យុវសិស្ស ឡាយ ទីទី គឺជាម្ចាស់ជ័យលាភីលេខ១ ផ្នែកគណិតវិទ្យា ក្នុងប្រឡងសិស្សពូកែទូទាំងប្រទេស នៅឆ្នាំ២០២៤នេះ ក្នុងកម្រិតថ្នាក់ទី៩ ។ លទ្ធផលដ៏ល្អនេះ ទីទី និយាយថា គឺមានអត្ថន័យសំខាន់សម្រាប់រូបគេផ្ទាល់ ដោយ​បានផ្ដល់កិត្តិយសយ៉ាងធំធេងដល់រូបគេផ្ទាល់ គ្រួសារ សាលារៀន និងខេត្តរបស់ខ្លួន។

ឡាយ ទីទី ជាសិស្សថ្នាក់ទី៩ នៃវិទ្យាល័យ១០ មករា ១៩៧៩ ខេត្តសៀមរាប ។ ទីទី បានប្រាប់ AMS Education ថា មូលហេតុ​ដែល​រូបគេ​ចូលរួមប្រឡងសិស្សពូកែទូទាំងប្រទេសផ្នែកគណិតវិទ្យា ថ្នាក់ទី៩ គឺផ្តើម​ចេញពី​ការ​ចង់សាកល្បងយកបទពិសោធន៍ ដោយកាលរៀន​ថ្នាក់ទី៨ រូបគេបានឃើញពីការប្រឡងសិស្សពូកែ ហើយ​ក្រោយមកក៏បានឃើញសិស្សច្បងចូលរួមប្រឡង​ ទើបជំរុញចិត្តឱ្យរូបគេចង់ទទួលបានបទពិសោធន៍នៃការប្រឡងសិស្សពូកែផ្នែកគណិតវិទ្យានេះ ហើយ​ដាក់ផែនការ​ខិតខំប្រឹងប្រែងរៀនសូត្រដើម្បីចូលរួមក្នុងការប្រឡងសិស្សពូកែ​ឱ្យ​បាន។

ម្ចាស់ជ័យលាភីលេខ១ ផ្នែកគណិតវិទ្យា ថ្នាក់ទី៩ រូបនេះ បញ្ជាក់បន្ថែមថា ការចូលរួមប្រឡងសិស្សពូកែនេះ ក៏​មានការចូលរួមគាំទ្រពីក្រុមគ្រួសារ លោកគ្រូ អ្នកគ្រូ និងមិត្តភក្ដិផងដែរ។ ទីទី ថា ដំបូងឡើយ​គេ​មិនធ្លាប់រំពឹងថា រូបគេអាចជាប់ជ័យលាភីលេខ១នោះនេះ ព្រោះវិញ្ញាសាប្រឡងសិស្សពូកែថ្នាក់ទី៩ឆ្នាំនេះ អាចនិយាយបានថា មានកម្រិតពិបាក ប៉ុន្តែរូបគេនៅតែអាចជំនះ និងដោះស្រាយលំហាត់បាន។

ខ្ញុំមានអារម្មណ៍ភ្ញាក់ផ្អើល និងរំភើបខ្លាំង ដែលបានជាប់ជ័យលាភីលេខ១នេះ ព្រោះមិននឹកស្មានថា អាចជាប់ជ័យលាភីនេះ

យុវសិស្ស ឡាយ ទីទី

ជាមួយគ្នានេះ យុវសិស្ស ឡាយ ទីទី ក៏បានចែករំលែកបទពិសោធន៍ក្នុងការរៀនគណិតវិទ្យា សម្រាប់សិស្សានុសិស្សដ៏ទៃទៀតផងដែរ ដោយថា ការរៀនគណិតវិទ្យា អាចមានការលំបាកសម្រាប់សិស្សមួយចំនួន ដោយសារគណិតវិទ្យា មានរូបមន្តច្រើន និងលំហាត់ច្រើន។ តែយ៉ាងណា ដើម្បីរៀនគណិតវិទ្យា​​ឱ្យពូកែ គឺទាមទារឱ្យសិស្សស្វ័យសិក្សាឱ្យបានច្រើន និងអនុវត្តលំហាត់ឱ្យបានច្រើន។ លើសពីនេះ ត្រូវរៀនអំពីគ្រឹះគណិតវិទ្យាតាំងពីថ្នាក់ក្រោម និងស្គាល់រូបមន្តឱ្យបានច្បាស់។ ក្រៅពីរៀននៅម៉ោងសិក្សារដ្ឋ ទីទី ក៏បន្តរៀនគួរមួយម៉ោងបន្ថែមទៀតពេលទំនេរពីម៉ោងសិក្សារដ្ឋ និងស្វ័យសិក្សាបន្ថែមនៅផ្ទះ។

ម្ចាស់ជ័យលាភីលេខ១ ផ្នែកគណិតវិទ្យា ថ្នាក់ទី៩ រូបនេះ ក៏បានបង្ហាញបំណង ក្នុង​ការ​បន្តចូលរួមក្នុងការប្រឡងសិស្សពូកែថ្នាក់ទី១២ ផ្នែកគណិតវិទ្យា បន្តទៀត ដើម្បីមានបទពិសោធន៍ក្នុងការប្រឡងសិស្សពូកែនេះ។ ក្នុងនោះ ទីទី ក៏បានលើកទឹកចិត្តដល់សិស្សានុសិស្សដទៃទៀត ត្រូវខិតខំរៀនសូត្រឱ្យបានច្រើន រៀនឱ្យពូកែ ដើម្បីជាកិត្តិយសមួយនៅពេលយើងបានទទួលជ័យលាភី​ល្អ ចំណាត់ថ្នាក់ល្អ វាជាកិត្តិយសល្អសម្រាប់ខ្លួនឯង សម្រាប់គ្រួសារ និងសាលារៀនរបស់យើងផងដែរ។

សម្រាប់សិស្សានុសិស្សដែលមានបំណងចូលរួមប្រឡងសិស្សពូកែ ទីទី ក៏​បានផ្តល់ជាដំបូន្មាន​ដែលជាបទពិសោធន៍របស់ខ្លួន ដោយថា សិស្សដែលមានបំណងចង់ប្រឡងសិស្សពូកែ ត្រូវត្រៀមខ្លួនឱ្យបានច្រើន និងសិក្សាស្វែងយល់អពីការប្រឡងឱ្យបានច្រើន ហើយប្រសិនបើមិនទាន់ទទួលបានលទ្ធផលល្អក៏ដោយ យើងក៏អាចទទួលបានបទពិសោធន៍នៃការប្រឡង ហើយអាចយកបទពិសោធន៍នេះ ធ្វើឱ្យបានល្អក្នុងការចូលរួមប្រឡងម្ដងទៀតនៅឱកាសក្រោយ៕