្រពអក្សរសីល្ប៍ខ្មែរ ដែលចាប់ផ្តើម​បង្កើត​ដំបូង​នៅ​ឆ្នាំ​២០១៧ ក្នុង​គោលបំណងធំបី គឺ ១) បណ្តុះស្មារតីស្រឡាញ់អក្សរសិល្ប៍ជាតិ ២) លើកកម្ពស់កិត្តិយស និងគុណតម្លៃរបស់អ្នកនិពន្ធ និង ៣) បង្កើនឱកាសក្នុងការទំនាក់ទំនង និងពង្រីកវិសាលភាពទីផ្សារដល់អ្នកនិពន្ធ និងវិស័យបោះពុម្ព និងអក្សរសិល្ប៍។​

សម្រាប់មហោស្រពអក្សរសិល្ប៍​ខ្មែរ​លើកទី៦ នឹងមានកម្មវិធីពិសេសៗ​ជាច្រើន​ដូចជា ពិព័រណ៍មរតកអក្សរសិល្ប៍ វេទិកាពិភាក្សាអំពីអក្សរសិល្ប៍នៃខេត្តកោះកុង សិក្ខាសាលានិពន្ធច្នៃប្រតិដ្ឋ ទស្សនកិច្ចវប្បធម៌ វេទិកាពិភាក្សា និងបទបង្ហាញអំពីវប្បធម៌អក្សរសិល្ប៍នៃខេត្តកោះកុង កម្មវិធីកំណាព្យ បញ្ចាំងភាពយន្តឯកសារ កម្មវិធីប្រកួតប្រជែងស្នាដៃអក្សរសិល្ប៍ និងកម្មវិធីទស្សនីយភាព ដែលល្ខោននិយាយ «ឃុនឆាងឃុនផែន» របាំ ចម្រៀង និងចាប៉ីដងវែងផងដែរ៕