ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមពិតការងារនៅក្នុងឧស្សាហកម្មកាត់ដេរ មិនមែនមានត្រឹមតែការងារជាកម្មករ-កម្មការិនីកាត់ដេរ តែមួយមុខនោះទេ ប៉ុន្តែមានការងារជំនាញបច្ចេកទេសជាន់ខ្ពស់ជាច្រើនទៀត ដែលវិស័យនេះ កំពុងត្រូវការធនធានយុវជនខ្មែរឱ្យចូលរួម។
ជំនាញបច្ចេកទេសទាំងនោះ មានដូចជា ផ្នែកវិស្វករឧស្សាហកម្ម រចនាម៉ូដ ផ្នែកបញ្ជាទិញ ផ្នែកត្រួតពិនិត្យគុណភាព អ្នកជំនាញផ្នែកព័ត៌មានវិទ្យា និងអ្នកជំនាញធនធានមនុស្សជាដើម។ អ្នកជំនាញបច្ចេកទេសជាន់ខ្ពស់ទាំងអស់នេះ ក៏ទទួលបានប្រាក់បៀរវត្សខ្ពស់ផងដែរ។
លោក អាត ផល្លា ប្រធានផ្នែកកម្មវិធី នៃវិទ្យាស្ថានបណ្ដុះបណ្ដាលវិស័យកាត់ដេរនៅកម្ពុជា (CGTI) មានប្រសាសន៍ថា នៅកម្ពុជា វិស័យកាត់ដេរ គឺជាវិស័យមួយដែលមានភាពទូលំទូលាយ ហើយយុវជនគួរងាកមកចាប់យកជំនាញក្នុងឧស្សាហកម្មកាត់ដេរដែលកំពុងមានតម្រូវការទីផ្សារ។ លោក ផល្លា បន្តថា ក្នុងវិស័យកាត់ដេរនេះ មានមុខជំនាញជាច្រើនដែលបានផ្ដល់ឱកាសដល់យុវជន ដូចជា ផ្នែករចនាសម្លៀកបំពាក់ ដែលកំពុងមានតម្រូវការនៅកម្ពុជា ជាពិសេសក៏ទទួលបានប្រាក់ខែសមសម្យបន្ទាប់ពីបញ្ចប់វគ្គបណ្ដុះបណ្ដាល។
លោក អាត ផល្លា បញ្ជាក់បន្ថែមថា នៅវិទ្យាស្ថានបណ្ដុះបណ្ដាលវិស័យកាត់ដេរនៅកម្ពុជា (CGTI) កំពុងផ្ដល់វគ្គបណ្ដុះបណ្ដាលខ្លីដោយឥតគិតថ្លៃសម្រាប់យុវជនលើជំនាញ រួមមាន ទី១. ការបញ្ជាទិញ និងទី២. ជំនាញវិស្វកម្មឧស្សាហកម្ម គុណភាព និងផលិតកម្ម ដែលជាជំនាញកំពុងមានតម្រូវការទីផ្សារខ្ពស់ និងទទួលបានប្រាក់ខែខ្ពស់។ លោក ផល្លា បន្តថា យុវជន ជាពិសេស សិស្សានុសិស្សទើបប្រឡងចប់បាក់ឌុប ទោះលទ្ធផលជាប់ ឬធ្លាក់ និងសិស្សខ្វះលទ្ធភាពបន្តការសិក្សា អាចចុះឈ្មោះចូលរៀនបានដោយឥតគិតថ្លៃ ព្រមទាំងផ្ដល់ទីកន្លែងស្នាក់នៅ និងផ្ដល់ជូនអាហារថ្ងៃត្រង់ និងអាហារសម្រន់។
“ខ្ញុំលើកទឹកចិត្តដល់យុវជន ជាពិសេសសិស្សទើបប្រឡងបាក់ឌុបរួច ទោះជាប់ក្ដី ធ្លាក់ក្ដី គួរស្វែងរករៀនជំនាញ ជាពិសេសជំនាញ TVET គឺបានប្រាក់ខែខ្ពស់ រៀនឆាប់ចប់”។
ប្រធានផ្នែកកម្មវិធី បញ្ជាក់ថា វគ្គបណ្ដុះបណ្ដាលខ្លីនេះ មានរយៈពេលត្រឹមតែ ៧ខែកន្លះ យុវជនអាចចុះហ្វឹកហ្វឺនការងារ ដោយទទួលបានប្រាក់ឧបត្ថម្ភអំឡុងពេលហ្វឹកហ្វឺនការងារចំនួន ២៨០ដុល្លារក្នុងមួយខែ ហើយប្រសិនយុវជនបន្តធ្វើការចាប់ពីពីរទៅបីឆ្នាំ នឹងទទួលបានប្រាក់ខែចាប់ពី ៤០០ដុលារទៅ៥០០ដុល្លារឡើងទៅ៕
