ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រុម OTHER011 ដែលមានសមាជិកចំនួន៧នាក់ សុទ្ធសឹងតែជាស្ថាបត្យករវ័យក្មេង មកពីវេទិកាអនាគត បានជាប់ពានរង្វាន់លេខ១ ក្នុងការប្រកួតប្រជែងស្នាដៃរចនាសហគមន៍ឆ្នាំ២០២៤ ប្រធានបទ «ភូមិ១ សហគមន៍១» សម្រាប់ការរចនាទីតាំងផ្សារកណ្ដាល ដោយផ្ដោតលើតម្រូវការប្រជាជនទូទៅ។
លោក សេស អរុណសក្កដា ជាស្ថាបត្យករ និងជាអ្នកស្រាវជ្រាវ នៃវេទិកាអនាគត និងជាប្រធានក្រុម OTHER011 និយាយថា លក្ខណៈពិសេសនៃការរចនាផ្សារកណ្ដាល ដែលគណៈកម្មការបានផ្តល់ពិន្ទុខ្ពស់រហូតអាចទទួលបានជ័យលាភីឯក នៃការប្រកួតប្រជែងស្នាដែរចនាសហគមន៍ឆ្នាំ២០២៤ រៀបចំដោយសមាគម អ្នកវិនិយោគ អ្នកសាងសង់ និងស្ថាបត្យកម្ពុជា គឺជាភាពសាមញ្ញ ដែលមិនគិតទៅលើអ្វីដែលឡូយឆាយពេក ប៉ុន្តែជារូបភាពមួយដែលអាចកើតមានឡើងជាក់ស្ដែង ផ្ដោតលើតម្រូវការរបស់ប្រជាពលរដ្ឋ អ្នកប្រើប្រាស់ផ្សារ អតិថិជន និងអាជីវករផ្ទាល់។ លោក អរុណសក្កដា បន្តថា ក្រុមរបស់លោកបានទៅសិក្សាទីតាំងផ្សារដោយផ្ទាល់តាមរយៈការសម្ភាសន៍អាជីវករយ៉ាងច្បាស់លាស់ ទើបចេញជាគំនិតរចនានេះឡើង ដើម្បីជួយសម្រួលតម្រូវការរបស់ប្រជាពលរដ្ឋទូទៅ។
ស្ថាបត្យករវ័យក្មេងរូបនេះ លើកឡើងថា ប្រសិនជាយើងចង់បានសហគមន៍មួយដែលមានភាពស្អិតរមួតជាមួយប្រជាពលរដ្ឋ គឺយើងត្រូវរៀបចំផ្ទះសម្បែង អគារ ផ្លូវសាធារណៈ ឱ្យមានលក្ខណៈមួយដែលប្រជាពលរដ្ឋគ្រប់មជ្ឈដ្ឋានអាចចូលរួមបាន។ ឧទាហរណ៍ ការរចនាផ្សារ គឺមិនមែនសម្រាប់តែអាជីវករតែមួយប្រភេទនោះទេ សូម្បីតែអ្នកលក់ចល័ត អ្នកលក់បន្លែតាមផ្លូវ អ្នករត់កង់បី អ្នករត់ស៊ីក្លូ ដែលមកផ្សារទិញប្រចាំថ្ងៃ ឬអ្នកមកលេង ក៏ត្រូវគិតគូរតាមតម្រូវការរបស់គាត់ទាំងចាស់ ទាំងក្មេង។
“នេះមិនមែនតែជាការងាររបស់ស្ថាបត្យករតែមួយនោះទេ ប៉ុន្តែក៏ជាការងាររបស់អ្នករៀបចំទីក្រុង និងនគរូបនីយករផងដែរ”
ផ្សារកណ្តាល គឺជាទីតាំង១ ក្នុងចំណោមទីតាំងទាំង៣ នៃគម្រោង សម្រាប់ការប្រកួតប្រជែងស្នាដៃរចនាសហគមន៍ឆ្នាំ២០២៤។ ផ្សារកណ្តាលមិនត្រឹមតែជាកន្លែងធ្វើពាណិជ្ជកម្មប៉ុណ្ណោះទេ ក៏ប៉ុន្តែក៏ជាមជ្ឈមណ្ឌលវប្បធម៌ផងដែរ។ ផ្សារនេះត្រូវបានបង្កើតឡើងតាំងតែពីសម័យកម្ពុជាក្រោមអាណានិគមបារាំង ដោយគ្រានោះផ្សារកណ្តាលបានក្លាយជាមជ្ឈមណ្ឌលកណ្តាលសម្រាប់ការធ្វើពាណិជ្ជកម្ម។ បន្ទាប់ពីកម្ពុជាទទួលបានឯករាជ្យនៅឆ្នាំ១៩៥៣ ផ្សារកណ្តាលបានបន្តធ្វើជាមជ្ឈមណ្ឌលសេដ្ឋកិច្ច និងសង្គមដ៏សំខាន់។ ក្រោយការដួលរលំនៃរបបខ្មែរក្រហម ផ្សារកណ្តាលត្រូវបានសាងសង់ឡើងវិញនៅក្នុងឆ្នាំ១៩៩០ ហើយមកទល់បច្ចុប្បន្នផ្សារកណ្តាលមានសភាពចាស់ និងកន្លែងលក់ដូរដ៏ច្របូកច្របល់ ប៉ុន្តែនៅតែជាផ្សារដ៏មមាញឹក ដែលឆ្លុះបញ្ចាំងពីសារៈសំខាន់ដ៏យូរអង្វែងនៃទីផ្សារក្នុងស្រុកនៅក្នុងសង្គមកម្ពុជា។
កញ្ញា តុប វិផល្លីន ជាស្ថាបត្យករ និងជាសមាជិកក្រុមជ័យលាភីឯកនេះ បញ្ជាក់បន្ថែមថា ស្ថាបត្យកម្ម គឺមិនគ្រាន់តែជាការគូសអគារស្អាតៗ អគារខ្ពស់ៗនោះទេ ប៉ុន្តែជាការមើលទៅលើបរិបទរស់នៅរបស់ប្រជាជនប្រចាំថ្ងៃផងដែរថា តើមានបញ្ហាអ្វីខ្លះដែលស្ថាបត្យករត្រូវដោះស្រាយក្នុងនាមជាប្រជាជនខ្មែរ និងគោរពតាមបរិបទខ្មែរ។ ជាក់ស្ដែង ក្នុងគម្រោងផ្សារកណ្ដាលនេះ ក្រុមខ្លួនសង្កេតឃើញថា ប្រជាជនដែលលក់ដូរនៅក្នុងផ្សារនេះមានភាពរញ៉េររញ៉ៃខ្លាំង ប៉ុន្តែភាពរញ៉េរញ៉ៃនេះ វាបានបង្កើតឱ្យមានជីវិតនៅតំបន់ផ្សារ។ ដូច្នេះការរចនាស្ថាបត្យកម្ម យើងត្រូវគិតទាំងស្អាត មានរបៀប និងផ្ដល់ផលប្រយោជន៍ជារួម៕
