ភ្នំពេញ – កុមារងាយរងគ្រោះបំផុតដោយសារកម្តៅ ហើយការវាយប្រហារដោយកម្តៅ (Heatstroke) អាចឱ្យពួកគេស្លាប់បាន។ ទន្ទឹមគ្នានេះ ទោះបីជាឪពុកម្ដាយ ឬអាណាព្យាបាលអាចមានអារម្មណ៍សុខស្រួលនៅសីតុណ្ហភាពជាក់លាក់ក៏ដោយ នេះមិនគួរមានន័យថាកុមារមានអារម្មណ៍ដូចគ្នានោះទេ ដោយសារពួកគេមិនទាន់មានស្ថេរភាពកម្ដៅ។ នេះបើតាមការចេញផ្សាយរបស់ អង្គការយូនីសេហ្វ ។

ការចេញផ្សាយនេះ បានបង្ហាញថា កុមារតូចៗមិនចេះនិយាយប្រាប់ពីអារម្មណ៍របស់ពួកគេទេ ជារឿយៗកុមារមិនដឹងថា ពួកគេគួរចេញឆ្ងាយពីកម្ដៅនោះទេ ការវាយប្រហារដោយកម្ដៅ (Heatstroke) អាចកើតឡើងភ្លាមៗ និងគ្មានឱ្យ​សញ្ញាដឹងមុន ។ ការវាយប្រហារដោយកម្ដៅ (Heatstroke) អាចបណ្ដាលឱ្យកុមារស្លាប់បាន។ ទន្ទឹមគ្នានេះ ការវាយប្រហារដោយកម្ដៅ (Heatstroke) ចំពោះកុមារជារឿយៗ អាចការពារបាន។

ជាមួយគ្នានេះ រោគសញ្ញាខ្លះៗនៃការវាយប្រហារដោយកម្ដៅ (Heatstroke) លើកុមារ រួមមាន ក្ដៅខ្លួនខ្លាំង អាចលើសពី ៤០អង្សា ឈឺក្បាល វិលមុខ រាគ ក្អួត ហឹងត្រចៀក អស់កម្លាំង បាត់បង់ស្មារតី រមូលក្រពើ ភ្លឹក ធីងធោង ស្បែកស្ងួតឬក្រហម  បេះដូងលោតញាប់។ ចំណែកក្មេងអាយុលើសពីប្រាំឆ្នាំ ច្រើនមានរោគសញ្ញា ដូចជា ស្បែកស្ងួតនិងក្តៅ និយាយមិនស៊ីសង្វាក់គ្នា ឈឺក្បាលខ្លាំង​ កន្ទួលលើស្បែក ជាដើម។

ចំពោះរបៀបការពារកុមារពីកម្ដៅ គឺមានដូចជា បើយកទារកទើបនឹងកើត និងចេះដើរ ចេញទៅខាងក្រៅ គួរតែធ្វើនៅពេលព្រឹក ឬពេលរសៀលបន្តិច។ កុមារគួរស្លៀកពាក់ខោអាវស្ដើង រលុង និងមានមួក មានទឹកមួយដបជាប់ខ្លួនជានិច្ច ដែលអ្នកគួរឱ្យកុមារញ៉ាំឱ្យបានញឹកញាប់។ ជាពិសេស កុំទុកកុមារតូចនៅក្នុងរថយន្តក្រោមកម្ដៅថ្ងៃតែម្នាក់ឯង។

បើតាមអង្គការយូនីសេហ្វ អ្វីដែលឪពុកម្ដាយត្រូវធ្វើក្នុងករណី មានការវាយប្រហារដោយកម្ដៅ (Heatstroke) លើកុមារ គឺត្រូវយកកុមារទៅមន្ទីរពេទ្យជាបន្ទាន់ ប្រសិនបើអ្នកសង្ស័យថា ពួកគេមាន ការវាយប្រហារដោយកម្ដៅ (Heatstroke)។ ម៉្យាងវិញទៀត ឪពុកម្ដាយ ឬអាណាព្យាបាលត្រូវយកកុមារដាក់កន្លែងម្លប់ ឬបន្ទប់ម៉ាស៊ីនត្រជាក់ដែលមានខ្យល់ចេញចូលគ្រប់គ្រាន់។ លើសពីនេះ ត្រូវដោះសម្លៀកបំពាក់ក្រាស់ៗចេញ ឱ្យកុមារញ៉ាំទឹក ជូតខ្លួន និងមុខដោយទឹកត្រជាក់ ស្អំក្បាលកុមារជាមួយទឹកកក។

គួរជម្រាបជូនថា ការវាយប្រហារដោយកម្ដៅ (Heatstroke) កើតឡើងដោយសារតែការស្នាក់នៅរយៈពេលយូរនៅខាងក្រៅកំឡុងពេលមានសីតុណ្ហភាពខ្ពស់ ហើយជាផលវិបាកនៃការប៉ះពាល់ផ្ទាល់នឹងពន្លឺព្រះអាទិត្យ ក៏ដូចជាផលវិបាកនៃការស្នាក់នៅក្នុងទីធ្លាបិទជិត ដោយសារខ្យល់សើម និងក្តៅខ្លាំង ពោលគឺក្នុងការដឹកជញ្ជូនសាធារណៈ យានយន្ត ឬ ផ្ទះល្វែងដែលមានកំដៅខ្លាំង៕