ក្រសួងការងារ និង​បណ្តុះបណ្តាលវិជ្ជាជីវៈ តំណាង​ដោយ​ឯកឧត្តម ជា កុសល កាលពីសប្តាហ៍​កន្លងទៅនេះ បាន​ចុះអនុស្សរណៈ នៃការយោគ​យល់គ្នា (MoU) ជាមួយ​ក្រុមហ៊ុន Geely Talent Development Group ដែលជាក្រុមហ៊ុនបុត្រសម្ព័ន្ធមួយក្នុងចំណោមក្រុមហ៊ុនបុត្រសម្ព័ន្ធទាំង៦ នៃក្រុមហ៊ុន Geely Holding Group ក្នុងគោលបំណងបង្កើតនូវក្របខណ្ឌនៃកិច្ចសហប្រតិបត្តិការក្នុងភាពជាដៃគូសាធារណៈ និងឯកជន ដើម្បីលើកកម្ពស់គុណភាព និងគំនិតច្នៃប្រឌិតនៅក្នុងការអប់រំបណ្ដុះបណ្ដាលបច្ចេកទេស និងវិជ្ជាជីវៈ តាមរយៈការប្រើប្រាស់បញ្ញាសប្បនិម្មិត (AI)។

យោង​តាម​ការ​ប្រកាស​របស់ក្រសួងការងារ និង​បណ្តុះបណ្តាលវិជ្ជាជីវៈ កិច្ចសហការនេះ រួមបញ្ចូលទាំងការរចនា​គំរូអប់រំសម័យថ្មី ដើម្បីសម្រេចបាននូវការអភិវឌ្ឍប្រកបដោយចីរភាព និងការចែករំលែកធនធានរយៈពេលវែង ក៏ដូចជាលើកកម្ពស់ការបណ្ដុះបណ្ដាលជំនាញ និងការផ្លាស់ប្ដូរបទពិសោធគ្រូ-និស្សិត ដើម្បីឆ្លើយ​តបនឹង​តម្រូវការទីផ្សារការងារបច្ចុប្បន្ន និងអនាគត ស្របតាមទិសដៅឧស្សាហកម្ម៤.០។

ឯកឧត្តម ស៊ុន មេសា អ្នកនាំពាក្យ​ក្រសួងការងារ និង​បណ្តុះបណ្តាល វិជ្ជាជីវៈ មានប្រសាសន៍ថា កិច្ច​សហប្រតិបត្តិការ​នេះ នឹង​មាន​រយៈពេល៣ឆ្នាំ ដោយផ្តើមពីថ្ងៃតី១ ខែមករា ឆ្នាំ២០២៦ រហូត​ដល់ថ្ងៃទី១ ខែមករា ឆ្នាំ២០២៩។

បើតាម ឯកឧត្តម ស៊ុន មេសា តាមរយៈ MoU នេះ នឹង​ផ្តល់​ផលប្រយោជន៍​ដូចជា ការអភិវឌ្ឍមាតិកានៃការបណ្តុះបណ្តាលជំនាញបច្ចេកទេស និងវិជ្ជាជីវៈ ដែលដំណើរការដោយបញ្ញាសិប្បនិម្មិត AI ដោយប្រើប្រាស់គម្រូដែលមានស្រាប់របស់ក្រុមហ៊ុន Geely Talend Development Group លើការហ្វឹកហ្វឺនជំនាញ, ការហាត់ការ, ការសិក្សាតាមរយៈការអនុវត្តផ្ទាល់, ការស្វែងរកការងារធ្វើ និងសេវាផ្តល់ការងារ ដែលមានភាពស៊ីសង្វាក់គ្នា។

ថែមពីនេះ ក៏មានការពង្រឹងការបណ្តុះបណ្តាលជំនាញរយៈពេលខ្លី និងថ្នាក់បណ្តុះបណ្តាល​ដោយផ្តោតលើ​ឯកទេសឧស្សាហកម្ម ក៏​ដូចជា​ការ​អភិវឌ្ឍមជ្ឈមណ្ឌលបណ្តុះបណ្តាល និងកម្មវិធីបណ្តុះបណ្តាលជនបង្គោល ដើម្បីបង្កើនប្រសិទ្ធភាពនៃការបណ្តុះបណ្តាលដល់សិក្ខាកាម។ ជាពិសេស​ទៅទៀតនោះ គឺការសម្រួលដល់​ការផ្លាស់ប្តូរ​បទសោធន៍សម្រាប់សិក្ខាកាម និងអ្នកហ្វឹកហ្វឺន និងការហាត់ការនៅក្រៅប្រទេសជាដើម។

សូមជំរាបជូនថា ក្រុមហ៊ុន Geely Talent Development Group គឺជាផ្នែកមួយដ៏សំខាន់របស់ក្រុមហ៊ុន Geely Holding Group ជាក្រុមហ៊ុនមេរបស់រថយន្ត Geely, Volvo, Lotus និង Zeekr ជាដើម។ ក្រុមហ៊ុន Geely Talent Development Group មានបេសកកម្មសំខាន់ ក្នុងការ​ធ្វើ​សមាហរណកម្ម​រវាងឧស្សាហកម្ម និង​ការអប់រំ ដោយ​មានន័យថា ក្រុមហ៊ុន​នេះ និងសហការជាមួយ​សាកលវិទ្យាល័យ ក៏​ដូចជាវិទ្យាស្ថាននានា​ ដើម្បី​បណ្តុះបណ្តាល​សិស្ស​ឱ្យ​ចេះ​ជំនាញ​ជាក់ស្តែង​ដែល​រោងចក្រ និងក្រុមហ៊ុន​ត្រូវ​ការ ដូចជា​ការផលិតរថយន្ត, ការ​រចនា, បច្ចេកវិទ្យា AI និងការ​បង្កើតថាមពលថ្មីជាដើម៕