បើតាមការបោះពុម្ពផ្សាយនៅក្នុងទស្សនាវដ្តីស្រាវជ្រាវវិទ្យាសាស្ត្រសង្គម (Social Science Research) បង្ហាញថា ការចិញ្ចឹមកូននៅក្នុងផ្ទះដែលពោរពេញទៅដោយសៀវភៅមានឥទ្ធិពលជាវិជ្ជមានដល់ការលូតលាស់នៃការសិក្សារបស់ពួកគេនាពេលអនាគត និងការសម្រេចបានការងារ។ ស្របគ្នានេះ ការរាយការណ៍របស់ Pacific Standard ការសិក្សាបានរកឃើញថា នៅពេលនិយាយអំពីការធ្វើតេស្តស្តង់ដារ មិនថាសៀវភៅប៉ុន្មានក្បាលដែលគ្រួសារមានរួចហើយ ការបន្ថែមសៀវភៅនីមួយៗឱ្យទៅជាបណ្ណាល័យនៅផ្ទះជួយឱ្យកុមារពូកែជាងមុន។

ខាងក្រោមនេះ ជាគន្លឹះមួយចំនួនជួយឪពុកម្ដាយលើកទឹកចិត្តកូនឱ្យមានវប្បធម៌នៃការអានយ៉ាងរីករាយ រួមមាន៖

១. បង្កើតកន្លែងដាក់សៀវភៅនៅផ្ទះ ៖ កុមារអាចមានការចាប់អារម្មណ៍យ៉ាងខ្លាំងចំពោះប្រធានបទជាក់លាក់មួយ។ ទន្ទឹមគ្នានេះ ឪពុកម្ដាយអាចរៀបចំជាកន្លែងដាក់សៀវភៅនៅផ្ទះ ដូចជា ទូរសៀវភៅ ឬធ្នើរសៀវភៅ ដោយត្រូវស្វែងរកសៀវភៅដែលកូនៗរបស់ខ្លួនអាចចាប់អារម្មណ៍ដោយខ្លួនឯង ក៏ដូចជាសៀវភៅដែលនឹងជួយពួកគេរកឃើញមនុស្ស និងវប្បធម៌ជុំវិញពិភពលោក។ ឧទាហរណ៍ បញ្ចូលប្រភេទសៀវភៅជាច្រើនរួមទាំង រឿងប្រឌិត និងរឿងវិទ្យាសាស្រ្តពិត។

២. ចែករំលែកសៀវភៅដែលអ្នកស្រឡាញ់កាលពីក្មេង ៖ គ្មានអ្វីជាគំរូនៃការស្រឡាញ់ល្អជាងការអានដ៏រីករាយរបស់អ្នកនោះទេ នៅពេលដែលអ្នកចែករំលែកសៀវភៅដែលអ្នកស្រឡាញ់តាំងពីកុមារភាពទៅកូនៗរបស់ខ្លួននោះទេ។ ទន្ទឹមគ្នានេះ ប្រហែលជាអ្នកមានអនុស្សាវរីយល្អៗដែលអ្នកបានរក្សាទុកកាលពីជំនាន់អ្នកនៅក្មេង ដែលវាក៏ជាភាពភ្ញាក់ផ្អើលមួយប្រសិនអ្នកចែករំលែករបស់ទាំងនោះទៅកូនៗ។

៣. ស្វែងរកសៀវភៅដែលត្រូវនឹងចំណាប់អារម្មណ៍របស់កូនអ្នក ៖ ភ្ជាប់ទំនាក់ទំនងកុមារជាមួយសៀវភៅ គឺពិតជាពិបាកណាស់ ក្នុងនាមជាឪពុកម្តាយក្នុងសម័យបច្ចេកវិទ្យា ។ យ៉ាងណាក៏ដោយ ឪពុកម្ដាយត្រូវគិតអំពីប្រធានបទដែលកូនរបស់អ្នកចូលចិត្ត ឬប្រហែលជាមានការជក់ចិត្តតាមរយៈសៀវភៅ ដែលអាចជា តារាវិទ្យា រហូតដល់សត្វនៅក្នុងសួនសត្វ។ល។

៤. ផ្តល់សៀវភៅដើម្បីអបអរសាទរព្រឹត្តិការណ៍ និងសមិទ្ធផលនានា៖ នៅពេលកូនៗរបស់អ្នកទទួលបានលទ្ធផលសិក្សាល្អ ឈ្នះការប្រកួតផ្សេងៗ ឬបញ្ចប់ថ្នាក់បឋមសិក្សា គឺជាឱកាសដែលឪពុកម្ដាយអាចផ្ដល់សៀវភៅដែលពួកគេពេញចិត្តសម្រាប់ជាកាដូ។ បន្ទាប់មក នៅពេលដែលកូនៗរបស់អ្នករំលឹកអនុស្សាវរីយ៍របស់ពួកគេអំពីព្រឹត្តិការណ៍ទាំងនេះ ពួកគេក៏នឹងភ្ជាប់សៀវភៅដ៏មានអត្ថន័យផងដែរ៕