ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្មវិធីទម្លាប់ទាំង៧របស់បុគ្គលឆ្នើម ដែលភាសាអង់គ្លេសហៅថា 7Habits ត្រូវបានគេចាត់ទុកថា ជាវិធីសាស្ត្រមួយជួយឱ្យបុគ្គលឆ្ពោះទៅរកភាពជោគជ័យនៅក្នុងអាជីវកម្ម និងអាជីពការងារ ។ សម្រាប់យុវជនវិញ ទម្លាប់ទាំង៧នឹងជួយពួកគេអាចគ្រប់គ្រងលើអ្វីៗដែលកើតឡើងក្នុងជីវិត ជួយឱ្យទទួលបានភាពឆ្នើមទាំងក្នុង និងក្រៅថ្នាក់រៀន ជួយអភិវឌ្ឍជំនាញភាពជាអ្នកដឹកនាំ និងកំណត់គោលដៅដែលជំរុញពួកគេឱ្យទទួលបានភាពឆ្នើមជាដើម។
អ្នកស្រី អ៊ុក សូនីតា នាយិកាសិក្សាធិការនៃបណ្តាញគ្រឹះស្ថានអប់រំ វ៉េស្ទឡាញន៍ គ្រុប មានប្រសាសន៍ថា កម្មវិធីទម្លាប់ល្អទាំង៧ ដែលភាសាអង់គ្លេសហៅថា 7Habits គឺជាកម្មវិធីបង្រៀនជំនាញទន់ដល់សិស្សានុសិស្ស ដោយពួកគេអាចយកទៅប្រើប្រាស់នៅពេលដែលពួកគេឈានជើងចូលទៅមហាវិទ្យាល័យ និងឈានជើងទៅកាន់ការប្រកបមុខរបរការងារទៅថ្ងៃអនាគតដែលមាន ដូចជា ការអភិវឌ្ឍសិស្សឱ្យមានជំនាញ និងទំនុកចិត្តលើខ្លួនឯង ចេះរៀបចំផែនការការងារ, ការធ្វើការងារដែលសំខាន់មុន ការធ្វើការងារជាក្រុម ការគិតបែប ឈ្នះ ឈ្នះ ការកសាងភាពជាអ្នកដឹកនាំក្នុងសតវត្សទី២១ និងលើកកម្ពស់ការយល់ដឹងអំពីវិន័យរបស់សិស្ស ដើម្បីធ្វើឱ្យប្រសើរឡើងនូវសមិទ្ធិផលផ្នែកសិក្សាធិការ។
បើតាមអ្នកស្រី សូនីតា ការបណ្តុះនូវទម្លាប់ល្អទាំង៧ ចាប់ផ្តើមតាំងពីកុមារតូចមក ពោលគឺនៅពេលកុមារមានអាយុ៣ឆ្នាំ, ៤ឆ្នាំ ឬ៥ឆ្នាំ នឹងធ្វើឱ្យគាត់មានភាពស៊ាំ ហើយនៅពេលដែលពួកគាត់ចូលរៀននៅកម្រិតបឋមសិក្សាគាត់នឹងយល់បានកាន់តែច្រើនតែម្តងចំពោះទម្លាប់ទាំងនោះ។
តើកុមារអាចរៀនទម្លាប់ទាំង៧របស់បុគ្គលឆ្នើមយ៉ាងដូចម្តេច ?
នាយិកាសិក្សាធិការនៃបណ្តាញគ្រឹះស្ថានអប់រំ វ៉េស្ទឡាញន៍ គ្រុប មានប្រសាសន៍ថា ត្បិតតែកុមារតូចមិនអាចអានអក្សរបានដូចមនុស្សធំ ប៉ុន្តែគេមានវិធីអាចឱ្យកុមារតូចយល់ពីទម្លាប់ទាំង៧នោះ តាមរយៈការបង្រៀនផ្ទាល់ ការបង្រៀនបែបបញ្រ្ជាប និងការបង្ហាញជាគំរូទៅដល់កុមារ។
អ្នកស្រី អ៊ុក សូនីតា នាយិកាសិក្សាធិការនៃបណ្តាញគ្រឹះស្ថានអប់រំ វ៉េស្ទឡាញន៍
“…វិធីសាស្រ្តបង្រៀន យើងប្រើជាគំរូភាគច្រើននៅកម្រិតតូចៗ ដោយសារកុមារតូចៗគាត់អត់រៀនទ្រឹស្តី អញ្ចឹងវិធីសាស្រ្តរបស់យើង យើងប្រើជាការធ្វើជាគំរូ បានន័យថា ឱ្យគាត់ឃើញជាគំរូ ដូចជាការធ្វើជាកិច្ចការផ្ទះ ហើយយើងមានជាសៀវភៅឱ្យកុមារផាត់ពណ៌ ដោយមានទាក់ទងទៅនឹង 7Habbit តែម្តង”
តាមលោកស្រី អ៊ុក សូនីតា ប្រសិនបើយើងមានចំណេះ មានជំនាញ ប៉ុន្តែឥរិយាបទមិនអាចធ្វើការចុះសម្រុងជាមួយអ្នកដទៃ មិនអាចសហការជាក្រុម មិនអាចគិតបែប ឈ្នះ ឈ្នះទេនោះគឺមិនអាចទទួលបានជោគជ័យដែរ។ ដូច្នេះការបណ្តុះទម្លាប់ល្អទាំង៧ ត្រូវចាប់ផ្តើមតាំងពីកុមារតូច ដោយពួកគេនឹងទទួលបាននូវគុណសម្បទាសតវត្សរ៍ទី២១ ដែលរួមមាន វិជ្ជាសម្បទា បំណិនសម្បទា និងចរិយាសម្បទា ដែលជាសម្បទាមិនអាចខ្វះបានសម្រាប់ជួយឱ្យពួកគេក្លាយទៅជា សសរទ្រូងរបស់ប្រទេសជាតិ និងជាអ្នកដឹកនាំនៅថ្ងៃអនាគត៕
