ខណៈសិស្សដែល​ទទួលបាននិទ្ទេស B ភាគច្រើន​សម្លឹង​មើលទៅ​លើជំនាញធុរកិច្ច​នៅ​តាម​សាកលវិទ្យាល័យ​នានា សម្រាប់យុវតី សេង សុវណ្ណអម្ពរ បែរជាសម្រេចចិត្តចូលរៀន​សាលាបណ្តុះបណ្តាលបច្ចេកទេស ដោយ​ចាប់យកជំនាញ បរិក្ខា​ត្រជាក់ ទៅវិញ។

ក្នុងកិច្ច​សម្ភាសន៍​ជាមួយ AMS Education យុវតី សុវណ្ណអម្ពរ បញ្ជាក់ថា ការ​ដែល​រូបនាង​សម្រេចជ្រើសរើសរៀនជំនាញជំនាញបរិក្ខាត្រជាក់ ​មិន​ជ្រើសរើសចូលរៀន​នៅ​សាកលវិទ្យាល័យ ខណៈ​ដែល​រូបនាងទទួលបាននិទ្ទេស B ក្នុងការប្រឡងសញ្ញាបត្រ​មធ្យមសិក្សា​ទុតិយភូមិនោះ ក៏​ព្រោះតែរូបនាងមើលឃើញថា បច្ចុប្បន្ន​នៅ​កម្ពុជា​មាន​ការកើន​ឡើង​នូវ​សំណង់អគារ ក៏​ដូចជាខុនដូរជាច្រើន ដែលនេះ​បានបញ្ជាក់ថា នឹង​នាំ​ឱ្យ​មាន​តម្រូវ​ការ​ផ្នែកបរិក្ខា​ត្រជាក់ជា​ចាំបាច់ ដូចជា ម៉ាស៊ីនត្រជាក់ ទូរត្រជាក់ ទូទឹកកក បន្ទប់ក្លាសស៊េ  ជាដើម ដើម្បីសម្រួលដល់ការរស់នៅប្រចាំថ្ងៃ ។ សុវណ្ណអម្ពរ លើក​ឡើងថា ដោយសារតែតម្រូវ​ការ​គ្រឿងត្រជាក់ក្នុង​ការប្រើប្រាស់ប្រចាំថ្ងៃកើន​ឡើងពីមួយថ្ងៃ ទៅមួយថ្ងៃ ជាងជឿជាក់ថា ជំនាញបរិក្ខាត្រជាក់ នឹង​ក្លាយទៅជាជំនាញមួយដែលមានតម្រូវការក្នុង​ទីផ្សារបច្ចុប្បន្ន និងពេលអនាគត។

តើជំនាញបរិក្ខាត្រជាក់​គេត្រូវ​សិក្សា​ទៅលើអ្វីខ្លះ?

តាមពិតទៅបច្ចុប្បន្ន យុវតី សេង សុវណ្ណអម្ពរ កំពុងសិក្សា​ឆ្នាំទី២ លើជំនាញបរិក្ខា​ត្រជាក់​ នៅ​វិទ្យាស្ថានបច្ចេកទេស​ឧស្សាហកម្ម ។ បើតាម​ការ​បញ្ជាក់របស់ សុវណ្ណអម្ពរ ក្នុងជំនាញបរិក្ខារត្រជាក់នេះ សម្រាប់វិទ្យាស្ថាន បានបង្រៀន​ទាំងជំនាញទន់ និងជំនាញរឹង ។ សម្រាប់ជំនាញទន់ (soft skill) គឺសិក្សាពីសីលធម៌ អាកប្បកិរិយានៅពេលដែលចេញធ្វើការងារ ឬមួយក៏រស់នៅក្នុងសង្គមជាក់ស្ដែង, ចំណែកជំនាញរឹង (Hard skill ) ផ្តោតទៅលើជំនាញផ្ទាល់ មានទាំងគ្រឿងបង្គុំ ប្រព័ន្ធមេកានិក ហើយទាក់ទងជាមួយប្រព័ន្ធអគ្គីសនី សិក្សាម៉ាស៊ីត្រជាក់ និងដំណើរការគ្រឿងបង្គុំជាដើម។ ក្នុងជំនាញតូចៗដែល អម្ពរ រៀបរាប់ អ្វីដែលនាងចូលចិត្តជាងគេ គឺមុខវិជ្ជា AutoCAD ដែល​ទាក់ទងជាមួយនឹងប្លង់ ។ ប្លង់ នៅពេលដែលគូសសម្រាប់គម្រោង ត្រូវតម្លើងម៉ាស៊ីនត្រជាក់តាមអាគារ ដូច្នេះត្រូវដឹងរបៀបដាក់ទីតាំងម៉ាស៊ីនត្រជាក់។

ក្នុងអំឡុងពេលសិក្សា​នៅ​ឆ្នាំទី១នោះ សុវណ្ណអម្ពរ ក៏មានឱកាសចុះកម្មសិក្សាទៅប្រទេសថៃ តាមរយៈគម្រោងរបស់សាលាជាមួយនឹងក្រុមហ៊ុនដៃគូសហការដែលនាងកំពុងតែបំពេញបេសកកម្មការងារផ្ទាល់ផងដែរ។

សុវណ្ណអម្ពរ បានប្រាប់បទពិសោធន៍​ពេល​ចុះតៅ​កម្មសិក្សា​នៅក្រៅប្រទេស​ថា នាងបានដឹងពីចង្វាក់ផលិតកម្ម តាំងពីនៅជាគ្រោង នៅជាដែកនៅឡើយ ដោយ​នាងបានដឹងពីរបៀបបត់ និងតម្លើង។ មួយវិញទៀត អម្ពរ ក៏​អាចដឹងអំពីការធ្វើឱ្យចេញជាគ្រោងទូ ចាប់ប្រព័ន្ធគ្រឿងបង្គុំ ពិនិត្យប្រព័ន្ធភ្លើង ហើយរបៀបជូតសម្អាត។ អម្ពរ បញ្ជាក់ថា សូម្បីតែការជូតសម្អាត ក៏មានរបៀបដែលមានស្តង់ដារដែរ ជារួមទៅអ្វីដែលនាងរៀនបាន គឺដឹងពីរបៀបតម្លើង ពីដំណាក់កាលដំបូង រហូតដល់ដំណាក់កាលចុងក្រាយ។ 

សម្រាប់សិស្ស ឬក៏យុវជនដែលមានបំណងចង់សិក្សាលើជំនាញបរិក្ខារត្រជាក់ សុវណ្ណអម្ពរ បានផ្តល់ជាយោបល់ថា គួរ​តែសិក្សាអំពីចំណូលចិត្ត ពង្រឹងភាសា និងស្គាល់ឱ្យច្បាស់ពីគោលបំណងរបស់ខ្លួនជាមុនសិន។

យុវតី សេង សុវណ្ណអម្ពរ

“បើសិនជាតាំងចិត្តរៀនហើយ បើសិនជាមានអ្នកផ្សេងៗគាត់មកនិយាយអី អាចនិយាយបានថា យើងកុំសូវគិតអី មានន័យថា បើសិនជាអ្វីដែលយើងស្ដាប់ទៅហើយវាមានប្រយោជន៍សម្រាប់ខ្លួនយើង យើងយកមកគិត ប៉ុន្តែអ្វីដែលស្ដាប់ហើយ យើងពិបាកចិត្ត វាមិនល្អ យើងកុំគិតអី ហើយបើយើងដាក់ចិត្តថារៀនហើយត្រូវតែរៀនឱ្យខ្លាំង ដើម្បីអភិវឌ្ឍន៍ជំនាញមួយហ្នឹង ធ្វើឱ្យខ្លួនឯងរីកចម្រើន ហើយមានអនាគតល្អសម្រាប់ខ្លួនឯងផ្ទាល់”

យ៉ាងណាក៏ដោយ​ យុវតី សេង សុវណ្ណអម្ពរ មានក្តីសុបិន្តថា ក្រោយពេលនាងរៀនចប់ នាងនឹងទទួលបានជំនាញជាក់លាក់មួយ ដោយ​អាចនិយាយបានថា នាងនឹងក្លាយជាអ្នកបច្ចេកទេស ជាមួយនឹងជំនាញច្បាស់លាស់ ។ ដូច្នេះដើម្បីអាចសម្រេចក្តីសុបិន្តមួយ​នេះ អម្ពរ បានដាក់គោលដៅថា នាងនឹងខិតខំប្រឹងប្រែងរៀនជំនាញបរិក្ខា​ត្រជាក់នេះឱ្យ​កាន់តែខ្លាំង ហើយ​នឹងបន្តយកបរិញ្ញាបត្រពីរឆ្នាំទៀត៕