ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសិក្សាមួយដែលបង្ហាញដោយអង្គការ UNICEF ឱ្យដឹងថា កុមារដែលលេងជាទៀងទាប់ជាមួយឪពុកម្តាយ ពួកគេមិនសូវមានបញ្ហាសុខភាពផ្លូវចិត្តមួយចំនួនដូចជា ជំងឺថប់បារម្ភ ជំងឺធ្លាក់ទឹកចិត្ត ឆេវឆាវ និងបញ្ហាដំណេកនោះទេ។ ជាមួយគ្នានេះ UNICEF បានលើកទឹកចិត្តដល់ឪពុកម្តាយគួរចំណាយពេលវេលាលេងជាមួយកូនៗ ដើម្បីពង្រឹងសុខភាពផ្លូវចិត្តពួកគេ។
បើតាម UNICEF ការលេងជាមួយកូនៗ គឺជួយពង្រឹងចំណងរវាងឪពុកម្តាយ និងកូន តាមរយៈការផ្តល់ឱ្យកូននូវសេចក្តីស្រឡាញ់ ការលួងលោម និងការយកចិត្តទុកដាក់។ សកម្មភាពនេះ គឺឪពុកម្តាយកំពុងបង្កើតមូលដ្ឋានគ្រឹះសម្រាប់ការអភិវឌ្ឍជំនាញផ្នែកស្មារតី និងសង្គម ដែលគាំទ្រដល់សុខភាពផ្លូវចិត្ត និងសុខុមាលភាពរបស់ពួកគេនាពេលអនាគត។
ជាមួយគ្នានេះ ការផ្តល់ពេលវេលាឱ្យកុមារលេង ក៏ជួយឱ្យពួកគេអាចគ្រប់គ្រង និងដោះស្រាយបញ្ហាអារម្មណ៍នានា ដូចជា ការឈឺចាប់ ការភ័យខ្លាច ឬការបាត់បង់ ខណៈពេលដែលពួកគេនៅតែអាចលេងដូចជាកូនក្មេង។
ការលេងក៏ជួយកាត់បន្ថយភាពតានតឹង ដោយតាមការសិក្សា នៅពេលអ្នករីករាយនឹងពេលវេលាសប្បាយៗ និងសើចក្អាកក្អាយជាមួយគ្នា រាងកាយរបស់អ្នកនឹងបញ្ចេញអរម៉ូនអង់ដូហ្វីន ដែលជំរុញឱ្យមានអារម្មណ៍ល្អ និងវិជ្ជមាន។
ការសិក្សាក៏បង្ហាញដែរថា ការលេងក៏ជួយបង្កើតទំនុកចិត្ត ព្រោះនៅពេលដែលអ្នកឆ្លៀតពេលលេងជាមួយកូន កូនតូចរបស់អ្នកនឹងដឹងថា ពួកគេមានតម្លៃ និងរីករាយក្នុងការនៅក្បែរ, ការចែករំលែកបទពិសោធន៍ជាមួយគ្នា ធ្វើឱ្យកូនរបស់អ្នកដឹងថា ពួកគេត្រូវបានគេស្រឡាញ់ និងមានសារៈសំខាន់ ដូច្នេះហើយ សូមញញឹម ចូលរួមលេង និងរីករាយគ្រប់ពេលវេលាជាមួយកូនៗរបស់អ្នក៕
