ក្រុមសិស្សកម្ពុជាមកពីសាលាAcademy of Careers & Technology (ACT) បានជាប់ជ័យលាភីមេដាយមាស ពីសន្និសិទ STICK Conference នៅប្រទេសម៉ាឡេស៊ី តាមរយៈគម្រោងបង្កើតកម្មវិធីទូរស័ព្ទដៃ (Mobile App) ដើម្បីគាំទ្រសេវាសុខាភិបាលសម្រាប់ប្រជាពលរដ្ឋនៅតំបន់ជនបទ។ ការប្រកួតនេះ មានការ​ចូលរួមពីយុវជនឆ្នើមចំនួន ៧៥ នាក់ មក​ពី៥ប្រទេសក្នុងតំបន់អាស៊ាន។

យុវតី ធី សុខចាន់ ជាសិស្សថ្នាក់ទី១១ ជំនាញគណនេយ្យ និងអាជីវកម្មបច្ចេកវិទ្យា នៃសាលារៀន Academy of Careers & Technology (ACT) និងជាតំណាងក្រុម បានឱ្យដឹងថា ការ​ចូលរួម​ប្រកួត​នៅ​ប្រទេស​ម៉ាឡេស៊ីនេះ ក្រុមរបស់ខ្លួន​ចង់បង្ហាញពីសមត្ថភាពដែល​យុវជន​កម្ពុជាមាន ហើយ​មួយ​ទៀត ក៏​ចង់នាំយកវប្បធម៌របស់ខ្មែរទៅបង្ហាញក្នុងកម្មវិធីនោះ ក៏ដូចជាចង់ទទួលបានបទពិសោធថ្មីៗ​ និងចំណេះដឹងផ្នែកវប្បធម៌របស់ប្រទេសនីមួយៗ។

សុខចាន់ បន្ថែមថា កម្មវិធី STICK Conference គេ​បាន​តម្រូវឱ្យបេក្ខជនទាំងអស់បង្កើតអ្វីមួយ ដើម្បីដោះស្រាយបញ្ហាជាក់ស្ដែងក្នុងប្រទេសនីមួយៗ។ ដូច្នេះ ទើបក្រុមរបស់ខ្លួនជ្រើសរើសយកគម្រោងបង្កើតកម្មវិធីក្នុងទូរស័ព្ទដៃ​ ដើម្បីប្រើប្រាស់ក្នុងសេវាសុខាភិបាល​សម្រាប់អ្នករស់នៅតំបន់ជនបទ​របស់ប្រទេសកម្ពុជា។ ​សុខចាន់ បន្តថា ការបង្កើតកម្មវិធីក្នុងទូរស័ព្ទដៃនេះ ដើម្បីជួយដល់សេវាសុខាភិបាលនៅតំបន់ដាច់ស្រយាល ដើម្បីឱ្យប្រជាពលរដ្ឋងាយស្រួលស្វែងរកមន្ទីរពេទ្យ ឬត្រូវការជំនួយផ្សេងៗ និងទាក់ទងជាមួយគ្រួសារប្រសើរជាងមុន។

តំណាងក្រុមកម្ពុជា​រូបនេះ បន្ថែមថា គម្រោងកម្មវិធីទូរស័ព្ទដៃដែលជួយដល់សេវាសុខាភិបាលនេះ​ មានលក្ខណៈងាយស្រួលក្នុងការប្រើប្រាស់ រួមមាន ទី១. ការណែនាំអំពីការថែទាំសុខភាព ដែលមានវីដេអូខ្លីៗ និងវិធីជួយសង្គ្រោះបឋម, ទី២. ការទំនាក់ទំនងទៅមន្ទីរពេទ្យ និងគ្រូពេទ្យ គឺមានលេខទំនាក់ទំនង និងសង្គ្រោះបន្ទាន់ (Emergency) ដើម្បីទៅដល់មន្ទីរពេទ្យដែលនៅក្បែរបំផុត និង ទី៣. ទំនាក់ទំនងជាមួយគ្រួសារ ដោយខាងមន្ទីរពេទ្យអាចផ្ដល់ដំណឹងដល់គ្រួសារអំពីស្ថានភាពជំងឺរបស់សមាជិកគ្រួសារ។

សម្រាប់កត្តាដែល​ជំរុញឱ្យក្រុមរបស់ខ្លួនទទួលបានជ័យលាភីមេដាយមាសនេះ សុខចាន់ បញ្ជាក់ថា នោះគឺដោយសារ ទី១. ការដោះស្រាយបញ្ហាចំគោលដៅ ដោយសារប្រទេសកម្ពុជាកំពុងជួបបញ្ហានេះ, ទី២. ដំណោះស្រាយមានលក្ខណៈពិសេសត្រង់ចំណុចទំនាក់ទំនងជាមួយគ្រូពេទ្យ មានសេវាសង្គ្រោះបន្ទាន់ អាចទាក់ទងជាមួយគ្រួសារ និងទី៣. ការពន្យល់ទៅគណៈកម្មការច្បាស់ៗ ឆាប់យល់។

“ខ្ញុំមានអារម្មណ៍ថារំភើបព្រោះមិនគិតថាបានលេខ១ ហើយនេះជាលើកទីមួយដែលទៅប្រកួតនៅក្រៅប្រទេស ហើយយកជ័យលាភីត្រឡប់មកប្រទេសវិញ មានអារម្មណ៍ថាមោទនភាព”

យុវតី ធី សុខចាន់ បន្ថែមទៀតថា គម្រោងនេះ ធ្វើឡើងរយៈពេល២ថ្ងៃប៉ុណ្ណោះ ដើម្បីឱ្យចេញជារូបរាង រួមមាន វីដេអូ ពុម្ពគំរូ (Prototype) និងកម្មវិធីទូរស័ព្ទដៃ (​App)។ សុខចាន់ បន្តថា រូបនាងរៀនសូត្របានច្រើនបន្ទាប់ពីចូលរួមកម្មវិធីនេះ រួមមាន ទី១. អភិវឌ្ឍផ្នែកភាសាអង់គ្លេស ពេលដល់ទីនោះត្រូវប្រើភាសាអង់គ្លេសសុទ្ធ ហើយព្យាយាមនិយាយឱ្យគេយល់ពីគម្រោង និងទី២. អភិវឌ្ឍសមត្ថភាពគិត ដោយ​ត្រូវតែគិតអ្វីលឿនៗ ត្រូវតែមានគំនិតច្នៃប្រតិដ្ឋក្នុងការបង្កើតអ្វីមួយ ពោលគឺ ត្រូវធ្វើអ្វីមួយ គិតឱ្យលឿន ធ្វើ​ឱ្យ​លឿន។

សម្រាប់គម្រោងទៅថ្ងៃមុខទៀត ក្រុមរបស់ សុខចាន់ មានបំណងចង់ធ្វើឱ្យចេញជារូបរាងសម្រាប់កម្មវិធីទូរស័ព្ទដៃមួយ​នេះ ដោយសារតែនាងមើលឃើញថា ប្រទេស​កម្ពុជាកំពុងជួបបញ្ហានេះ ហើយកម្មវិធីទូរស័ព្ទដៃនេះ គឺមានអត្ថប្រយោជន៍ច្រើនជួយទៅដល់វិស័យសុខាភិបាល។

យុវតី ធី សុខចាន់ ក៏បានលើកទឹកចិត្តដល់យុវជនកម្ពុជា សូម​ខិតខំប្រឹងប្រែងរៀនសូត្រ ព្រោះពេលយើងមានសមត្ថភាព យើងនឹងមានឱកាសបានទៅចូលរួមកម្មវិធីផ្សេងៗ មិនថាក្នុងប្រទេស ឬក្រៅប្រទេស។ “កុំគិតថាខ្លួនឯងធ្វើមិនបាន បើខ្ញុំធ្វើបាន អ្នកទាំងអស់គ្នាក៏អាចធ្វើបានដូចគ្នា! លើសពីនេះ ខិតខំប្រឹងប្រែងរៀនភាសាអង់គ្លេស នៅពេលយើងមានសមត្ថភាព ខ្លាំងភាសាអង់គ្លេស នឹងមានឱកាសចេញទៅក្រៅប្រទេស ក៏ដូចជាទទួលបានជ័យលាភីផ្សេងៗ“៕