ម្ហូបមានតម្លៃទាប រសជាតិឆ្ងាញ់ គុណភាពល្អ និងផ្តល់ស្នាមញញឹម ជាទស្សនវិស័យបណ្តុះបណ្តាលបណ្តាលធនធានមនុស្សជំនាញចម្អិនម្ហូបអាហារនៅរាជបណ្ឌិត្យសភាកម្ពុជា។ ជាមួយគ្នានេះ រាជបណ្ឌិត្យសភាកម្ពុជា បានបន្តលើកទឹកចិត្តឱ្យយុវជនខ្មែរចាប់ផ្តើមសិក្សាជំនាញចុងភៅ ដើម្បីបង្កើតមុខរបរផ្ទាល់ខ្លួន និងចូលរួមគាំទ្រវិស័យទេសចរណ៍ និងបដិសណ្ឋារកិច្ច។

នាពិធីបិទវគ្គបណ្តុះបណ្តាលវិជ្ជាជីវៈលើផ្នែកម្ហូបអាហារជំនាន់ទី៤ នារសៀលថ្ងៃអាទិត្យកន្លងទៅ លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា មានប្រសាសន៍ថា ការសិក្សាជំនាញម្ហូបអាហារងាយស្រួលឱ្យយុវជន និងអ្នកសិក្សារកការងារធ្វើបន្ទាប់ពីបញ្ចប់ការសិក្សា ។ កន្លងទៅមានសិក្ខាកាមចុងភៅជាច្រើនបានយកចំណេះដឹង និងជំនាញចុងភៅពីរាជបណ្ឌត្យសភាកម្ពុជាទៅពង្រឹងសមត្ថភាពបន្ថែមលើអាជីវកម្មម្ហូបអាហារដែលមានស្រាប់ និងបង្កើតអាជីវកម្មផ្នែកម្ហូបអាហារដោយខ្លួនឯង ។

ទន្ទឹមគ្នានេះ លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានកត់សម្គាល់ថា បណ្តាប្រទេសរីកចម្រើនជាច្រើន បានចាត់ទុកវិស័យម្ហូបអាហារជាអាទិភាពមួយចូលរួមបង្ហាញអត្តសញ្ញាណរបស់ប្រទេស និងប្រជាជនទៅកាន់ពិភពលោក ។ ប្រសិនបើចុងភៅ ឬអ្នកចម្អិនម្ហូបអាហារមានជំនាញច្បាស់លាស់ នោះនឹងធ្វើឱ្យភ្ញៀវទេសចរកោតសរសើរពីទឹកដៃចម្អិន បង្ហាញពីភាពប៉ិនប្រសប់ និងអារម្មណ៍កក់ក្តៅពេលទទួលទានអាហារ ។

លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា មានប្រសាសន៍បន្តថា ចុងភៅក្រៅពីធ្វើមុខម្ហូបមួយដែលមានតម្លៃសមរម្យ, រសជាតិ និងគុណភាពជាកត្តាសំខាន់ដែលអ្នកចម្អិតត្រូវយកចិត្តទុកដាក់ ។ ដើម្បីឱ្យម្ហូបឆ្ងាញ់ចាំបាច់ត្រូវឈរលើគោលការណ៍វិជ្ជាជីវៈ និងជំនាញបីចំណុចសំខាន់ៗ រួមមាន គុណភាពមនុស្ស, គុណភាពផលិតផល និងគុណភាពប្រទេសដែលមានបរិស្ថានល្អ ។ លើសពីនេះ ស្នាមញញឹមរបស់អ្នកទទួលទាន គឺបានមកពីកត្តាបីខាងលើ គឺតម្លៃថោក រសជាតិឆ្ងាញ់ ព្រមទាំងមានគុណភាពល្អ ។ ស្នាមញញឹមជាទីផ្សារដ៏សំខាន់ផ្សព្វផ្សាយមុខម្ហូបកម្ពុជាទៅកាន់ពិភពលោក ។

សូមជម្រាបថា វគ្គបណ្តុះបណ្តាលវិជ្ជាជីវៈលើផ្នែកម្ហូបអាហារជំនាន់ទី៤ មានបេក្ខជនសិក្ខាកាមចំនួន ៩នាក់ បញ្ចប់ការប្រឡង និងវាយតម្លៃពីចុងភៅជំនាញដូចជាលោក ស័រ សំអាង គ្រូបង្គោលចុងភៅនៅរាជបណ្ឌិត្យសភាកម្ពុជា លោក សែន ឬទ្ធី ប្រធានចុងភៅនៅសណ្ឋាគារ Fair Field by Marriott Phnom Penh និងលោក រិន ណារ៉ា ប្រធានចុងភៅនៅ Vehha Sky Bar and Restaurant៕